مبتنساش

طبعا انا مكتبتش اى حاجة هنا من انبارح
علشان انا كُنت فى قمة حُزنى
صحيح صحبى جالى و قالى يا رامى انت متزعلش
انت المفروض تفرح ليهم
بس طبعاً مش قادر
أنا مش غضبان أنا حزين جداً و موجوع جداً
طبعاً ناس كتير كتبت و نزلت بوستات
أنا مش هأكتب عن اللى حصل
أنا هنا معزووول تماماً بأعرف منكم كل حاجة
و ناس اتكلمت فى الموضوع كتيير
و ناس قالت طب ليه مكنش فى حماية ما هو دة كان معروف من فترة
الفترة دى كانت من امتى
أصل انا من ساعت ما وعيت ع الدُنيا
و فى حراسات ع الكنايس
طب ليه هو مش عادى يعنى و لا فى ايه
طب ليه مفيش حرسات ع الجوامع
انت هتدلع يا عم رامى
هو كمان بنحرُسكم و بتسأل
أيوة بسأل بتحرسنى من ايه من ساعة ما اتولدت
هو علشان انت مطمن ليا
و انا لأ
و لا ايه ؟؟
دى فضفضة للى بيفهم
للى حاسس انى مُتعصب يبقى اسف ليه
طب ياربى انت قولت لو نسيت الأم رضيعها
أنا لن أنساكم
مهما كان انا واثق فيك

30 التعليقات:

  فاتيما

الأحد، 2 يناير، 2011 12:52:00 م جرينتش+2

بالعكس يا رامى

انا مش شيفاها تعصب بالمرة
شايفة اننا المفروض
نحمى بعض من حد تالت غيرنا
لكن للأسف مبيحصلش
بسبب تدخلات المستفيدين من الفرقة
وعاوزينا دايما كدا
فريقين خايفين من بعض



ربنا يصبركم
وقلوبنا معاكم


كان نفسى لما آجى هنا
اقول كل سنة وانتا طيب
لكن للأسف
لا السنة ابتدت عدلة
ولا حد قضى العيد .. طيب

خالص ودى
يا ر ر

  richardCatheart

الأحد، 2 يناير، 2011 12:57:00 م جرينتش+2

قلبى معاك وعندك يا رامى

صحيح موجوع بس بردو معاك وانت فى وحدتك

طبعا معاك فى كلامك ولا الوم عليك حرف

بس الجوامع مابيتحطش عليها حراسه

علشان يبان اللى انت شايفه وحاسه

ونوصل لدا للاسف فى النهايه

المره دى فعلا مافرقتش الانفجار كان اؤدام الاتنين الجامع والكنيسه
واخد الاتنين المسيحى والمسلم
وهايفضل كده يشيل فى الكل

ربنا يصبرك ولازم تتاكد ان الناس العاديه اللى زينا مابيفكروش كده والكل بيفرح ويسهر ويخرج مع بعضه
ناس من المسلمين اللى اتوفو كانو واقفين اؤدام الكنيسه مستنين اصحابهم
وفى ناس كانو وقفين مع اصحابهم

ربنا يلطف بينا وياعالم الضربه اللى جايه شكلها ايه

  Haytham Alsayes

الأحد، 2 يناير، 2011 1:08:00 م جرينتش+2

اتصدق انا كنت بفكر في كدة من كام يوم وانا معدى علي الكنيسة اللي في الشارع عندنا بقول حراسة عليهم والمساجد لا
عارف
هو الوضع غلط كله
وانت عارف رأى في كل دة
العيب في المنظومة ياصديقي
المنظومة اللي بتدخل حياتنا بشكل غلط جدا
من اول ماتقوم من النوم لغاية ماتنام تاني
في الاكل
المعيشة
الافكار
المواصلات
اخلاق الناس اللي تدهورت
الكبت
الطغيان
كله مؤدى لنتيجة واحدة اللي شفناه امبارح
وعارف متوقع المزيد من السوء علي جميع المستويات
بص من النهاية
وجهان لعملة واحدة
الطغيان = تطرف
وربنا يستر علي البلد دي
تقبل عزائى
حسبنا الله ونعم الوكيل

  amiralcafe

الأحد، 2 يناير، 2011 1:16:00 م جرينتش+2

رغم اني مش مصري لكن الذي صار في تلك الليلة حزني برشا حين سمعت بل حين قرات الخبر في مدونة venus
في الصباح ذلك اليوم
رغم الداء والاعداء سوف نصلي نذهب الى المعابد لان الرب معنا
رؤوف

  من كل بستان زهرة

الأحد، 2 يناير، 2011 1:18:00 م جرينتش+2

عارف يارامي نفس السؤال كنت بسأله للحواليه من وانا صغيره
ليه الكنائس عليها رجال امن
ولحد اليوم مستغربه؟؟؟؟؟؟؟؟

الي حصلنا امبارح ده رعب
مش قادره اتخيل ان تكون صحبتي معاهم واسمع انها ماتت وهي خارجه من صلاتها
بس للأسف الكلام انتهى خلاص

ربنا يرحمنا جميعا
وحسبي الله ونعمه الوكيل

  Tears

الأحد، 2 يناير، 2011 1:50:00 م جرينتش+2

بص يا رامى انا ح قولك رايي و انت عارف كويس انى لا متعصبة و لا حاجة ده انا حتى مش خالصة من العالم اياهم

المهم...اللى حاصل فى مصر سببه الديكتاتورية و الاستبداد بالحكم لان ببساطة التطرف اللى سمح بيه فى القنوات و الزوايا و الجامعة و ملصقات الشوارع و فى اماكن كتير اوى هو النظام السياسي عشان يلهى الناس و يخليهم يمسكوا فى بعض بدل ما يطالبوا بحقوق و حرية

و برضة نفس النظام ده هو اللى بيسمح للقوى الخارجية تعمل اللى هى عايزة بمزاجه و اوعى تصدق ان الامن ما كانش يعرف يمنع اللى حصل لان اصلا القاعدة ارسلت تهديد صريح و نشر فى الصحف من شهرين و حددوا اليوم و الاماكن المستهدفة و برضة ما كانش فيه امن متواجد

طيب مالفتش نظرك ان قبلها فى حادث انهيار مصنع اسكندرية سابوا الناس تتبهدل و يادوب بعد سبع ساعات راحت الاسعاف بينما فى حرائق غايات اسرائيل كانت مصر اول يد تساعدهم

طيب بلاش

شفت ازمة السكر اللى كانت فى اسرائيل الشهر اللى فات فمبارك امر بارسال المخزون بتاعنا ليهم عشان السعر عندهم ما يغلاش و النتيجة ان الناس فى مصر اتبهدلت و مالقتش سكر

شفت الغاز اللى بيتباع بسعر باقل من سعره العالمى لاسرائيل و بنخسر فى تمنه و النظام رافض ينفذ حكم المحكمة بايقافه

شفت تصريح نتنياهو ان مبارح اهم صديق لاسرائيل؟

كل ده مش بيفهمك اى حاجة؟

تصريحات رئيس المخابرات الاسرائيلى السابق فى مذكراته المنشورة

''''لقد تطور العمل فى مصر حسب الخطط المرسومة منذ عام 1979. فقد أحدثنا اختراقات سياسية وأمنية واقتصادية فى أكثر من موقع، (((( ونجحنا فى تصعيد التوتر والاحتقان الطائفى والاجتماعى لتوليد بيئة متصارعة متوترة دائماً ومنقسمة إلى أكثر من شطر ))))" ~ عاموس يادلين (( رئيس المخابرات العسكرية الإسرائيلية السابق ))...

ياريت نربط ده باعترافات الجاسوس المصرى الاخيرة اللى قال فيها ان اسرائيل لها عملاء فى مناصب مهمة عندنا و بتبث فتاوى متطرفة و تساعد على تغذية الارهاب و بتمولة و الدليل ان الاحصائيات بتقول ان القاعدة قتلت من المسلمين و العرب اكثر من غيرهم و لم يحدث ان قاموا بتفجير واحد ضد اسرائيل او يهود

الداخلية همها تأمين النظام السياسي و بس

و طول ما الشعب ده او جزء منه بيايد الحزب الوطنى و بيحشدوا عشانه فى كل انتخابات طول ما ح نفضل فى كده و ماحدش ح يبقاله سعر لا مسيحي و لا مسلم

و اعتقد التزوير من اجل انجاح النائب عبد الرحيم الغول اللى تسبب فى كارثة نجع حمادى العيد اللى فات ابلغ رسالة ان ماحدش له سعر و لاحظ ان لسه لم يعاقب حد من الجناه فى نجع جمادى بينما مثلا فيه قضايا اخرى كان الحكم فيها سريع جدا

استنتجت حاجة....فهمت؟

على فكرة قله من المسيحيين فهموا امبارح ده اخيييييرا و عشان كده لما الانبا يؤانس بدأ فى توجيه كلمة شكر لمبارك بعض الشباب كانوا ح يضربوه و اسأل اللى كان حاضر و شاف

  الحــب الجميـــل

الأحد، 2 يناير، 2011 2:28:00 م جرينتش+2

رامى العزيز
وبقولها من قلبى
انت فعلا عزيز عليا وعلينا كلنا
ومن يوم ما شفتك فى اللقاءات
وانت فعلا اصبحت أخ وصديق أعتز بيه

رامى
دا مش تعصب واحنا فهمينك كويس
كويس جدااا كمان

والله لو اقولك اد ايه قلبى وجعنى لما سمعت بالخبر

تخيلت نفسى كأم وبنتى طالعه تصلى ويحصل اللى حصل دا
قلبى يوجعنى واتألم لاى أم

منهم لله كسرو فرحتنا بالسنه الجديده

وعلى فكرة زى ما قالت مارو
الكنيسه فعلا ادمها جامع
يعنى الانفجار حصل ادام الاتنين

انت مش متخيل ادام بعض ازاى
الوش فى الوش والله

الشارع دا بنعدى منه دايما ومش متخيله ازاى ممكن اعدى منه ودم الابرياء كان عليه

رامى
الكارئه اللى حصلت متخصيش ديانه بعينها
تخصنا كلنا والله
لاننا شعب واحد
وهنفضل شعب واحد
مهما حاولوا يعملوا

هنفضل شعب واحد
هنفضل شعب واحد

ربنا معاكم ويصبركم ويصبرنا كلنا يارب

حسبى الله ونعم الوكيل
حسبى الله ونعم الوكيل
حسبى الله ونعم الوكيل

تقبل عذائى

  لـــولا وزهـــراء

الأحد، 2 يناير، 2011 2:51:00 م جرينتش+2

رامـــــــى
***********
من حقك تحزن ومن حقنا احنا كمان نحزن على كل حاجه حلوه بتنهار
يمكن الكل بيكتب ويقول اللى بيحصل وبيتابع لكن احب اقولك انى فى قلب الاحداث لانى تقريبا اقرب حد من اللى بيكتبوا لما حدث اقصد قرب مكانى ..

هاقولك على حاجه يا رامى انا جنب البيت عندى كنيسه كبيره من فتره حصل فيها حريقه اللى اتصل بالمطافى واللى قلب الدنيا كانوا مسلمين احنا لما اتحركنا يومها مش كان عشان احنا ايه وهما ايه لكن اتحركنا لان اتولدنا لاقينا الكنيسه جزء من حياتنا نسمع الجرس فى المناسبات والاعياذ او نسمع الجرس حزين فى الجنازات مش هاقول انا مسلمه وانت مسيحى انا باقول احنا ولاد بلد واحده حد عاوز يدمر البلد دى ومش عارف يدمرها ازاى فقال هى فتنه صغيره كده وكله يبقى دمار فى دمار ....

مقدره نفسيتك اوى وحاسه بيك ومهما قولت لك مش هالاقى اى كلام هاقوله
على فكره الكنيسه اللى حصل امامها الحادث انا دخلتها كذا مره وفى مناسبات كتير والمستشفى اللى فيها اعرف ناس مسلمين عملوا فيها عمليات كبيره
يا رامى احنا فى الاخر اخوات
الدين ده لربنا وهو اللى عالم ومطلع على اللى فى القلوب لكن مصر دى بلدنا كلنا واقسم بالله اللى حصل مش مفرق بين مسلم او مسحيى اللى مقصود مصر وبس

ربنا يستر ها

اختك زهراء

  Ms Venus

الأحد، 2 يناير، 2011 3:34:00 م جرينتش+2

آآآآآآآآه يا وجعى

  فتافيت

الأحد، 2 يناير، 2011 4:15:00 م جرينتش+2

متعصب؟؟؟؟؟
رامي اللي هو اول من سجل متابعة على مدونتي صدقة جارية.. ومافيش هناك بوست مالوش تعليق عليه.. ويقولي متعصب؟؟؟

كنت بسأل وانا صغيرة كده زيك ليه الكنيسة عليها حراسة؟ وليه المسجد لا؟؟
وكنت بزعل انهم مهتمين بيكم واحنا لا .. اه والله تخيل بقى

ولحد النهاردة مش عارفة!!!!
اللي حصل كان بين كنيسة وجامع وصابهم
لا الحراسة حمت المسحيين
ولا قلة الحراسة شفعت للمسلمين

وبعدين ايه فيه ايه؟؟؟
المصيبة بتاعتنا كلنا والله.. كلنا
مات مسلمين.. ومات مسيحيين
صحيح المسيحيين اكتر.. بس مات من الاتنين

ايه الاتنين اللي عمالة اقولها ديه؟؟؟
مات مصريين يا رامي
مصريييييييييين.. اخوات وصحاب وجيران

تعالى اقرا اخر بوست عندي
بجد نفسي تقراه واشوف كومنت ليك عليه

كلنا واحد يا رامي
حتى لو هم عايزين يقسمونا
هانفضل واحد.. بنعبد رب واحد
عايشين على ارض واحدة.. بنتنفس هوا واحد.. شايلين جنسية واااااحدة

  خواطري مع الحياة

الأحد، 2 يناير، 2011 5:38:00 م جرينتش+2

الله يصبر كل اهلى القتلى وينزل عليهم السكينه
كلامك هذا مش تعصب ولا شي
هذا غضب فقط
وعارف ان كلكم وكلنا اخوان
كلنا مخلوقات الله مافي تعصب ولا شي
بعدين الانفجار كان عند الكنيسة والجامع
ومات مسيحين ومسلمين
الي فجروا عايزين يعملوا فتنه مابين اهل مصر
فاكيد كلكم شعب واحد يد وحده
فتاكد ان مافي مسلم يكره مسيحي ولا مسيحي يكره مسلم
انت اخونا ومقدرين موقفك
ربنا يصبركم ويصبر كل الشعب المصري
ان لله وان اليه راجعون

  لـــولا وزهـــراء

الأحد، 2 يناير، 2011 5:52:00 م جرينتش+2

ل انا من ساعت ما وعيت ع الدُنيا
و فى حراسات ع الكنايس
طب ليه هو مش عادى يعنى و لا فى ايه
طب ليه مفيش حرسات ع الجوامع
انت هتدلع يا عم رامى
هو كمان بنحرُسكم و بتسأل
أيوة بسأل بتحرسنى من ايه من ساعة ما اتولدت
هو علشان انت مطمن ليا
و انا لأ
و لا ايه ؟؟

" انا زعلااااااانة قوي يا رامي زعلانة بدرجة كبيرة احنا انكسرنا في اول السنة الجديدة الفرحة بدخول سنة جديدة لم تكتمل دم الشهداء دم الضحايا دم اخواتنا بقى ع الارض تقدر تفرق دم المسلم من المسيحي؟!! كله ده ده لونه احمر وده لونه احمر .... على فكرة الانفجار حصل بين المسجد والكنيسة ومحدش يقولي المقصود كان اتلكنيسة وبس الانفجار حصل والكنيسة قدام الجامع بالضبط اتفضل يا رامي الصورة واتأكد بنفسك

http://sphotos.ak.fbcdn.net/hphotos-ak-ash1/hs750.ash1/164156_154074487975757_104224996294040_266273_1334423_n.jpg


ربنا يرحم كل الشهداء وحسبي الله ونعم الوكيل

* بخصوص الحراسات على الكنيسة والجامع لأ انا ممكن اشوفها بعين غير اللي انت شايف بيها ممكن افسرها اهتمام اكتر ..وعدم اهتمام
انت شوفتها امان اكتر ...وعدم استئمان .

مارو كلامها مضبوط ..على فكرة انا ليا صديقات مسيحيات وطول عمرنا بناكل من طبق واحد وفي رمضان قبل اللي فات كان صابح عندنا رمضان وكان صابح عندها فطار فعزمتني عندهم في بيتها قبل ما اصوم مخوفتش...اطمنتلها وروحت عندها واكلت عندها وشربت عندها ... ادتلها ياميش رمضان علمتها بيتعمل ازاي مخفتش منها وانا في بيتها وهي مخافتش مني لاني مسلمة ..لأن ده الطبيعي دخلتني اوضتها
ولبست روبها عشان اصلي الظهر وعرفتني القبلة فين عشان كان فيه جامع قريب منها ...عمري ما سألتها انتي ليه مسيحية ولا هي سألتني انتي ليه مسلمة ..لأن ده الطبيعي اننا منسألش من امتى بنسأل ونقول ليه واشمعنى...من امتى بنقول ليه علكم حراسات هي ارواحكم اغلى مننا واحنا مبنشفش عسكري على باب مسجدنا... احنا موش محتاجين عساكر ولا انتم محتاجين حماية احنا مصريين والدم اللي ع الارض دمنا ..لونه احمر... لونه احمر... دم واحد .وياريت منسمحش لحد يدخل الافكار دي ف دماغنا... وكلنا بنقدرك وبنحترمك.. جدا فوق ما انت ما تتخيل او تتصور
لولا

  لـــولا وزهـــراء

الأحد، 2 يناير، 2011 5:53:00 م جرينتش+2

" انا زعلااااااانة قوي يا رامي زعلانة بدرجة كبيرة احنا انكسرنا في اول السنة الجديدة الفرحة بدخول سنة جديدة لم تكتمل دم الشهداء دم الضحايا دم اخواتنا بقى ع الارض تقدر تفرق دم المسلم من المسيحي؟!! كله ده ده لونه احمر وده لونه احمر .... على فكرة الانفجار حصل بين المسجد والكنيسة ومحدش يقولي المقصود كان اتلكنيسة وبس الانفجار حصل والكنيسة قدام الجامع بالضبط اتفضل يا رامي الصورة واتأكد بنفسك

http://sphotos.ak.fbcdn.net/hphotos-ak-ash1/hs750.ash1/164156_154074487975757_104224996294040_266273_1334423_n.jpg


ربنا يرحم كل الشهداء وحسبي الله ونعم الوكيل

* بخصوص الحراسات على الكنيسة والجامع لأ انا ممكن اشوفها بعين غير اللي انت شايف بيها ممكن افسرها اهتمام اكتر ..وعدم اهتمام
انت شوفتها امان اكتر ...وعدم استئمان .

مارو كلامها مضبوط ..على فكرة انا ليا صديقات مسيحيات وطول عمرنا بناكل من طبق واحد وفي رمضان قبل اللي فات كان صابح عندنا رمضان وكان صابح عندها فطار فعزمتني عندهم في بيتها قبل ما اصوم مخوفتش...اطمنتلها وروحت عندها واكلت عندها وشربت عندها ... ادتلها ياميش رمضان علمتها بيتعمل ازاي مخفتش منها وانا في بيتها وهي مخافتش مني لاني مسلمة ..لأن ده الطبيعي دخلتني اوضتها
ولبست روبها عشان اصلي الظهر وعرفتني القبلة فين عشان كان فيه جامع قريب منها ...عمري ما سألتها انتي ليه مسيحية ولا هي سألتني انتي ليه مسلمة ..لأن ده الطبيعي اننا منسألش من امتى بنسأل ونقول ليه واشمعنى...من امتى بنقول ليه علكم حراسات هي ارواحكم اغلى مننا واحنا مبنشفش عسكري على باب مسجدنا... احنا موش محتاجين عساكر ولا انتم محتاجين حماية احنا مصريين والدم اللي ع الارض دمنا ..لونه احمر... لونه احمر... دم واحد .وياريت منسمحش لحد يدخل الافكار دي ف دماغنا... وكلنا بنقدرك وبنحترمك.. جدا فوق ما انت ما تتخيل او تتصور
لولا

  لـــولا وزهـــراء

الأحد، 2 يناير، 2011 5:53:00 م جرينتش+2

" انا زعلااااااانة قوي يا رامي زعلانة بدرجة كبيرة احنا انكسرنا في اول السنة الجديدة الفرحة بدخول سنة جديدة لم تكتمل دم الشهداء دم الضحايا دم اخواتنا بقى ع الارض تقدر تفرق دم المسلم من المسيحي؟!! كله ده ده لونه احمر وده لونه احمر .... على فكرة الانفجار حصل بين المسجد والكنيسة ومحدش يقولي المقصود كان اتلكنيسة وبس الانفجار حصل والكنيسة قدام الجامع بالضبط اتفضل يا رامي الصورة واتأكد بنفسك

http://sphotos.ak.fbcdn.net/hphotos-ak-ash1/hs750.ash1/164156_154074487975757_104224996294040_266273_1334423_n.jpg


ربنا يرحم كل الشهداء وحسبي الله ونعم الوكيل

* بخصوص الحراسات على الكنيسة والجامع لأ انا ممكن اشوفها بعين غير اللي انت شايف بيها ممكن افسرها اهتمام اكتر ..وعدم اهتمام
انت شوفتها امان اكتر ...وعدم استئمان .
لولا

  لـــولا وزهـــراء

الأحد، 2 يناير، 2011 5:54:00 م جرينتش+2

أزال المؤلف هذا التعليق.
  شيرين سامي

الأحد، 2 يناير، 2011 7:05:00 م جرينتش+2

ده مش تعصب يا رامي لك حق تحزن و تغضب أكتر من كده أنا كمان كنت دائماً بسأل ليه في حراسات على الكنائس مش دي بيوت ربنا مش دي دور عباده و لا دي سفارات لبلاد غريبه و أماكن سياسيه!!!
بس دلوقتي عرفت ليه عشان للأسف وحدتنا الوطنيه بقت منطقه ضعيفه لكل من تسول له نفسه انه يفرقنا و يدمر ترابطنا
رامي انا مش عارفه أقولك ايه بس صدقني احنا بنحبكم زي اخواتنا و أكتر و حزننا باللي حصل ميتوصفش
ربنا يصبرنا و يبعد عننا أي شر و أذي
تحياتي لك و أسفي الشديد

  محمود(باحث عن حب)

الأحد، 2 يناير، 2011 8:34:00 م جرينتش+2

حسبنا الله ونعم الوكيل

  صيدلانيه طالعه نازله

الأحد، 2 يناير، 2011 9:32:00 م جرينتش+2

لاول مره اقرا كلام و معرفش ارد عليه
اصل كلامك النهارده بيوجع اوووى
و الواحد موجوع لوحده
المفروض فعلا احنا اللى نحمى بعض مش حد تالت يحمى واحد من التانى
ربنا يصبرنا جميعا لان الحادث حادث اصابنا كلنا يا رامى مش انتم بس

  Ramy

الأحد، 2 يناير، 2011 10:26:00 م جرينتش+2

عارف و فاهم
أنا بشكر كُل الناس اللى علقت ع البوست
و عارف أن أحاسسهم صادقة
أنا لو مكنتش عارف انا بفضفض لمين
مكنتش فضفضت من الأساس
أسف لو كُنت وجعتكم
بس مكُنتش هقدر

و زى ما قُلت أنا مش غضبان
أنا بس موجوع
عارف أن لو الموضوع كان عاوز يستهدف
الكنيسة بس
كان ممكن يروحوا لكنيسة تانى
تكون بعيدة عن الجامع
لأن أكيد الجامع هيتأثر باللى هيحصل
و عارف ان كان هناك مسلمين واقفين لأسباب مُختلفة
منهم من عساكر و ظُباط

و عارف أنهم عاوزين يهدموا مصر بينا
بينا هنا قصدى المصريين
كُلنا

بس يا جماعة الموقف صعب جداً
أنا عيشته قبل كدة

و عيشته بس مش عنف طائفى
لأ
عيشتة فى تفجيرات شرم اللى كان المستهدف فيها المفروض
أجانب (الكفرة) اللى هم كفرة بالنسبة للى نفذوا العملية
و ناس كتير من اللى شغالين هناك
دى قصة تانى بقى

بس المصيبة ان اللى ماتوا 99%
منهم مصريين و مسلمين
و قليل من المسيحين
و الحمد لله انا نجيت منها برغم ان محدش صدق ساعتها

أنا مش بدافع عن الموقف اللى حاصل
لأن حقيقى فى جرح حقيقى فى قلب المسيحين

بس أنا مش عاوز اتكلم على مواقف خلصت
خلااااااص

انا رديت على اتصل بيا
يكلمنى
انى مش عاوز للى عمل كدة يبقى حقق هدفه

  Silver Eyes

الأحد، 2 يناير، 2011 10:54:00 م جرينتش+2

معنديش حاجة اقولها غير البقاء لله
وحسبى الله ونعم الوكيل ..

قلوبنا معاك يا رامى
:(

  re7ab.sale7

الأحد، 2 يناير، 2011 11:53:00 م جرينتش+2

رامي
عايزة اقولك علي حاجة
انا وانت وغيرنا في سن واحدة تقريبا
من يوم ما وعينا ع الدنيا شكلها متغير عن اللي بيحكيه ابويا وابوك وجدك وجدي....
فكر ف زمان وف دلوقت
هتلاق اختلاف
مين الي عمله
ولية اتعمله...؟
هتلاقي الاجابة
شوف تعليقاتنا كلنا
شوف تعليقاتي
وتعليقات كل مسلم قبل مسيحي
هتلاقينا كلنا بنحب بعض
ومفيش الكلام ده
بس دي دسيسية من بره عشان نكره بعض ونحارب بعض
ونخللي مصر لبنان تانية ف حرب اهلية
ومش بعيد نحتل عشان يقولوا بنهدي الوضع بينكم
لازم نفوق ونعرف عدونا الحقيقي
رامي
قلبي معاكم بجد
وقلبي معاك وحاسة بيك
معلش
ان شاء الله ربنا ينصرنا عليهم
ونرجع تاني نعيش مع بعض من غير كل ده

  عمرو يسرى

الاثنين، 3 يناير، 2011 1:34:00 ص جرينتش+2

بص يارامى سؤالك دا غالبا مش هتلاقى حد مصرى ما سئلش السؤال دا قبل كدا
وغالبا مش هتلاقى لسؤالك اجابه زى ما انا مش لاقى كلام اقوله كده
اصل هقول ايه انت اساسا بتتكلم بلسانا كلنا فسؤالى ليك هو فين التعصب اللى فى كلامك اللى انت تقصده
ربنا يرحمنا جميعا
وحسبى الله ونعم الوكيل فى اللى عكنن علينا السنه الجديده

  sony2000

الاثنين، 3 يناير، 2011 2:47:00 ص جرينتش+2

عارف يرامي
انا بقيت حسه
اني بنصين
نص خايف من اللي جاي وقلقانه علينا كلنا
ونص تاني بيقلي متخافيش
هنعرف اذا نحافظ علي بعض
ونخلي بالنا من بعض ومن مخطاطهم
تفتكر يرامي انا هكون مع انهي نص بالظبط؟

  Mona

الاثنين، 3 يناير، 2011 9:44:00 ص جرينتش+2

معنديش كلام أقوله :(((( غير حسبى الله ونعم الوكيل على الظالمين

  موجة

الاثنين، 3 يناير، 2011 9:59:00 ص جرينتش+2

معلش يارامى
بس عاوزة اقولك ان فعلا موضوع الحراسة اللى ع الكنائس ده لفت نظرى وانتباهى انا كمان
ليه صحيح؟
هو مش فى فمصر تسامح دينى
يبقى منين وهم بيحطو التعصب من ناحية تانية عن طريق الحراسة
مش عارفة
بس قلبى عندك وعندكو كلكو
اسفة ع الاخبار المزعجة اللى شوهت بداية السنة الجميلة اللى كانت هتبقى جميلة

  bentelghrob

الاثنين، 3 يناير، 2011 1:27:00 م جرينتش+2

فعلا والله ما عارفه اقول ايه كنت عايزه اجى اقولك كل سنه وانت طيب ودايما منورنا.. ولكن خالص تعازينا.. ربنا يصبركم ويصبرنا لان احنا كمان فى حالة حزن وحداد من الى حصل لان الى حصل بيمس كل مصرى على اختلافات ثقافاتهم واديانهم..
حسبنا الله ونعم الوكيل..
قلوبنا معاك يارامى
تحياتى

  NaDa

الاثنين، 3 يناير، 2011 5:49:00 م جرينتش+2

مـوجوعة كـ وجعتك : ))
فـلا الكـلام يفيـد .. ولا الأوجاع ترحل

ربنا يصبركم
ويصبر جميع المصريين على كل اللى بيحصل ده

حاسة اني مش لاقية كلام أقوله
أو أن الكلام مالوش منه فـايدة !

حسبنـا الله ونعم الوكيل .

  Timo..

الاثنين، 3 يناير، 2011 5:53:00 م جرينتش+2

مش عارف اقولك ايه غير انك بتفضفض معانا وفي وسطنا..
وصدقني..قلبنا كلنا اتوجع في اللي حصل يا رامي..
قلبي عندك..وربنا يرحم الجميع.

  غير معرف

الاثنين، 3 يناير، 2011 7:10:00 م جرينتش+2

الشوكه الناعمه
يا جماعه احنا ليه كلنا بنتكلم بضمير احنا وهما
واحنا ليه بنفترض ان هما ناس واحنا ناس تانيه
ايه يارامى فين التعصب ده
صدقنى الموضوع فوق مننا كلنا ولو كل واحد فينا خد نحيه وقال ليه الكنيسه عليها حراسه واحنا لا
وليه المسحين يتضربوا والمسلمين لا
يبقى هاناكول فى بعض وهاتولع
الناس اللى ماتت دى يا بختها ما احنا كلنا هانموت بس بتنمنى نموت شهدا
المصيبه مش فى موتهم
المصيبه فى المعناويات اللى اتضربت وماتت فى قلب اللى بيدق عنده جرس واللى بجلجل عنده اذان
احنا لو فضلنا كده يبقى سلملى ع البلد دى
البلد دى مسلم ومسيحى ومش ممكن تكون غير كده
الحكومات مش هاتضيعنا من بعض
ولا الارهابى اللى هو اضعف من نفسه فااصبح مجرد تابع مالوش صرفه ولا ملكيه فى نفسه
حسبى الله ونعم الوكيل
احنا لو ماعرفناش قيمه البلد دى وبقينا نسيج واحد مش بالكلام يبقى مانستاهلش نعيش
تقبل عزائى يا رامى وتمالك نفسك انتا اقوى من ده
ربنا يسلط عليهم من لا يخاف الله فيهم ولا يرحمهم

  جايدا العزيزي

الاثنين، 3 يناير، 2011 9:57:00 م جرينتش+2

خالص عزائنا للاخوة المسيحيين
وبنقولهم ربنا يرحم امواتنا جميعا