أعترافات و رسائل...


الأعتراف الأول
أعترف يا والدى العزيز(بابا) أنى بحبك
أو أكتشفت فجأة أنى بحبك و  أنى مكسور من غيرك
مش عارف يمكن لو كنت عايش كُنت هقولك على الكلام اللى مش قادر
أقوله لماما. مش علشان مش عاوز أقولها لأ
لأنها مش هتستحمل كل الكلام . أنت بقى هتستحمل
برغم يا بابا القسوة اللى كانت باينة بس انا عارف أن أنت كنت هتسمعنى
مش هتضايق منى أكتر من أنك هتزعل عليا
الشهر اللى فات كملت 15 سنة بُعاد
مش عارف لو كنت لسه عايش هل كانت حياتى هتتغير و لا لأ
مش عارف
بحبك
-
الأعتراف الثانى
كل ما بفكر فيكم أنتى أو هو  
بأفتكر بابا مش عارف ليه
يمكن لأنى عندى شعور فظيع بأفتقدكم
و عندى شعور أفظع أنى أكتشفت أنى بحبكم جداً جداً جداً


-
الأعتراف الثالث
أصبح يوم الأحد يوم خاص جداً لى أصبح يوم مقدس
بقى يجى شخص ليا الشغل و بنقرا مع بعض الأنجيل
و بيشرح ليا الكتاب
زى ما كنت بأتمنى . زى ما أنا حابب
فى تغيرات هتحصل فى حياتى هتحولنى من جوه للأنسان اللى أنا بأتمناه
يارب كل أشارة منك بتخلينى أكمل معه
فأدينى قوة من عندك فتح عقلى و قلبى
علشان أعرف الطريق اللى أنت أختارتهولى
أنا ضعيف
بس أنت قلت
(قوتى فى الضعف تكمُل)
بحبك يارب
-
الأعتراف الرابع
حبيبتى.....(أسمك) هيفضل جوايا مهما كانت الظروف حواليا
مهما كان البُعد
عارفة أن أنتى الوحيدة اللى عاوز أحكيلها على كل تفاصيل
أعترافى اللى فات بكل اللى جوايا
حبيبتى أنا بحبك قوى قوى
كل ما بتوه زيادة فى اللى انا فيه بحس أزاى حٌبك كان ليا نور جوايا
قبل ما يكون نور لطريقى
حبيبتى أوعى تزعلى أنى لسه بحبك أرجوكى
بحبك
-
الأعتراف الخامس
صديق قلبى العزيز جداً لأبعد ما أنت مُتخيل
أسف للى هقوله دلوقت
عارف أنت خليتنى أكره نفسى جداً جداً
أكرها بعنف
بقيت عاوز أخرج قلبى و أدوس عليه بالجزمة
لو أقدر كنت أقتلته
عارف بقيت لما بأفتكر  أن ليك عندى المعزة و الحب الكبير دة
بكره نفسى قوى
عارف ليه علشان مش قادر أكرهك
صديق قلبى العزيز
بحبك
-
الأعتراف السادس
 بارب ممكن تاخدنى خلاص أرجوك
بس عرف اللى بحبهم الأول علشان ميفتكروش أنى مشيت وسيبتهم
أرجوك
أنا عارف أن أنت مستنى عاليا مش عاوز تاخدنى دلوقت
لسه معادى
بس أنا تعبت العالم اللى أنا فيه صعب و قاسى
و انا أٌنهكت خلاص .خارت قوايا
و مش قادر استمر كدة
أنت الوحيد اللى حاسس بيا و فاهم اللى أنا فيه
قلبى مبقاش مستحمل كل اللى بيحصل حواليا خلاص
أنا عارف أن فيه ناس هيزعلوا أنك خدتنى بس أنا مش قادر
أنا أسف يا أمى بس خلاص مش قادر
دى مش دعوة وحشة أو انا متشائم
بس كدة أريح
-
الأعتراف السابع
بأضحك على نفسى لما أعتقد أنى بأشغل نفسى
بأنى أروح لقرايبى بعد الشغل أو أنى أتمشى بعد الشغل وسط الزحمة
و كأن الزحمة و قرايبى هيبعدوكم عن تفكيرى
للأسف لأ
قلبى بيتنفض لما بتيجى فكرة أنى ممكن أفقدكم
بحبكم
-
الأعتراف الثامن
عندما قلت أننى مريض لم تكن مُجرد كلمة مجازية
لم تكن أبداً
أبداً
-
رسالة
محدش يكلمنى عن حال البلد
أنا شايف و كلكوا بتتكلموا فيه
انتوا كفاية
و لو عاوزين رأيى
حاجة بقت تقرف
خلاص

10 التعليقات:

  شمس النهار

الأحد، 16 سبتمبر، 2012 3:36:00 ص جرينتش+2

عارف لو دققت في كلامك
هتلاقي حالك هو نفس حال البلد

  mrmr

الأحد، 16 سبتمبر، 2012 4:10:00 ص جرينتش+2

اعترافات من القلب
حاسه بوجعك قووووى
ربنا يريح قلبك
حمد لله بالسلامه

  ابراهيم رزق

الأحد، 16 سبتمبر، 2012 7:56:00 ص جرينتش+2

رامى
القلب الطيب

المح نبرة غير مريحة فى اعترافاتك

وان كنت بدون تعليق عليها

تحياتى

  فاتيما

الأحد، 16 سبتمبر، 2012 2:39:00 م جرينتش+2

عارف
وسط طل الوجع اللى ف رسايلك
ايه الجميل وكان بينور ف وشى ... ؟


كلمة بحبك
اللى بتنهى بيها معظك الكلام
عشان لما اقولك انك قلبك دا
جاى م قلب السما ومش م الأرض
ابقى مش ببالغ

ربنا يهديلك الحال يا ر ر
ومتدعيش يارامى ...
لو سمحت

ربنا يديك طولة العمر مع الفرحة
دعوة بدعوة
ادعى بكدا
بلاش تستنى ياخدك عنده
استنى منه الراحة والخير
ليه لأ .. ؟
مش بعيدة عنه يعنى ابدا


ان شاء الله نشوفك قريب
اول ما نتفق على معاد علطول

ماشى ؟

ومش هيكون الحد عشان عرفنا
انه معاد مقدس اهو
:)

ربنا يسعد قلبك


اللهم آمين


  ستيتة

الأحد، 16 سبتمبر، 2012 2:53:00 م جرينتش+2

انت بني آدم نادر
شفاف جدا
كل شيء تقصده ينفذ بداخلي بقوة
انت بتحب كل شيء
حتى اللي ميستاهلش بتحب
يمكن علشان كده ربنا كاتب لك عمر
حتى لا نفتقد كل القلوب ونعيش تحت وطئة الكراهية فقط
ربنا يداوي ألمك وينور قلبك

  لبنى أحمد نور

الأحد، 16 سبتمبر، 2012 8:51:00 م جرينتش+2

كل ما بقرأ تدوينة جديدة ليك مؤخرًا يا رامي
بتحصل جوايا حاجات كتير وببقى عايزة أقول حاجات كتير
لكن أول ما بوصل لصفحة التعليقات بتجيلي حالة خرس

كون بخير

  لـــولا وزهـــراء

الاثنين، 17 سبتمبر، 2012 3:14:00 ص جرينتش+2


يارب كل أشارة منك بتخلينى أكمل معه
فأدينى قوة من عندك فتح عقلى و قلبى
علشان أعرف الطريق اللى أنت أختارتهولى
.............................
ربنا يعزك وينورلك طريقك ويهديك لكل حاجة حلوة انت تتمناها ويسعد قلبك
اللهم استجب له واره الطريق الذي اخترته له وانر دربه واسعد قلبه وارزقه السعادة وابعد عنه التشائم
نفسي يا رامي بجد اشوفك سعيد واجي اقرأ بوستاتك الاقيها بتشع نور وفرحة وسعادة وربنا يسعدك قريب بقلب تحبه وسيبك بقى يا رامي من الحب اللي من غير امل
وعندي فكرة احسن ... فرحنا وروووووووووووح قولها انك بتحبها اللي فاهماه انها متعرفش انك بتحبها ليه العذاب ده بس !!! ما تروح تقولها

لولا

  مصطفى سيف الدين

الثلاثاء، 18 سبتمبر، 2012 12:57:00 م جرينتش+2

انت اكتر واحد مبعرفش اعلق عنده
مشفتش حد صادق مع نفسه كده
ربنا يسعدك دايما

  sony2000

الثلاثاء، 18 سبتمبر، 2012 6:43:00 م جرينتش+2

بص
صدقني بمر بالحاله دي
كتير اوي

بس هتفرج
وهتفرح
وهتلاقي الفرح جيين
فبلاش تقول الكلام انك عاوز تمسبنا وتمشي

وجعتني :(

  momken

الأحد، 23 سبتمبر، 2012 11:41:00 ص جرينتش+2

...

عارف يا رامى دى المره الكام الى اجى اعلق فيها وامشى بدون تعليق؟

عارف قريت البوست ده كام مره؟
وبرضو معلقتش

الكلام مليان الم لكن مع كل فقره بعرف انت اد ايه انسان بجد
واد ايه انا محظوظ انى اعرف انسان بالشفافيه والنقاء ده

كلامك مؤلم لكنه بيدور فى قلب الوطن واهله
انت ملخص بلدنا ومخلصنا كلنا

كل يوم باجى ادور عهلى جديد عندك
بحب ابدأ يومى بالحديث مع حد طيب

تحياتى

....