كُنت بحلم .....

بقالى فترة كبيرة مش عارف أكتب أى حاجة
يمكن مُحبط
يمكن مش عارف
يمكن يمكن ...يمكن
بس أكيد أنا عارف ليه
بس... بأهرب من ده

عموماً فكرت أكتب و جاتلى فكرة البوست
لما روحت أصحي بيبو من النوم
بيبو مين ؟؟!!

بيير حبيب قلبى أبن أختى (:

فى حلمين أستمروا معايا فترة كبيرة من عمرى
بس الأولانى يمكن من أنا و صغير
و التانى بعد وفاة والدى الله يرحمه
و مستمرش كتير

الحلم الأول
كنت دايماً ألاقى طفل جميل جداً فى الحلم
كنت أول ما بشوفه فى الحلم برتاح جداً نفسياً
و أقوم من النوم و أنا سعيد جداً
بعد فترة بقيت لما أشوفه فى أى حلم
أُدرك أنى بأحلم و مش عاوز أقوم من النوم
فضلت أحلم بيه حتى بعد وفاة والدى
لغاية مبقاش يجى فى الأحلام
تقريباً حس أن بيبو جى (:

الحلم التانى
دة مرتبط بوالدى بعد وفاته بالأدق
كنت أحلم بيه و هو بيخبط باب الشقه
و دايماً كُنت أعاتبه
أزاى يمشى و يسبنا
و أحياناً كُنت بزعق
و كأن فكرة موته مش قادر أصدقها
يمكن دة شعور طبيعى بعد الوفاة
بالرغم من أنى مكنتش مرتبط أرتباط رهيب بوالدى
بس أكيد الوفاة كان شيىء صعب وقتها
بس الحمد لله يمكن مخدش الحلم دة وقت طويل
أة بقيت بحلم بوالدى الله يرحمه من وقت للتانى
بس بصيغة مختلفه للحلم
بصيغة أهدى

على فكرة أنا متابع المدونات يمكن مش بأنتظام
بس بتابع يمكن مش عارف أعلق
شكراً لكل اللى بيتابع و اللى بيعلق
و اللى مبيعلقش (:

دايماً منورنى



26 التعليقات:

  mrmr

الأحد، 1 مايو، 2011 12:31:00 ص جرينتش+2

حمد الله بالسلامه يا رامى

  الحــب الجميـــل

الأحد، 1 مايو، 2011 12:33:00 ص جرينتش+2

الله يرحمه الوالد يا رامى ودايما فكره بكل الخير والكلام الجميل

كلنا فى حالتك عايزين نكتب ونتكلم بس مش بنلاقى كلام نعبر بيه
يمكن هروب
او ملل
او ضيق
او او ....

فتره وتعدى يا رامى ان شاء الله

ربنا يخليك بيبو الامور ويحفظه يارب
ونفرح بيك كمان ونشوف عيالك بأذن الله

خد بالك على نفسك ومتحملش نفسك فوق طاقتها

امسك القلم وشخبط واكتب كلام واقطعه واكتب تانى وتالت ورابع
مش مهم تنشره
الاهم انك تطلع اللى جواك ولو بكلام مش منظم ولا مرتب


ربنا يعينك ويسعد قلبك الجميل يا رامى

اختك ايمان

  مدونة مفيـد

الأحد، 1 مايو، 2011 1:05:00 ص جرينتش+2

براءة الأطفال هي سر العدة كم هو جميل بيبو أكيد أنه يشبه خاله

و أخيرا اتمنى لك احلاما سعيدة بعيدة عن كل شر و بلاء

  محب روفائيل

الأحد، 1 مايو، 2011 1:27:00 ص جرينتش+2

3ady ya 3am romio , ana keda bardo . mosh 3aref atkalem and el e7bat maleeny :):)
el mohem enta 3amel a ?

  Tears

الأحد، 1 مايو، 2011 1:44:00 ص جرينتش+2

حمدلله على سلامتك

عايزاك تسلملى على بيير و تقوله انى مبسوطة انه كبر عن الصورة اللى كنت حاطتها على جنب المدونة :)

  sony2000

الأحد، 1 مايو، 2011 3:27:00 ص جرينتش+2

منوررر مدونتك

وانا كمان منوره فيها

شوفتني وانا منوووور:)

يلا ارجع البلوج كلو يبنادي:

الشعب
يريد
عووده
راااامي:))))))))))

  لـــولا وزهـــراء

الأحد، 1 مايو، 2011 3:31:00 ص جرينتش+2

ربنا يعزك يا سامي ويخليلكوا بيبو كميلة خالص ربنا يحميه ويسعده ويسعدك انت كمان
انا مش بحب اشوفك منعزل عن الناس وف الوقت ذاته مقدرة حالتك ربنا يساعدك (:
لولا

  خواطري مع الحياة

الأحد، 1 مايو، 2011 12:50:00 م جرينتش+2

الله يرحم والدك

مااقدر اقول شي عن الاحلام لاني مش مفسرة احلام
وماافهم بالاحلام

ربنا يبعد عنك الهم والغم ويسعدك ويوفقك
وترجع وتكتب احسن من الاول

تقبل مروري ^_^

  re7ab.sale7

الأحد، 1 مايو، 2011 2:11:00 م جرينتش+2

حلو بييير كتير
احنا كلنا بنمر بحاحات بتخلينا مش بنعرف نعمل اية
بس بنكون محتاجين وقت مع نفسنا اكتر
واحيانا مع اللي حواليانا
الانسان دايما متناقض ف مشاعره واحاسيسه
وانت انسان حساس اووي من يوم ما عرفتك بجد وانا كتير بحس انك مشابه لي في بعض الاشياء
عموما دايما بتمني لك الخير وبدعي لك
ربنا معاك
مش مهم تعلق
بس المهم تطمنا

  Haytham Alsayes

الأحد، 1 مايو، 2011 3:09:00 م جرينتش+2

كلنا بنحلم يارامي
وكلنا عندنا احلام نفسها تتحقق
يمكن مش بتتحقق دلوقت بس يمكن يمكن تتحقق بعد كدة
بلاش اكتئاب ارجوك بقول الكلام دة لنفسي وليك يارامي :))

علي فكرة انت وحشني جدا ونفسي اننا نتكلم وقت كبير
ان شاء الله قريب

عدى ورا ضهرك يارامي وبص لمستقبلك

تحياتي يارامي ياجدع

  MR.PRESIDENT

الأحد، 1 مايو، 2011 8:39:00 م جرينتش+2

طب كويس يا معلم رامي إنك بتحلم
أنا مش بحلم
وحلمت ممكن يبقي كابوس أصل انا راجل
أكووووووووووووووووووووووول
وبكرش كمان .
المهم
الفراق شيء صعب
بس بعض فترة سبحان الله بنبدأ ننسي وتخيل لو مكناش بنعرف ننسي كانت حجات كتير هتبقي مؤلمه

المهم برضوا انا زي حلاتك مش متابع باستمرار بس علي الخط ومش بعلق :)

  كلام من قلبي

الأحد، 1 مايو، 2011 8:58:00 م جرينتش+2

حمدالله على السلامة
انا كمان بعد وفاة بابا الله يرحمو
كنت تير بحلم انو مش ميت وانو راجع تاني
ودا كان ردة فعل طبيعية اني مش مصدقة انو مات خلاص واني مش هشوفو تاني

  Ms Venus

الأحد، 1 مايو، 2011 10:54:00 م جرينتش+2

تعرف يا رامى

انا كمان فى كام حلم كده بيتكرروا معايا كتير

مش لاقية تبرير لده


مش مهم التعليق فى المدونات

المهم انك بخير

متغيبش بس علشان تطمنا عنك دايما

ربنا معاك

  صوت من مصر

الاثنين، 2 مايو، 2011 8:44:00 ص جرينتش+2

ياه يا جدع
احلامك غريبة جدا جدا

  ابراهيم رزق

الاثنين، 2 مايو، 2011 11:12:00 ص جرينتش+2

الحلم هو الحياة الاخرى التى نعيشها

لو بطلنا نحلم نموت

تحياتى

  غير معرف

الاثنين، 2 مايو، 2011 8:00:00 م جرينتش+2

ثقافة الهزيمة .. العتبة الخضراء‏

و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار.

و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير. ..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!

باقى المقال ضمن مقالات ثقافة الهزيمة بالرابط التالى www.ouregypt.us

  hana

الخميس، 5 مايو، 2011 5:51:00 ص جرينتش+2

أنا عندي إحساس قريب من ده مش عارفة ليه
كل اما باكتب اسيب كل اللي باكتبه بس ع الورق
كمان الحلم نفسي أعرف معنى تكرار حلم ايه
مستنيين كلماتك الحلوة رامي
نسيت أقولك ازيك وحشتني:)

  sara adel draz

الخميس، 5 مايو، 2011 2:11:00 م جرينتش+2

اوقات لما بنحتاج حد اوى
بنحس انه معانا فى كل حاجة بنعملها
وبنتخيله معانا فى كل مكان
..
بس فى النهاية الحقيقة بتفضل واضحة
وحقيقة الموت اوضح من الشمس
ربنا يصبرك
..
وكل واحد فينا جواه طفل
بس اهم حاجة انه ميموتش الطفل ده حتى لو بقى عنده 60 سنة

  الازهرى

الجمعة، 6 مايو، 2011 1:29:00 ص جرينتش+2

شوف يا رامى افندى

انت تحمد ربنا وتبوس ايد وش وضهر
انا الحلم اللى معق معايا وغير شخصى
هو الحب بصورة غريبة
باحلم ان على اول قرية جنبنا على الطريق السريع وفى العصر الحديث بس باسلحة زمان وعلى الرغم من ان معايا ناس كتير إلا إن العو اكبر بكتييييييييييير بس دايما باصحى قبل النهاية ومش فاهم حاجة

لو فاهم بلغنى

  اغانى الشتاء

الجمعة، 6 مايو، 2011 1:09:00 م جرينتش+2

يااااااااااااااااااااااه كفارة يا راجل
مشفتكش من زماااااان جدا و الله ليك وحشة
انا كنت بحلم كل يوم بخالى بعد ما اتوفى و كان حلم فظيع بلاش احكيهولك احسن
و جدتى انا اتوفت حلمت بيها بس جدى اما مات ليلة راس السنة اللى فاتت محلمتش بيه معرفش ليه
مشكلة الاحلام انها بعد اما بتخلص بتفضل موجودة معانا فى الواقع واحنا صاحيين

  طالبة مقهورة ..درجة أولى

الجمعة، 6 مايو، 2011 1:45:00 م جرينتش+2

:)

حمد الله ع السلامة..كان نفسي اوي اكلمك واشوفك يوم سيتي ستارز والله..بس محصلش نصيب وكنت مرهقة جدا يوميها ومطبقة ومقدرتش اروح ..
معلش هتتعوض..بعد امتحاناتي اكيد

انا معنديش احلام كتير بتتكرر
لاني اصلا مبنمش اكتر من 5 ساعات
فعقلي ذاكرته مبتسجلش احلام ف الفترة ديه يدوبك :D

  تامر نبيل موسى

الجمعة، 6 مايو، 2011 10:17:00 م جرينتش+2

ازيك رامى

اخبارك اية

ربنا يرحم السيد الوالد

ويخلى ليكم الامور الصغير

رامى صحيح انا مختلف ازى

وضحها ليا

مع خالص تحياتى

  مونتي بوكيه ورد

الأحد، 8 مايو، 2011 6:37:00 م جرينتش+2

حلو اوي الاحساس حتي وانت محبط ومش لاقي كلام و يتفك كل دا مع اول ابتسامه من بيير .. جميل اوي مع الموسيقي الحالمه ال عندك لايقه اوي وبتخلينا نعيش احلي احساس معاها .. انا مش بعلق كتير ممكن غصب عني ممكن عشان نفسي اليوم يبقي 420 ساعه بس المهم ان مش بنسي ابداً ال بحبهم و انت منهم يا رامي
كلنا بنتعلق باعظم أب و لينا حق نشوف الدنيا بلون تاني لان الدنيا بعدهم بتبين معادن ناس كتير منهم ناس بجد متستاهلش مننا غير الكره ال محدش ربانا نشيله لحد .. ربنا يرحمهم يارب و يوسع قبورهم و يرزقهم الجنه يا ارحم الراحمين و يجعلنا الابن الصالح ليهم ندعيلهم ويستجاب مننا و نسعدهم بنجاحنا وحبنا و ترابطنا يارب

  norahaty

الأحد، 8 مايو، 2011 9:05:00 م جرينتش+2

ألم يحن الوقت
بعد لك تعود
للكتـابة؟

  موجة

الاثنين، 9 مايو، 2011 9:09:00 ص جرينتش+2

انا معاك فى احلام بنحلم بيها واحنا اطفال وبتفضل مستمرة لحد مانكبر ونعجز زيي كده
وفى احلام بتبقى مرتبطة بحالة معينة وكل ما تفتكر الحالة ترجع تحلم بنفس الحلم
وده كله بسبب عقلك الباطن
اشغله بحاجات حلوة تحلم بيها
يعنى صينيه بطاطس باللحمة او حلة محشى وفراخ مشوية
اى حاجة تخليك فرحان يعنى
وحشتنا اوووى يا رامى بجد

  Timo..

الثلاثاء، 10 مايو، 2011 3:37:00 م جرينتش+2

عارف يا رامي..
انا ما اقدرش انام في يوم من غير ما احلم..
بس كلامك ده فكرني باحلامي (القديمة)..!!

يا رب ايامك كلها سعادة يا رميو يا جميل :)