حاجات تانى8



لستِ الأولى
لم تكونى الأولى فى حياتى
لكن من مروا بحياتى لم أراهم
ليس تقليلأ منهم
و لكن لأنكِ الأبهى
-
لستِ الأولى
لم تكونى أول من يرتاح لها قلبى
لكن أنتِ  منْ قلبى أحبها
و أخذت روحى معها
-
شعور
هو....خلى بالك مش عاوزين نجرح شعور صديقنا
أنا(لنفسى)...أأأه لو تعرف أنا من كتر ما بخاف على شعور الناس
أنا تعبان قد أيه
أنا(ردى عليه)...متقلقش دى أسهل حاجة عندى
-
أفتقاد
بتفتقدينى؟؟؟
زى ما أنا مُفتقدِك!!!!
-
راحة
صديق....أيه اللى بيريحك يا رامى
الوحدة و لا البكاء و لا شيىء تالت مش فاكرة (:
أنا...و لا شيىء من كل دة
اللى بيريحنى
الراحة اللى بأشوفها فى عيون اللى بحبهم
-
موت
ده الموت يعيدك لأصلك .. بس أنت موتك معصلج
ياللى أنت وشك غريب .. ياللى أنت قلبك محاصرك
أنا أخترت الأغنية دى علشان
الكلمة الحلوة اللى قلتها ليا يا صديق قلبى العزيز
اللى أنا مش شايفها فيا  أساساً
-
قهوة
أنا الذى لم يحب القهوة يوماً
أتسائل
هل للقهوة
مذاق خاص
معكِ
معك
أغمض عينى الأن
و أتذوقها
معكِ
معك
أنا الذى لم أتذوقها يوماً
معكِ أو معه
أتذوقها الأن و أبتسم
لأنكم معى دائماً
-
أمنية
أتمنى هذة المرة
أن لا يكون تقديرى للأمر
خاطىء
أتمنى
حتى لا أفقد أخر أنفاسى
-
سؤال
ماما...أخبار صديقك أيه؟؟ أنا بصليلوه
أنا...الحمد لله أحسن بس صلى كمان علشان خاطرى
ماما...حاضر
أنا....(:
-
وجهُكِ


دائماً أتمنى وجهك بين يديا
و أرفع خصلات شعركِ من على عينيكِ
و أضع قبلة على جبينك
و أغمض عينى
و كفى
-
خوف
صديق قلبى العزيز
أنتَ خايف على فرصة ممكن تروح
بس أنا عاوز أقولك متزعلش عليها
فى حاجة مستنياك أحسن أنت عاوزها
متخفش يا صديقى
يمكن مش عاوز أقولك أنك هتسافر و تسيبنى
زى كل اللى أنا حبتهم
بس مادام دة شيىء هيسعدك
هكون فرحان أن أنت سعيد
-
سعادة
صديق قلبى العزيز
أنت حقيقى
مش بتحس بالسعادة اللى بكون فيها
و أنت معايا و بنتمشى
و بنحكى
و بنشرب عصير
و لا عارف و بتستعبط (:
-
حلم
أحلم أنى عندما أموت
و أنا أغلق عيناي
تكونى أنتِ فى حدقة
و تكون أنتَ فى الحدقة الأخرى
و ليكن ما يكون بعد ذلك
-
فاااات
فاااات...فااااات
عمر فاااات
أنت شايف انه فات كتيير و محصلش حاجة
من اللى أنت مستنيه
طب ممكن يعنى أن لو ينفع
تقف شوية يا حبيب قلبى العزيز
تقف و تبص أن ممكن اللى جى يبقى أحسن شوية
حتى لو أن الدنيا مش واضحة
عارفه ليه مش واضحة
أحنا اللى بنخلى الدنيا واضحة أو مش واضحة
و أنت مش عاوزها تبقى واضحة
بس لو ممكن بس تقف تسمعنى
و متضايقش لو الكلام عكس ما أنت عاوز
او تتمنى
لأن الحقيقة
أن أحنا بندور و نفتش في زمن خلاص
خلااااص فااااات
فااات يا صديقى
-
أيـــة
لا تضطرب قلوبكم ولا تجزع"

يا صديقى أنت أكيد قريت الأيه دى كتير
طب أيه طب ليه
أنا مش بلومك و لا بقولك متخفش
ما أنا خايف برضه
أنا زيك و يمكن أكتر
بس عارف اللى أنا فيه دلوقت
أوعى تفتكر انها عدم مبلاة
لأ أنا رميت حملى عليه
أنا مش بأنصحك لأنى أخر حد ممكن ينصح حد
أنا بس بخبط على كتفك
-
أستمعوا
الأن استمعوا لى أنا
أنا الذى لم أكن يوماً أنا
مملوء بأسرار قلبى أنا
و أحزان و أنكسارات أنتم و أنا
بين واقع الأخرين و الحياة و حقيقتى تائه أنا
بكُما أنتِ أنتَ موجود أنا
أتكلم و أتحدث..كل شيىء ينتهى بكُما
 و لا شيىء ينتهى عندى أنا
أحببتكم عشقتكم تمنيتكم أنا
لم أخجل يوماً من محبتى لكما أنا
-
أفكارى
أنت اليوم حيث أوصلتك أفكارك
 وستكون غداً حيث ستأخذك أفكارك
(
جيمس آلان)

عندك حق
غُلُبت أقولهم كدة
 -
مقاومة
بحاول مقاومة الحزن عليكم
و يتحول بس لقوة
أستمد منها
صدق دعائى ليكم دايماً
.
بحاول مقاومة فكرة أنى أموت
و يكون دة بأيدى
.

أيام معك....


أولا أعتذر لكِ يا حبيبتى
لأن هذه التدوينة ستكون لشخص أحبه
و كنت وعدتك أن هذا الشهر لكِ أنتِ فقط
أرجو  أن تعذورينى يا وريد قلبى يا نَفسى الداخل     
.......
برغم الأرهاق الرهيب اللى أنا فيه حالياً لكن لازم أكتب


جوايا مشاعر متضاربة كتيرة جدا جدا جدا
........
تتملكنى سعادة طاغية أشعر معها بالطيران
أشعر بالحزن الشديد يعصر قلبى
الخوف شعور يعترينى بشدة بعد الرجوع
سأبدأ من البدايه
-
أسمع الرنة المخصصة لك قلبى ينتفض من القلق و السعادة
لأنى سأسمع صوتك
تسألنى...رامى أذا كٌنت فى أحتياجك غداً او بعد غد
هل تستطيع؟؟؟
أنا.....أستطيع؟؟!!-سؤال بأستنكار- 
أنا...كيف تسأل هذا السؤال
طبعاً أستطيع
هو...أنتظر منى مكالمة أخرى للتأكيد
تركتنى مع الحيرة و القلق
و لم يطل الأنتظار
رن الهاتف بالنغمة المخصصة لك فينتفض قلبى مرة أخرى
لكن بدرجة أكبر
أسمع صوتك فأهدأ بعض الشيىء
تقول...رامى تستطيع السفر بعد غد
أنا بصوت مسموع .. نعم نعم-بلهفة- أستطيع
فى داخلى...مهما كانت الظروف سأكون معك بعد غد
 صديق قلبى العزيز
-
لن أحكى تفاصيل تضيع معها مشاعرى
تضيع معها السعادة
لكن اتمنى ان كل الخوف و القلق أنه يضيع
-
مش عارف اقولك ايه يا صديقى و لا اقولك يا حبيبى
بكيت معاك و نزلت دموع محبوسة بقالها سنيييييين
مبكتهاش غير على بابا لما اتوفى
مبكتهاش غير معها
أقولك ايه
انتوا الأتنين
انتو ابتنقذونى من نفسى
برغم ان محدش فيكم يعرف التانى و لا هتعرفوا بعض اساساً
و لا حكيت عنكوا ليكم
أعترف يا صديقى أنى ضعيف مكنتش متصور انى هتألم للدرجة دى من ألاااااااامك
-كُنت اعتقد أنى جامع جيد للأحزان
لكن أحزانك مزقتنى-
لما دموعك نزلت قدامى أنهارت تماماً
مقدرتش مقدرتش
بكيت و دموعك تمزقنى
لما حضنتك حسيت بدفا الدنيا كلها
صديقى قلبى العزيز
شكراً لثقتك الغالية جدا جدا جدا عليا
عارف ناس كتير بتثق فيا
لكن ثقتك انت بالذات فارقه قوى معايا
عارف يا صديقى كان نفسى هى كمان تدينى نفس الفرصة دى
أنها تعرفنى أكتر يمكن كانت فى حاجات كتير أتغيرت معايا و معاها
برغم الحزن اللى مالى قلبى عليك
بس قد ايه انا سعيد انى قدرت اكون معاك 3 ايام بحالهم(:
-
شعور الخوف
خايف جدا فى يوم أنى افقدك لأى سبب من الأسباب
لما قُلت لى انك مقدم على الهجرة
معدتى وجعتنى قوى
قلبى دق بعنف دق لدرجة انى خوفت أنك تسمعه
عارف خوفت ليه لأنى عارف أنها هتجيلك
عارف لما قلت ليا انى وشى حلو عليك و حاجات عندك
كانت مكلكعة و مشيت لما عرفتنى
خايف يبقى وشى حلو عليك و تسافر
خايف قوى
-
عارف خايف فى يوم تقولى أنك عاوز تشوف المدونة دى
اللى أحياناً كتير بتكلم عنها
و عن المدونين
خايف تشوف اللى بأكتبه
-
أول مرة الخوف يموت سعادتى قوى كدة
-
لما حضنتك فى البيت قبل ما ننزل اخر مرة قبل القطار
خدت حضن كبيييير يكفينى الأيام اللى جاية
و يشيل الخوف و القلق منى
و علشان انت بتتكسف لما بحضنك فى الشارع (:
-
عارف انا هوقف الرجيم شوية علشان انت قلت ان وشيى بقى أصفر
مكنتش هصدق أى حد غيرك
-
و بعد 3 أيام معاك و بعد عك الرجيم (:
قلت لي ان وشى رد شوية
برضة مكنتش هصدق حد غيرك
حتى مريتى (:
-
صديقة عزيزة من المدونين سألتنى فى الندوة
وقفت على البحر
أستغربت جداً
صحيح دا أنا كُنت فى أسكندرية!!!!
عارف ليه لأنى محستش بالبحر و لا شوفته بالرغم أن أحنا كنا ساكنين جنبة
مسمعتش الموج المرة دى
بجد مش ببالغ لو قلت مسمعتش اى مووج خالص
كان أستمتاعى انى بمشى معاك دة يكفينى
كل مرة بأسندك و انت بتعدى الشارع  
علشان انت بتخاف تعدى الطريق
كان يكفينى
برغم الدوشة اللى كانت حواليا فى الكورنيش مكنتش بأسمع غيرك
علشان كدة مسمعتش صوت الموج و لا شوفت البحر
-
عارف ليه يا صديقى روحت الندوة برغم انك قُلت ليا انى هأتعب
و انا كنت تعبان فعلا و مُرهق
بس انا كان نفسى ارجع للتدوين تانى
و كمان كنت باهرب انى ممكن اكون لوحدى
بأهرب من اللى أنا فيه دلوقت
البكا اللى مش عارف أوقفه
مكنتش متصور أنى هتألم لحد قوى كدة بعدها
مكنتش متصور أنك هتلمس جوايا جروحى قوى كدة
-
عارف ما أرتحتش غير لما كلمت ماما فى التليفون
و بكيت برضه و انا بكلمها
أتخضت هى قوى
بس انا طمنتها و هى استنت عليا لما انا هديت
هى مشفتنيش منهار قوى كدة قبل كدة
هى عارفه انى بتأثر بالناس بس مش بالمنظر دة
سكت و ابتديت اكلمها بكيت تانى و هى بتقلى خلاص يا رامى فهمنى
و انا مش قادر اوقف
طمنتها ان مفيش حاجة تقلقها
و حكيت بدون تفصيل بدون اسماء و طلبت أنها تصليلك
حسيت أنى محتاجها قوى المرة دى
محتاج ان ماما تصلي مش ليا لأ ليك انت يا صديقى
.-.
أنت الوحيد اللى فسرت علاقتى مع ربنا
 لأنك قربت منى و لمستنى


(:
-
و انا فى المترو  و انا راجع من الندوة
الناس ممكن افتكرتنى مجنون
واحد حاطط الهاند فرى فى ودانة و بيخبط راسه فى باب المترو
محدش أتكلم و لا قال حاجة
او ممكن يكونوا أتكلموا و انا مسمعتش
-
عموماً أنا أهدى كتير دلوقت من بالليل
و أهدى كتير بعد مكالمت ماما
-
أخر حاجة قبل ما أقوم
فى كلمة قلتها ليا بس مكسوف أكتبها
برغم انها متكسفشى
بس لما بفتكرها بابكى لأنك شايفها فيا و انا مش كدة
دى حاجة احلى من انها تكون فيا
 -
مش عارف أزاى هأعدى الأيام اللى جاية
مش عارف هروح الشغل أزاى
منتظر مكالمتك القادمة
(: