القــــاهرة


أول مرة أكون فى القاهرة و مخنوق كدة
أيوة أنا بحب القاهرة
بقرفها و زحمتها و رطوبتها
بس عمرى ما أكون مضايق و عاوز أسافر
و بحارب الشعور الفظيع ده
بحب القاهرة
لأنى بشوف فيها كل اللى بحبهم
حتى لو مشفتهمش بس حاسس بيهم
أول مره أكون مخنوق من القاهرة كدة
حتى لوحدى بكون زى حد حواليه كل شيىء
..............

لا فى ماضى أقولِك كان
و لا فاكرُه و لا نسيته
و لا مرة جمعنا مكان
عشان تضغى اللى قسيته
(محمد فوزى)
...............................
مش كفاية
ممكن تحبى نفسك شوية
ممكن .. ):

أرجوكى
......................................
مهما حَصلك
إرمى ورا ضهرك
و ما يهمكش
و ما تدققش

هى الدنيا كدة
مُجهده
و ما تتخدش
غير قفش
(خالد كساب)
............................
لم يكن لى بدايات كثيرة
أنما هى بداية واحدة
لذلك ليس لى بدايات متشابه أو مختلف
و بالتبعية ليس لى نهايات متشابه أو مختلفة

و أرجو نهايتى أن تكون غير النهايات
لأن بدايتى غير البدايات

و أن لم تكن نهايتى ليست كما أتمنى
فأرجو
أن تكون بلا ألم


(دا أنا من وحى أحد كومنتاتى)
..................................

أديك سيبت الشغل
أرتحت يا منيل (:
(دا أنا)
...........................
طب أفرض
أنا ذاكرت و نجحت
و هوا سافر
أسقط تانى أزاى
(سعيد صالح..العيال كبرت)
............................
يا ترى
هى الناس بقت
خفيفة الدم
من كتر الهم...
*
و لا دى رخامة
..............................
أن الكلمات
أقوى العقاقير
التى تستخدمها البشرية

(راديار كيبلينغ)

يمكن
علشان كده
بنكتب !!!
.........................
بَحبِك يا ......
على قد ما بتبعدينى
على قد ما بحبك
.........................
تعبت قوى
تعبت من أنى مش عارف أقولِك أيه
..................

زعلِك.. بيزعلنى
غضبِك .. بيغضبنى
حيرتك .. بتحيرنى
عذابك .. بيعذبنى
فرحتِك بتفرحنى
...................
أنا... مش وحيد
عايش الدرب البعيد
و دق قلبى مش حزين و دق قلبى مش سعيد

شايل ملامحى بين كفوفى
و شوقى خوفى

و حلمى انك تخرجى منى..
تشـــــوفى
عن قريب
أنى...مش عنك غريـــــــب
مش عنك غريب



(هنا بيتكلم مع روحه)
(ماجد الكدوانى..أحد الأفلام الدينية)
(أداء الكلمات باللهجه الصعيدية)

..................................

يوماً عاصف

أسيقظت من النوم و نظرت للساعة
لازال أمامى خمس دقائق للأستيقاظ
كم أكره شعور الأستيقاظ
قبل خمس دقائق

قمت و جلست على السرير
ممسكاً المنبه
حتى مروا الخمس دقائق

و أخذت حمامى الصباحى
و أرتديت ملابسى
وخرجت

أستقبلنى خارجاً
جواً حار
شمس شديدة القسوة
ريح مُحملة بالأتربة

كان اليوم مُبشراً بأنه يوم كئيب

وصلت العمل
جلست بعض تحضير الشاى
أستمعت لترنيمة
بدأت نسبياً أعود

بدأت تصفُح الشبكة العنكبوتية
بدأت بمدونتكم
بأختلافها

بدأت الأبتسامة تعود تدريجياً (:
حتى نسيت الحرارة
و الجو العاصف

هكذا انتم لى


أبتسامة جميلة فى يوماً عاصف (:

22 التعليقات:

  لبنى أحمد نور

الأحد، 19 يونيو، 2011 4:58:00 ص جرينتش+2

ابتسامة صباحية رائقة :)

  Mona

الأحد، 19 يونيو، 2011 10:26:00 ص جرينتش+2

والله أنت شخصية جميلة يارامى وربنا يزيح عنك الهم والحزن يارب - تحياتى العطرة

  شمس النهار

الأحد، 19 يونيو، 2011 10:31:00 ص جرينتش+2

واضح من البوست ان القاهرة خنقتك اوي
:))

بس البوست علي قد ماكلمة من الشرق علي كلمة من الغرب
بس حسيته لخبطة طالعه من قلبك شوية ومن عقلك شوية
وفي فقرات الاتنين اتحدوا فيها

  NaDa

الأحد، 19 يونيو، 2011 1:37:00 م جرينتش+2

:)
كلامك بيبقى مختلف
بيبقى من قلبك أوي ..

يا رب كل يوم تبدأه بإبتسامة
صافية ..

فى يوم صافي :)

  فاتيما

الأحد، 19 يونيو، 2011 2:20:00 م جرينتش+2

المدن زى الستات يا رامى
والأماكن زى البشر


القاهرة ست غجرية
مزعببة وتزهق بلد
بس لو صوتها سكت
تحس بإشتياق لدوشتها
وريحة التراب والهيصة والزحام
لا تطيق عشرتها علطول
ولا تطيق بعادها علطول

اسكندرية ست تنسكن
ولو مقعدتش فيها
ست جدعة وونسة وحمالة هموم


المنصورة ست بسيطة تلقائية
بيتها يساع م الحبايب الف
تحضنك وتشيلك على راسها من فوق
وتسامحك وقت الغلط


اسماعيلية ست شيك
كلاس كدا و هادية
بس لدرجة الملل ساعات
يعنى تنفع تكونلك ملاذ ومهرب

بورسعيد ست عشرية
تاخدك ف دقايق
و تعرف ازاى تخليك متنسهاش
مهما خرجت وبعدت عنها

فين تانى ؟
بنها بلد امى بقى
دى حدوتة تانية

قصره عشان مرغيش كتييييير
القاهرة مزعجة
لكن ونس
:)

عجبنى حكاية الكتابة
دى حقيقة
نحن نكتب على رأى خيخة
لكى نشفى

طب بعد هذوها البوست بقى
انتا جاى التبرع بالدم ولا أولعك ف القاهرة دى ؟!!

آه
مهى متحرمناش منك بقى
يلا قو انك جاى ان شاء االله
او هتحاول الحلوة بتاعتك
اللى لما بتقولها ..بطمن
:)
ماشى ؟

ربنا يطمن قلبك ويريح بالك
يا ر ر

  Haytham Alsayes

الأحد، 19 يونيو، 2011 2:35:00 م جرينتش+2

عارف
انا مخنوق انا كمان
تعالي ننزل اسكندرية في يوم نفك شوية

:)
ابتسامة جميلة في وجهك اللطيف ياصديقي :)))

  حَـبآيـۃْ.بـטּـدۉڷ

الأحد، 19 يونيو، 2011 3:08:00 م جرينتش+2

:)

هِيَّـآ دِي البُوستاتْ عالصُّبحْ ..:)

  Lady E

الأحد، 19 يونيو، 2011 4:03:00 م جرينتش+2

ايه الجمال ده كله

كلمات كتير وصور كتير حسيتها جدا

بعد عودة لمتابعة المدونات سعيدة ان مدونتك كانت اول مدونة اقرأ فيها بوست جميل زي ده

على فكرة لوك المدونة هادي جدا ومريح جدا

  ابراهيم رزق

الأحد، 19 يونيو، 2011 4:49:00 م جرينتش+2

هو مود و ماشى فى البلد
مش حكاية القاهرة او اسكندرية
قد نقيم فى قصر لا نشعر به
و قد نقيم فى عشة لكن سعداء

نحن جميعا نفتقد راحة البال مش عارف ليه

تحياتى

  Tamer Nabil Moussa

الأحد، 19 يونيو، 2011 6:03:00 م جرينتش+2

تعرف يارامى الزحمة بتكون ديما واضحة المعالم فى الصيف ممكن عشان اجازة المدارس هههه

بجد مش عارف لية بس هنعمل اية يارامى لما نزيد شوى كمان


بوست مميز

مع خالص تحياتى

  الازهرى

الأحد، 19 يونيو، 2011 7:38:00 م جرينتش+2

يا ترى
هى الناس بقت
خفيفة الدم
من كتر الهم...
*
و لا دى رخامة
..............................

رخامة


************

عيش وما تفكرش

هتلاقى الدنيا حلوةةةةةةةةةةةةةة

  من كل بستان زهرة

الأحد، 19 يونيو، 2011 8:50:00 م جرينتش+2

أديك سيبت الشغل
أرتحت يا منيل ...وانا كمان :))

مش كفاية
ممكن تحبى نفسك شوية
ممكن....احبها على ايه بس :((

تعبت قوى
تعبت من أنى مش عارف أقولِك أيه...قول أي حاجه بس قول


بص بقى الا القاهره دي اجمل مدن الدنيا بقرفها وزحمتها وجوها الملوث ...اوعى يوم تزهق منها
أعرف واحد اتخنق منها كده من سنين
وسافر علشان يغير جو لحد النهارده مش عارف يرجع لها

:))

  ذو النون المصري

الأحد، 19 يونيو، 2011 9:14:00 م جرينتش+2

انا ايضا احب القاهره لدرجة الجنون
اري فيها كل الدنيا
الكلمة بتاعة سعيد صالح روعة
اضحكتني بشده رغم انها مكتوبه
تحياتي

  Ms Venus

الأحد، 19 يونيو، 2011 9:39:00 م جرينتش+2

ابتسمت فى نهاية البوست


عاوزة الغى عقلى علشان ابطل تفكير وشيل الهم

ينفع ؟

ربنا يسعدك يا رامى

  شيرين سامي

الأحد، 19 يونيو، 2011 11:30:00 م جرينتش+2

:)
رامي انت كمان أي تعليق منك بيكون إبتسامه وسط كلام كتير.
عجبني أوي اللي من وحي كومنت ليك, و كلام ماجد الكدواني كأني كنت بسمعه و أنا بقراه, و طبعاً أغنية محمد فوزي...تُحفه :)
أنا كمان بنسى أي خنقه بين المدونات
بس القاهره حلوه خصوصاً لو فيها ناس بتحبهم.

  givara

الأحد، 19 يونيو، 2011 11:56:00 م جرينتش+2

مهما حَصلك
إرمى ورا ضهرك
و ما يهمكش
و ما تدققش

هى الدنيا كدة
مُجهده
و ما تتخدش
غير قفش
دى جامده اوى
خالد كساب دايما جامد
انت رائع يارامى
بجد موهوب
احسنت
فى انتظار المزيد

  mrmr

الاثنين، 20 يونيو، 2011 11:58:00 م جرينتش+2

كل ده عملتوا فيك القاهره

ربنا يسعدك وتفوق لحسن حاسه بلخبطه جواك

  كلام من قلبي

الثلاثاء، 21 يونيو، 2011 11:26:00 ص جرينتش+2

صباح جميل
في مدونة اكثر من رقيقة

  Carmen

الجمعة، 24 يونيو، 2011 5:20:00 م جرينتش+2

ابتسامة صافية جميلة :) تسلم ايدك بوست رائع

  Tarkieb

السبت، 25 يونيو، 2011 10:58:00 م جرينتش+2

روق يا ريس مسيرها تروق وتحلي يابختك بكايرو واهل كايرو

  sony2000

الجمعة، 1 يوليو، 2011 10:40:00 م جرينتش+2

وانتا كمان لينا
بسمه

وشوكلاتاتك بتخليني مبسوطه
ميرسيييييييييييي:)

  Silver Eyes

الأحد، 3 يوليو، 2011 3:02:00 م جرينتش+2

جميل البوست دا :)
تقدر تقول عليه من وحى خطاريف فاتيما
ياريت تكتب بالشكل دا تانى .

مش كفاية
ممكن تحبى نفسك شوية
ممكن .. ):
..
:(
بحاول بقالى سنين !
...
أن الكلمات
أقوى العقاقير
التى تستخدمها البشرية

(راديار كيبلينغ)

يمكن
علشان كده
بنكتب !!!
..
أكيد .
...
هكذا انتم لى
:) :)
تقريبا دا اللى بعملوا كل ما بكون فى موود مش مظبوط
معظم الوقت
ويمكن انا جيت قريت البوست دا متأخر عشان دى :)
..
يارب تكون بخير يا رامى.