...33...

قبل كل شيىء
قبل الكتابه
قبل الحزن و قبل الفرح
و قبل الحب و الأمل
و قبل الفقد
يجب الشكر
أشكرك يا ربى
اشكرك بكل عمق
اشكرك بكل الحب اللى بتدهونى
و أنا زى ما أنا
مبتعبش علشان أتغير
حتى لما أتغيرت و حاولت بجد
مكنش علشانك
بس أنا متاكد أنك كنت باعت السبب ده
علشان تغيرنى
بس برضه خذلتك
(مش جديد)

أشكرك للفرص اللى أدتهانى و لسه بتدهانى و مزهقتش منى
أشكرك ياربى
لأنك أدتنى سنة جديدة هتحاول فيها تغيرنى
أشكرك يا ربى
أشكرك
أنك لسه بتسامحنى
أشكرك
على عطيااااااك الكتييييير
أشكرك
من اللى انقذتنى منه اللى حسيت بيه
و اللى أنقذتنى منه منغير ما أحس بيه
و لا حتى عرفته
أشكرك
.......
بعد تنهيدة و اأاه كبيرة من جوه جوه القلب
قررت أكتب
مش عارف وقته و لأ
و مش عارف ليه
هأكتب بس علشان عاوز أخرج اللى جوايا مكتوم
هأكتب علشانى
و علشانك
و علشانه

رجاءاً محدش يسألنى عن أى شيىء

حزنى مهواش بس عليكى لأ و كمان عليا
و يمكن عليا أكتر
مش علشان أنا مش مهتم أو أن حزنى عليكى أقل
كان نفسى أبقى قوى زيك كدة

علشان لما حد يجرحنى أقدر أبعد
عُمرى ما لومتك
فمتلومنيش
زى عمرى ما ها لومه

بفكر طب ألوم مين
ألوم أمى
لأنها خلتنى كدة
خلتنى أخلى قلبى قدامى
و لا ألوم أبويا علشان حنن قلبى على كل الناس
كان  نفسى أكون قاسى حقيقى
كان نفسى

مش علشان اللى أنا فيه دلوقت
لأ من زمان مع كل موقف فى حياتى أتمنيت أرد بقسوة
حتى فى أعنف حالاتى مبقدرش أكسر اللى قدامى
مش ضعف
هو خوف على اللى قدامى

طب ألوم نفسى
.......
أنتى
قولتى
أنا بحبك .. وبثق فيك دلوقتى
لكن مش هثق فيك بعدين

هو
بقوله هو أنا بالسوء ده كله
قالى
أنت مش سيىء خالص
أنت طيب
و طيبتك دى بضايقنى

(عرفتوا ليه بقى عاوز أكون قاسى)
علشان مضايقش حد

هى
أول حاجة فى العلاج
لازم تعالج أحلامك

(مقدرتش لأن هى الشيىء اللى فاضلى)

مقدرتش و مشيت
مشيت أكمل أحلام
.......
علشان يشبهلك حبيته

فيه كتير منِك
 نفس الحزن
نفس الكلام
نفس الروح
.
.
نفس الحب

كان نفسى أناديلك أشكيلك أسمع منك
أبكيلك

 
 
.......
واحد بيحكى معايا
وهتقعد كدة
قلت أة
قال مش هتقدر
مش هقدر ليه؟؟!!
علشان الوحدة
خلانى أبتسم و أفكر أضحك
يا أبنى دى أقل حاجة عندى
(:
.....
ليه كل حد بحبه
يسأل السؤال الغبى ده
هو فى حد بيحبنى كده؟؟؟!!!
و كأن الحب ليه مقياس
و كأن المفروض محدش يحب حد كدة أساسا
السؤال بيجرح
بيجرح بيحسسنى أنى غريب
بيحسسنى أنى غلط
أن حبى كله غلط
ليه مفيش أستوعاب
أن فيه حد يحب حد بكل ما فيه
مش هيفصصه يعنى
هيحبه بالوحش اللى فيه قبل الحلو
ما أصل أنا فيه برضه
ليه مش مصدقين
أن أقل مشاعر حلوة انا راضى بيها
ليه؟؟
ليه مش مصدقين
ان كلمة بسيطة ممكن تخلينى سعيد
أن ابتسامة صغيرة
هتخلينى مبسوط
ليه؟؟
حملك عليا عمره ما هيتعبنى
عمره
بس هيخفف من عليكى
وعليك
ده هيطمنى
ليه مش مصدقين؟؟؟!!!!
هو أنا غريب قوى كدة؟؟
مكنتش أعرف
صدقونى
أسف مش هأعرف أتغير
......
و كأن
Better life team
بيقولى كل سنة و أنت طيب

14 التعليقات:

  ابراهيم رزق

الثلاثاء، 24 يوليو، 2012 7:56:00 م جرينتش+2

رامى
القلب الطيب

سعيد جدااااااااااااااا انك رجعت تكتب

خليك زى ما انت بقلبك الطيب
و اللى عايزك هو اللى يتغير
عارف ليه
لان اللى زيك قليل قوى
حاسس بنفسك و نت بتكتب

تحياتى

  فاتيما

الثلاثاء، 24 يوليو، 2012 8:13:00 م جرينتش+2

كل سنة وانتا طيب
ورقيق القلب يا رامى


انا مش منهم الناس دول
انا مصدقاك
وعارفة
وعاجبنى قلبك كدا
وعارفة انك مش عاوز حاجة من حد
وعارفة كمان ان اللى زيك
يستاهل ربنا يطبطب عليه
مهما حطه ف محن ووجع ...


كل سنة وانتا اخويا
وصديقى
والقلب الل مليان دفا
ميهمكش من حاجة
ومتصلحش احلامك ...
احلام الناس التانية هيا اللى مكسورة الجناحات و مادية و عبيطة وسهلة


انتا يا رامى
احلامك زيك .. شبههك
وطيبة كريمة وصافية زيك
و شكلها شبه قلبك
كل واحد بشبه قلبه
و رغم حلاوة الغنوة
بس برضو ... متسمعش كلام منير
واسمع كلام اختك فاتيما
:)

كل سنة وانتا ر ر

--------------

https://lh5.googleusercontent.com/-RSyyXBea6cY/TXji9ieWpTI/AAAAAAAAAZE/cSfSzg-Y4KQ/happy+birthday.jpg

---------------
http://30.media.tumblr.com/tumblr_m166gfck6D1qkrs51o1_500.jpg


--------------
وعلى جنب
تحففففففة
صورة ساليناز يا ابراهيم
ربنا يحرسهالك من كل شر
يا رب

  مصطفى سيف الدين

الثلاثاء، 24 يوليو، 2012 11:39:00 م جرينتش+2

كل سنة و انت طيب يا رامي
و طيب يعني طيب
و طيب يعني مش قاسي
و طيب يعني رامي زي ما هو كده
طيب يعني اللي قلبه على لسانه
و طيب يعني قلمه بيكتب اللي جواه من غير تكلف
و طيب يعني قلب كبير
ربنا يحققلك كل امنياتك

  شمس النهار

الأربعاء، 25 يوليو، 2012 12:40:00 ص جرينتش+2

حمد الله علي السلامة
ومش هعلق
علشان حسيت ان الكلام ده
عصير قلبك

  شمس النهار

الأربعاء، 25 يوليو، 2012 12:41:00 ص جرينتش+2

وكل سنة وانت طيب :)

  الازهرى

الأربعاء، 25 يوليو، 2012 1:18:00 ص جرينتش+2

تعرف يا رامى
كنت راجع من الصيدلية من يومين
ودايما باتمشى حتة بتاعت كيلو ونص كده

وفى الهواء بقى ووسط الزرع أحيانا وافتكرتك إنت ومينا فى رمضان اللى فات

مينا انا كنت اول مرة أقابله
وإنت كانت أول مرة أقرب منك

وفى خلال سنة
بقيتوا قريبين منى جدا
وقعدت ابتسم والحنين مالى قلبى لكم

تعرف ليه ؟؟؟؟
علشان جواكم صدق غايب عن ناس كتير
سواء فى التدين أو براه
أحاسيسكم واضحة
وحلمكم بسيط
وتعاملكم فوق البساطة بكتييييييييييير
بجد حبيتكم علشان بتمثلوا نقاء القلب وهدوء السريرة

صدقنى لو دورت على اللى الناس عايزاه مهما كانت قرابتهم من جواك هتلاقى إنك صعب تكونه
إنما دور على غنت عايز تروح فين من جواك
وساعتها هتوصل وتبقى مطمن
وساعتها برضه الناس هتلاقى لهم مكان جواك بسهولة



طبعا مراعاة لظروف الريجيم
هاكتفى بالتورتة البسيطة دى

http://imageshack.us/photo/my-images/188/11111cd.jpg/sr=1


أما الهديمة فأنا بأكره الهدايا الإفتراضية

ولك عندى هدية لما نتقابل فى أبو الريش بإذن الله

على فكرة الميعاد قيد التحديد
بس غالبا هيبقى السبت بعد الجاى أو اللى بعده والغالب اللى بعده

  لبنى أحمد نور

الأربعاء، 25 يوليو، 2012 9:31:00 ص جرينتش+2

مش عارفة أعلق على فكرة
خليك طيب دايمًا
ومبتسم دايمًا

كده :)

  re7ab.sale7

الأربعاء، 25 يوليو، 2012 1:56:00 م جرينتش+2

وصباح البنفسج المنور
كل سنة وانت طيب يا رامي برغم كل شيء
طب والله العظيم يا رامي برغم اني بلاقي حزن كتير هنا يشبهني بس بفرح بقراية كل كلمة وكل احساس بيوصلني
متغبش تاني
وغلاوتك عندنا كلنا
وانت عارف احنا بنحبك اد اية
كل سنة وانت طيب وبخير وسعادة وبتمني لك الحب الكبير دايما والسعادة برغم كل شيء
وانت فاهمني

  كاتونيا

الأربعاء، 25 يوليو، 2012 10:24:00 م جرينتش+2

أنا متشكرة وبحمد ربنا انك موجود



كل سنة وانت رامي

  شاب فقرى

السبت، 28 يوليو، 2012 9:03:00 م جرينتش+2

العزيز رامي

كلنا هذا الرجل نحيا فى نفس الوجع

إسمه وجع الحياة

فكن قويا فهذى هي الحياة

بالأمس تجمعنا فى وسط البلد

لم أعرف طريقا لادعوك به

إن شاء الله الجمعة القادمة ستجد الدعوة إلى تجمعنا :)

تحياتي لك

كن بخير يا صديقي

شاب فقري

  إيثار

الأحد، 29 يوليو، 2012 3:44:00 ص جرينتش+2

لما بقيت أحبهم بقوا يزعلوا يا رامي.. :\

كل سنة وانت جنبنا "أنانية"
كل سنة وانت بتتحب "أمنية متحققة"

  لـــولا وزهـــراء

الأربعاء، 1 أغسطس، 2012 4:47:00 م جرينتش+2

أشكرك للفرص اللى أدتهانى و لسه بتدهانى و مزهقتش منى
أشكرك ياربى
لأنك أدتنى سنة جديدة هتحاول فيها تغيرنى
أشكرك يا ربى
أشكرك
أنك لسه بتسامحنى
أشكرك
على عطيااااااك الكتييييير
أشكرك
من اللى انقذتنى منه اللى حسيت بيه
و اللى أنقذتنى منه منغير ما أحس بيه
و لا حتى عرفته

.............................ززز
بجد انا كمان عايزة اقول لربنا سبحانه وتعالى كدا .. اشكرك يااااااااااااارب


خليك كما انت رامي اللي نعرفه بقلبه الكبير وطيبته واخلاقه

انت مش غلط .. ربي يعزك


لولا

  NaDa

الخميس، 2 أغسطس، 2012 4:04:00 ص جرينتش+2

كنت داخلة أعتب عليك
كنت داخلة بتمنى أني الاقيك كاتب
ماتتصورش أنا فرحت أد إيه لما لاقيت البوست ده ..
ماتبطلش تكتب يارامي
عشان وجودك وكلامك ومدونتك مهمين أوي عند كل اللي بيجوا هنا :)


قلبك جميل وصادق ونقي
خليك ديماً كده يارامي :)

  Sarah ..

الجمعة، 3 أغسطس، 2012 5:08:00 ص جرينتش+2

كل سنة وإنت جميل زى ما إنت يا رامى .. :)

ياريت ترجع هنا زى زمان :)