عارفة3


عارفة
أنا المرة دى
مش عارف هأكتب أيه
و لا أزاى
بس هأكتب و خلاص

عارفه
مش علشان أنا مش عارف
أقول لك أيه
لأنى لما كنت بكلمك
أساساً
مكنتش عارف أقف
أصل أنا رغاى ما أنتِ جربتينى

عارفة
 كملت سنتين بس
علشان أوضحلك بس
أنى قد أيه
بحبك
بس تقريباً معرفتش
للأسف

عارفة
محدش هيفهمنى خالص
غير لما يدخل جوه قلبى و روحى
و يشوفك
و علشان ده مستحيل
هيفضل محدش فاهمنى 

عارفة
كل أرتباطى بالناس
كان عن طريقك
حتى لو مش بطريقة مباشرة
بس من وقت ما بعدتى
و أنا حقيقى مش عارف
أكلم حد و لا أتواصل مع حد

عارفه
حتى ضحكى
مبقاش هو ضحكى
اللى حكيت لك عنه

عارفه
بُعدك ده
بيخلينى أتعب
مش بيخلينى أبعد
بس متقلقيش

عارفه
أنا خايف من أيه
لما تمر السنين بيكى و تفتكرينى
 تحزنى أنك مدتنيش فرصة

بس عارفة
أنا بطمنك أنه أكيد مكُنتش أستحقك
حقيقى مش كلام
علشان كدة متندميش
لأنك هتلاقى
اللى يقدرك
اللى يحبك
اللى يديكى أحساس الأمان
اللى معرفتش أديهولك

عارفة  
يمكن كنت بأحلم
أن ممكن يمر الوقت اللى ممكن
نكبر فيه مع بعض
و يبقى شعرنا أبيض
لو اتبقى عندى شعر يعنى (:

عارفة
حد قال لي أنى غير واقعى
و بتبنى حاجات كبيرة على مفيش
هو حد متخصص
يمكن يكون عنده حق
بس اللى معرفش يشوفه
أن حُبك
 كان الشيىء الواقعى الوحيد
فى حياتى كلها
الشيىء الوحيد
اللى حسيته

عارفه
أن نفس الشخص دة
لما قلت له أن لما بحاول أبعد عنك
بأبعد علشان بحس أنِك أتخنقتى منى
و أنى بتعبك
كان رده
بلاش الأفلام العربى دى
هو صحيح!!!
أنا عامل فيلم عربى ؟؟

عارفه
هو أعتبرنى حالة عادية
زى أى حد تعبان بيجيله

عارفة
أنتِ مكنتيش بس حبيبتى
أنتِ زى طفلى اللى خايف عليه
مش عارف أنت فهمانى
و لا لأ

عارفة برضه
أنا شبه أستقريت فى القاهرة

عارفه ليه
علشان يمكن أقابلك صدفه
و أشوفك
حتى لو بعد سنين
و تكون النظرة دى طاقة ليا
لسنين جايه
بس أرجوكى لو شوفتينى متضايقيش
أرجوكى

بالرغم أنى لو شفتك
ممكن يجرالى حاجة

بس مش مهم
المهم أنى فى يوم ممكن أشوفك

عارفة
أنا كُنت دايماً ندمان أنى قُلت لك
مش ندمان انى حبيتك
يمكن ندمان على أنى ما أخترتش الوقت
الوقت اللى المفروض أقول فيه
بس انا مكنتش أعرف كده
مكنتش أعرف انى لازم أختار الوقت
اللى أقول فيه لحد أنى بحبه
مكنتش فاهم
يمكن مع الوقت فهمت و عرفت
بس متأخر قوى قوى
بعد أنه مينفعش أحب حد تانى خلاص
*****
طب أنت بتحكى ليه ده كله أساساً
عارفة
حقيقى مش عارف
بس الأكيد أنا مشتاق لك

عارفة
كنت قاعد مع ناس و سألوا كل حد فينا
أنت حبيت ليه
كل واحد قال سبب
أنا معرفتش أقول أيه 
معرفتش  السبب
غير أنى أقول أنى حبيتك بس

ممكن أقول حاجة أخيرة
ممكن؟؟؟
عارفه
لما كنت بقولك
أو بالأصح بكتبلك
صباح الخير
كان ليها طعم تانى
غير لما بقولها لأى حد
كان بيكون صباح
بطعمك أنتى
صدقينى
مش عارف أشرحلك أزاى

عارفه 
خلاص أنا هسكت خالص
هبطل أكتب
هبطل أتكلم عنك
بس مش هبطل أفكر فيكِ
و مش هبطل
أحبك
متزعليش منى أرجوكى

ربنا معاكى
 
******
أنتم بقى (:
عارفين اقدر أقول
أن مش هقدر أكتب تانى
أنا طبعاً حزين جدا لده
بس حقيقى مش قادر

حاولت مقدرتش
حتى أنى أكتب عن أرائى فى اللى بيحصل
او حتى بوست عن صباحى اللى بدعمه
مقدرتش
أسف حقيقى

هحاول أتابعكم بس مش عارف هقدر
أعلق و لا لأ

 يمكن القرار جه قبل كام يوم من شهر ستة
الشهر التدوينى اللى كنت محضر انى اكتب فيه السنة دى
 مش عارف أقفل التعليقات و لا لأ
هسبها مفتوحها

ارجوكم متضايقوش

شكرا جدا جدا جدا ليكم كلكم

19 التعليقات:

  ابراهيم رزق

الثلاثاء، 29 مايو، 2012 9:40:00 م جرينتش+2

رامى القلب الطيب

طبعا انا لم افاجىء بالقرار
لاننا اتكلمنا فيه كتير

بجد مش هينفع التعليق

لازم نتكلم مع بعض

تحياتى

  شيرين سامي

الثلاثاء، 29 مايو، 2012 10:20:00 م جرينتش+2

رامي
:)
أولاً كده أنا جايه أسلم و أقول وحشت البلوجر جداً و أهله و كلامك الدافي الصادق اللي مش ممكن أقراه في حتة تانيه.
عارف إنت بقى إني كتبت بوست و نشرته حالاً إسمه "قلبي ميشبهنيش" :) صدفه غريبه.

يا رامي الحب الحقيقي الحقيقي بس هو اللي مالوش سبب..اي سبب..هو اللي متلاقيش حاجه ودتك ليه و لا حاجه أجبرتك عليه و لا حاجه حتى شجعتك أنك تكمل..
كمان الحب مالوش وقت و لا الكلمه لها معاد عشان تقولها و فكرة التوقيت الغلط دي فكرة غلط..عشان الحب الصادق في عفويته و محدش يقدر يتحكم في مشاعره يمكن يقدر يتحكم في تصرفاته لكن المشاعر بتغلب يا فاندم :)
عارف كمان إن اللي بيحب حد بيقدر يحميه و يحسسه بالأمان أكتر من أي إنسان...لكن للأسف إحنا مش بنشوف الحقيقه دي و بنفضل نخاف و نحس إننا مش قادرين ندّي الأمان..لأننا يمكن مخدناهوش.
أنا مش هقولك إنسى أو إرجع
بس هقولك عيش إحساسك
زي ما إنت حاسه بالظبط
و سيب قلبك على هواه
إستمتع حتى بالألم
محدش عارف بُكره في إيه
مش كده :)

طولت عليك بس بجد كنت مستنيالك تدوينه من زمان

أنا هعتبر نفسي مقريتش الإكتآب الأخير ده لأني سبقتك فيه بس الحمد لله قدرت أخرج و إنت كمان مكانك هنا بينا و هتشارك في التدوين اليومي مفيش هزار و لا هنعملك إعتصام في المدونه و نهتف...الشعب يريد...رامي :)

مش ضروري تعلق عندنا بس إكتب و إفتح التعليقات عشان على الأقل نطمن عليك

سلام يا فاندم
:)

على فكرة سعيده جداً بتشريفك ليه في حفلات التوقيع إنت إنسان رائع بجد

  حنان الشافعي

الأربعاء، 30 مايو، 2012 12:12:00 ص جرينتش+2

انا حاسة
انا عارفة
انا فاهمة
متبطلش تكتب
متختفيش
متقفلش التعليقات
انت متعرفش تأثيرك عند ناس كتير شكله عامل ازاي
ولعلمك بقى..هتكتب معانا في حملة التدوين اليومي..كلام نهائي
وبس كده بقى

  فاتيما

الأربعاء، 30 مايو، 2012 2:51:00 م جرينتش+2

لأ يا رر
قلبك يشبههك جداااااا

وأيوه
انتا الوحيد
اللى جاوبت صح
الحب ملوش سبب
اللى يحب حد عشان اسباب
يبقى مش بيحبه ...
يبقى بيتبادل معاه اشياء
مصالح ومنافع وواجبات وحقوق ...
يبقى لو اللى قصاده ف يوم قصّر
او الشخص دا نفسه زهق و مل او تعب
الحب يروح ونرجع نحسبها
ونقول منتا زمان كنت كذا
وانا مش هحب الا بكذا ....
لأ
الحب المشروط دا ..
مش حب بجد
دا علاقة قوية
محبة
ود
ماشى
لكن حب حب ... لأ


حبك انتا الصح
زى الكتاب ما بيقول

بس المعضلة بقى
ان اللى قصادك يطلع
مش حاسس بيه
او بيرد عليه بالذى تأمله منه ..


انا معرفهاش
لكن هيا اكيد عارفة نفسها
ومعرفش ليه كدا
يعنى جايز هيا انسانة واقعية قوى
لدرجة انها مش مصدقاك
او خايفة منك
او فيه شىء تانى مكبلها
او بتحب حد ..
معرفش

بس اللى اعرفه
ان كلمتك بتاعت انها هتزعل قدام دى
اظنها هتتحقق ...
لأنك فعلا مخدتش فرصة

بس مين يعرف
مش يمكن ربنا يفتح طاقة نور
يمكن
انا مش ببطل أمل ولا رجاء
ولا عشم ف ربنا

ربنا يهديكى يا ست عارفة
يلى انا مش عارفاكى
ورامى عارفك
:)


انتا كتبتنى كالعادة
خصوصا لما اكون ف أعلى نقطة
بجبل اليأس ...

معلش
منا برضو
ساعات تانة بنزل تانى لحافة أمل
وربنا بيفرجها ...
وان شاء الله تعمل زيى
:)


يا رب

اكتب يا رامى
ولايهمك حاجة
احنا هنقرى ولو قولت ايه

وحشتنى بوستاتك دى قوى
بجد

  Radwa Tarek..

الأربعاء، 30 مايو، 2012 8:05:00 م جرينتش+2

كنت ف بالي طول اليوم النهارده...وانا ف عز وقت المذاكرة والامتحانات

كان نفسي اعدي عليك بس واقولك رامي هو انت مفتقدنا كده؟؟
اصل احنا مفتقدينك اوي :(

مش هعلق ع البوست لأني اخر واحدة اراعي وجع حد من الناحية ديه...عشان انا وحشة بس محدش عارف ده :(

عارف...انا مبسوطة انك لسه موجود جوايا...عشان بتخليني أؤمن بالناس
انهم لسه كويسين

هو انت ازاي اثرت فيا كده؟ مش عارفة

رامي انت حلو

  لبنى أحمد نور

الأربعاء، 30 مايو، 2012 11:17:00 م جرينتش+2

كون بخير :)

  شمس النهار

الخميس، 31 مايو، 2012 11:37:00 م جرينتش+2

كتير الكلام مابيقضيش
علشان تكلم اللي بتحبه

ورغم كل اللي انت قلته ده
عارفة ان لسه جواك مشاعر وكلام مش عارف تقوله لها

  rona ali

الجمعة، 1 يونيو، 2012 2:37:00 م جرينتش+2

عن الجزء اللي يخصنا عارف احنا هنفتقد تدوينك اكيد في شهر سته
بس الاهم انك تكون كويس بغض النظر
واكيد كنت هنبسط لو قرأت لحضرتك اراء عن اللى بيحصل وتدعيمك لصباحى :)

ومافيش داعى للاعتزار اعتقد :)
دومت بخير دائما

  Heba Reda

السبت، 2 يونيو، 2012 10:52:00 ص جرينتش+2

طيب مش ضروري ترد
بس حلو كلامك ويا بختها إللي تتحس بالشكل ده
ربنا يسعدك
حاسه إنه يمكن دي مش تبقى تدوينتك الأخيره، حاسه ده
ربنا معاك

  re7ab.sale7

الخميس، 7 يونيو، 2012 12:57:00 م جرينتش+2

,صباح الورد يا رامي
عايزة اقولك الاول اني سألت عليك كتير بوعت لك السلام كتير مع كل صديق مشترك بينا تقريبا وقلت لهم انك واحشني اووي برغم اني ولا مرة شوفتك
وعارف كمان
حاسة بيك اوووي
وبكل الكلام اللي مش بيتقال
وعارف كمان
انك من فترة كبيرة مكتبتش
عارفة ان كلنا مصدومين من اللي بيحصل ف بلدنا
عارفة انك
حزين اوووي
حزين نفس حزننا العام
وحزين حزن من نوع خاص
حزن الحب
عارف
مش عارفة لية اللي بيحب بيألم نفسه عشان حبيبه
مش عارفة لية بيبعد عنه وهو مش عايز يبعد
مش عارفة لية بيقرر قرارات غلط
مش عارفة لية بيقول احنا اتقابلنا في وقت غلط
لا بالعكس قدرنا ربنا كتبه لينا احسن مما فكرنا فيه ولو شوية فكرنا هنلاقي ان الزقت ده مكانش في انسب منه
بتمني لك السعادة
وبتمني انك تكتب دايما عن اي حاجة وكل حاجة
بس بلاش تتكلم عن البلد واليل بيحصل لاننا عارفينه للأسف
بتمني مرة تانية انك تبقي موجود دايما وانك متقفلش التعليقات
خللي الباب مفتوح او حتي موارب
علي الاقل صداقتنا دي هي الشيء الصح والحقيقي والوحيد اللي بيحسسنا اننا عايشين صح

  الازهرى

الاثنين، 25 يونيو، 2012 11:59:00 ص جرينتش+2

مش عارف أقول لك إيه



بكره جاى

  حنان الشافعي

الثلاثاء، 26 يونيو، 2012 2:26:00 م جرينتش+2

احكيلك حدوتة؟

كان ياما كان
ياسعد يا اكرام
كان في مزيكا
حلوة قوي
وحرة
فضلت تلف الكون عشان تتسمع
ومحدش كان بيسمعها ابدا ابدا
محدش كان قاصد بس..مكانوش يعرفوا انها موجودة
عارف ليه؟؟
عشان كانت بتسافر في طبقات الجو اللي فوق خالص دي..اللي بيسافر فيها الصوت من غير ما يتسمع

بس المزيكا كانت حلوة قوي
حلوة لدرجة خلت طبقات الجو اللي هي عبارة عن فراغ اصلًا تحس بيها
فهمتها وعرفت ان جمالها مش ليها وان كل اللي تتمناه انها تتسمع
قامت ضيقت عليها المكان وطردتها..طبقات الجو المليانة فراغ كان قصدها تبعتها للسحاب وهو هيكمل المهمة

لكن المزيكا مفهمتش..وزعلت..وبقت مصبوغة بشوية حزن..أو تقدر تقول شجن

نزلت للسحاب..انبهر بيها قوي..وعشان السحاب بيحب يعيط شتا..فهم الشجن اللي في المزيكا..وحبه جدًا كمان

المزيكا فضلت تسافر بين السحاب وهي ضايعة ومش فاهمة انها بقت مزيكا جميلة مع شوية شجن..يعني بقت اجمل مزيكا في الكون

بعد شوية السحاب خاف عالمزيكا تموت قام عصرها وفتفتها وعيط شتا وبعتها لكل الأرض

المزيكا نزلت الأرض واتسمعت..واللي محبش الشتا..هي اتبخرت عشانه وبقت هوا وسكنت بعد قفص الضلوع بشوية

فضلت المزيكا عايشة كل السنين اللي فاتت وهتفضل عايشة طول ماهي بتتسمع

وتوتة توتة خلصت الحدوتة
انشر التعليق او متنشروش..معننديش مشكلة
وكن بخير يا رامي :)

  حنان الشافعي

الثلاثاء، 26 يونيو، 2012 2:27:00 م جرينتش+2

http://www.youtube.com/watch?feature=endscreen&v=ufTzUS9uUbM&NR=1
واسمع المزيكا دي

  إيثار

الثلاثاء، 26 يونيو، 2012 2:38:00 م جرينتش+2

طب إيه؟
عايزة أقولك كلام كتير، ومش عارفة، أحكيلك حدوتة؟ كان ياما كان، كان فيه ولد صغير روحه أكبر من أي شيء، كان بيعرف يتنفس، ومكنش بيوجع الارض وهو بيمشي عليها، كان يا دوب بيمسها بيطبطب عليها عشان متتوجعش، الولد كان طيب اوي، ومحدش بيعرف يفلت من إنه يقع في حبه، كانت الصلاة مش بتفارق لسانه، كان بيصلي للعالم كله والعالم كان بيصليله، الولد حصله حاجات كتير اوي أنا مش فاكراها عشان أنا عندي زهايمر متل ذاكرة السمك، بس انا فاكرة كويس إني أنا كمان حبيت الولد ده زي ما فاكرة ازاي بتنفس وبمشي، وفاكرة كمان إني مش بعرف أحكي حواديت في كل الأحوال، ومش عارفة أكمل الحدوتة :\

  الأسامي مش مهمة أصلاً :)

الثلاثاء، 26 يونيو، 2012 3:55:00 م جرينتش+2

جلال الدين الرومي: " - سأقول لك كيف خُلق الإنسان من طين:
ذلك أن الله نفخ في الطين أنفاس الحب !
- سأقول لك لماذا تمضى السموات في حركاتها الدائرية :
ذلك أن عرش الله -سبحانه- يملؤها بانعكاسات الحب
- سأقول لك لماذا تهب رياح الصباح:
ذلك لأنها تريد أن تعبث بالأوراق النائمة على شجيرات ورود الحب
- إنني لأستطيع أن أفسر لك كل ألغاز الخليقة :
فما الحل الأوحد لكل الألغاز سوى الحب "

الحب حل لا مشكلة، تفسير لا أحجية
البشر هما الي بيخلوه مشكلة وهم ووهم..
في الوقت الي أصلاً ملياهم هموم كتير حقيقية تانية..

المشكلة فينا احنا ، أو في الي بنحبهم
وفي الوقت الي الحب بيفقد قيمته في إنه " سكينة وراحة " مع الحد الي بتحبه ..
بيتهيألي المفروض يفقد كل معانيه أصلاً

مش عارف اذا كنت موقف اني حد ينصحك ولا لأ أصلاً.. ويمكن أكون محتاج أكون عارف رامي يعنى عشان اتكلم معاه
بس مش حاسس غير إني عايز أقلك:

متجبرش نفسك على الكتابة،
وبردو، متجبرش نفسك إنك تعيش في هم
حب عشان تطمن وتفسر الدنيا..

مش تعقدها :)

  قوس قزح

الثلاثاء، 3 يوليو، 2012 8:57:00 م جرينتش+2

فرحت باول كلامك
ان لسه فى حب كده
لكن للاسف اكتشفت كالعادة
ان الحب اللى كده محدش بياخد باله منه


بس تغيب ليه .. هو مش كلنا محتاجين نطبطب على بعض
ليه بنختار البعد وقت فعلا ما نكون محتاجين الناس جنبنا

حبها بس خاليك وسط الناس ..حبها مش هيزيد ولا هيقل ببعدك عنهم

  NaDa

الأربعاء، 4 يوليو، 2012 1:22:00 م جرينتش+2

لا أنا ما أضايقتش

أنا أتقهرت بس!

  gogo!sf

الخميس، 5 يوليو، 2012 4:16:00 م جرينتش+2

رامى اولاً ازيك عامل ايه واخبارك ايه يارب تكون بخير دايما

بص انا مش عارفه اقولك ايه بصراحه

بس بجد اتمنى انك مش تبعد عن التدوين وتهجر بيتك وتسيبه ممكن ترتاح شويه وترجع تانى بس ياريت مش تبعد عن مدونتك يا رامى

انا مش لاقيه كلام اقوله

  mrmr

السبت، 21 يوليو، 2012 8:19:00 م جرينتش+2

تعرف انك وحشتنى بجدووحشت البلوجر كله
بالرغم من انى انا برضه بعيده عن التوين لكن بحاول من وقت للاخر مش ابعد
وكمان وحشنى كلامك الصادق اللى من القلب
انت فعلا اخ وقلب وحبك كبير
ربنا يجمع بينك وبين ملاكك على خير بس بعدها مش تحرمنا من تدويناتك