علشانِك النهاردة الدُنيا كارت مُعايدة ....يا ماما (:

كل سنة و أنت طيبة
يا أمى

كل سنة و أنتِ مجمعانا حواليكى
كل سنة و أنت بصحة و عافية
كل ثانية و ربنا معاكى
كل سنة و أنت مستحملانى
كل سنة و يارب خلينى مزعلهاش

بالرغم من أنى بزعلها ):

يمكن ميكُنش فيه قصة رهيبة
حتى لما والدى توفى
الحمد لله برغم الوجع النفسى لفترة
بس ربنا كان دايماً معانا
بس زى أى حد فى الدُنيا
الأم بيكون ليها تأثير على أولادها

أمى
كانت و لازالت ليها الأثر الأكبر فى حياتى
هى اللى خلتنى أقدر أحب كل شيىء حواليا
حتى لو كان سيىء

مش أستكانه أكتر منه حب ممكن يكون مالى القلب

أمى
مع كل حاجة كُنت بأشفها صعبة
كانت بتبان قوية

أمى
برغم أنى أحياناً كتير بنختلف
لكن لما بزعل و أحس أنها بتحاول ترضينى
بتكون لحظة صعبة جداً جداً جداً عليا
علشان بأحس أنى خليتك تبقى زعلانه على زعلى
يمكن مش عارف أوصف

أمى
بحبك

دة شيىء أكيد
و حبيت الترانيم علشان كُنتِ بترنميها بنفسك (:

أمى
عارفة
فى مرة سألنى واحد صاحبى
جبت أيه هدية لمامتك يا رامى
بصيت له و أنا رافع حواجبى
و قلت
هدية؟؟؟!!!!

أنا أضخم هدية جتلها
ربنا يكون فى عونها (: (:
طبعاً أنا كُنت بقولها و أنا بهرج
بس أنا عارف آد أيه
هى هتكون سعيدة و أحنا سُعداء

دى فرحتك عارف

مامت بيبو و ماروسكا
أختى العزيزة
كل سنة و أنت طيبة
ما أنتِ بقيتى ماما خلاص (:
عارفة هقولك سر
مش عارف ليه أنتِ الوحيدة اللى كان نفسى
تبقى أول واحدة تعرف أنى بحب

كل مامات بلوجر (:
كل سنة و أنتم طيبين
و يارب دايماً مبسوطين
الأغنية ليكم كلكم
و كل ماما عارفه نفسها (:
و كل اللى مش ماما
يا رب تبقى ماما قريب (:

20 التعليقات:

  safa7_karmooz

الاثنين، 21 مارس، 2011 4:37:00 ص جرينتش+2

كل سنة ووالدتك طيبة وكويسة ومبسوطة دايما :)

  re7ab.sale7

الاثنين، 21 مارس، 2011 8:01:00 ص جرينتش+2

يا اول حب ف حياتي
ياااااة
مهما قلت متقدرش تقول كل اللي جواك
بحمد ربنا علي ان ماما معايا وبحسد نفسي عشان في كتير حواليا محرومين من الاحساس ده
رامي
الاغنية دي من اغاني الطفولة اللي منسيناهاش ابدا ولا هننساها لان مفيش ولا اغنية عملوها حسستني بالاحساس ده
حمد الله بالسلامة يا رامي ...
صباحك ورد

  Baskouta

الاثنين، 21 مارس، 2011 8:38:00 ص جرينتش+2

صباح الخير يا رامي
ازيك
كل سنة ومامتك طيبة وبخير وبصحة
ربنا يخليهالك
وتفرح بيك

البوست رقيق اوي
وضحكت اوي لما لقيتك بتقول انك اضخم هدية ممكن تكون جاتلها
اصلك تاني حد اسمعه يقول كدة
بجد خليتني ابتسم اوي
ميرسي على الابتسامة

تحياتي ليك ولمامتك وكل الماماهات
بسكوتة

  Mona

الاثنين، 21 مارس، 2011 9:45:00 ص جرينتش+2

ربنا يخليكوا لبعض يارب

  من كل بستان زهرة

الاثنين، 21 مارس، 2011 12:58:00 م جرينتش+2

كل سنة ووالدتك طيبه يا رامي
ويارب يحفظهالك
ودايما تفضل منوره حياتك

ويارب انت كمان تبقى اب وولادك يطلعوا عينك كده زي ما انت عامل مع ماما

عيد ام سعيد وجميل عليك
ودي هدية تديها لماما سامع
http://fashionbride.files.wordpress.com/2009/08/mstewart-2.jpg

  طالبة مقهورة ..درجة أولى

الاثنين، 21 مارس، 2011 12:58:00 م جرينتش+2

:)

كل سنة وكل المامات طيبين وراضيين عننا

  لـــولا وزهـــراء

الاثنين، 21 مارس، 2011 5:49:00 م جرينتش+2

أنا أضخم هدية جتلها
ربنا يكون فى عونها (: (:

" اضخم ولا احلى !!!:d... كل سنة ومامتك دايمة بخير وسعادة ويهديك يا سامي يا ابن ام رامي ومتضايقهاش وتبطل تزعلها "
لولا

  gogo!sf

الاثنين، 21 مارس، 2011 6:16:00 م جرينتش+2

رامى كل سنه ومامتك واخواتك طيبين
وكل عيد ام وكل الامهات بصحه وسعاده يارب

وكل سنه وانا بقى طيبه ايه ده مش ام انا ولا ايه

مش تغيييييييييييب تانى
انا بعت لك رساله على الفيس انا وزوجى العزيز للاطمئنان عليك
يارب تكون بخير دايما
جوجو

  мαησηα

الاثنين، 21 مارس، 2011 6:40:00 م جرينتش+2

والله انت عثل يا رامى

كل سنة وانت احلى هدية لمامتك

ويارب يخليى كل المامات اللى ف حياتك ينور قلبك وعمرك يارب اللهم امييييييييين

  Ms Venus

الاثنين، 21 مارس، 2011 7:04:00 م جرينتش+2

كل سنة ومامتك بكل خير يا رامى

وكل سنة وكل الامهات بكل خير وسعادة


وحمدلله على السلامة متغيبش تانى

  Tamer Nabil

الاثنين، 21 مارس، 2011 7:53:00 م جرينتش+2

ازيك يارامى

اخبارك اية


كل سنة وكل الامهات طيبين بخير


الام هى الحب الحقيقيى فى حياة كل انسان

مع خالص تحياتى

  همسات وبحــ الحياه ــر

الاثنين، 21 مارس، 2011 9:53:00 م جرينتش+2

رااااااامى ازيك
بجد وحشتنى المدونة كتييييير ووحشنى الرغى فيها
طبعا اكيد لسه فاكرنى ^_^
ربنا يسعد اوقاتك
ماما قولها كل سنة وانت طيبة

  mrmr

الثلاثاء، 22 مارس، 2011 12:12:00 ص جرينتش+2

كل سنه وماما طيبه
ربنا يخلهالك ويباركلك فيها
وتحيه لكل ام شهيد
ويارب ابقى جده بسرعه ههههههههه
واحفادى يجوا يقولولى كل سنه وانتى طيبه يا تيته
يالهووووووى
معقول ح يجى عليا اليوم اللى اشوف احفادى هههههههههه

  sony2000

الثلاثاء، 22 مارس، 2011 5:50:00 ص جرينتش+2

بجد

احلي هديه من ربنا لينا

ماما:)
ربنا يخلي كل ماما لينا يارب

  شيرين سامي

الثلاثاء، 22 مارس، 2011 7:36:00 م جرينتش+2

رامي وحشتني بوستاتك اللي كلها احساس و صدق :)
كل سنه و كل الأمهات طيبين بما فيهم أنا :) و عجبني معايدتك لأختك فكرتني بأخويا أول واحد عيد عليا
انت فعلاً أكبر هدية جت لمامتك ربنا يخليكوا لبعض
تحياتي ليك

  Noha Saleh

الثلاثاء، 22 مارس، 2011 8:00:00 م جرينتش+2

ازيك يارامى
كل سنة ومامتك طيبة وكل الامهات بخير احنا بنتعبهم كتير بس برضه بنحبهم اوى
سامحنى على تقصيرى

  كلام من قلبي

الأربعاء، 23 مارس، 2011 7:39:00 م جرينتش+2

كل سنة وهمة طيبين
وربنا يخليهم لينا كلهم يا رب
ويديم لمتنا عليهمم

  جايدا العزيزي

الأربعاء، 23 مارس، 2011 8:11:00 م جرينتش+2

ازيك رامى

كل سنه ووالدتك بخير

وكفايه حبك واحساسك

دى هى اجمل هديه

ربنا يخليها ليك يارب

تحياتى

  Silver Eyes

الخميس، 24 مارس، 2011 6:19:00 م جرينتش+2

كل سنة وهى طيبة ودايما منورة حياتك يارب
ربنا يخليهالك :)

....
فينك بس كدا بقالك كتير
يارب تكون بخير
:)

  emymony

الثلاثاء، 29 مارس، 2011 1:08:00 م جرينتش+2

ربنا يخليهالك يارب
كلامك حاو اوى
وتعبير صادق
واحساس واصل لكل قلب كأنه بيتكلم عن امه