رومانسية و لا ...عبط و لا .... عدم أدراك

اية يا عم رامى
أنت مش قلت البوست دة هيكون مش حزين
أيوة ما هوا مش حزين
أمال أيه العنوان ده
أيه المشكلة عادى يعنى مجرد عنوان بس هتعرفوا ليه
أصل انا هتكلم عن 3 أفلام رومانسية
أنا بحبها جدا
The lake house
City of angels
50 first date
غالبا هما التلاته قصص غير منطقية ومستحيلة
بس على مييين
أنا مش همل ريفيو طبعا عن الأفلام
دة بس عرض لحاجة بحبها مش اكتر
كل فيلم من دول أنا حاسيته جدا جدا
بس الفيلم اللى خلانى أبكى بجد هو
The lake house
منزل البحيرة


الفيلم دة انا شفته من حوالى 4 أو 3 سنين
لما شفته أول مرة خطفنى جدا بالقصة الغريبة جدا بتاعته
لكن لما شفته من كام شهر انا دورت عليه و اتفرجت عليه
و بكيت جدا
طبعا هنا ناس تقول ايه يا عم رامى انت حساس قوى يعنى
لا أنا بكيت لأنه فى كتير من اللى انا عشته فى قصتى
طبعا مش زى الفيلم بس عجز الطرفين
أو بالأخص البطل
من أنه مش قادر يعمل شيىء للى بيحبها
الجملة اللى بتقطعنى جدا فى الفيلم
لا تقلقى كيت
سنكون معا فى وقتاً ما
حتى و أن بعدت بيننا المسافات
سأجد طريقة لأكون قريباً منك
و لأعتنى بكِ

أأأأأأأه يا عم الحج ع الكلااااام
طبعا ممكن تكونى فهمتى أهتمامى بحاجات كتير ليه
طبعا الموسيقى التصويرية للفيلم رائعة جدا
الأغنية غير طبيعية
أنا هأنهى بيها البوست على فكرة
الفيلم فكرته صعبه شوية عاوزة بس تركز فى الأول و بعد كدة
هتفهم علطول
هى عن أتنين حبه بعض و هما مش من نفس زمن بعض
شوف الفكرة سهلة أزاى (:
الفيلم التانى
أه من الفيلم التانى و اللى عمله الفيلم التانى
City of angels
مدينة الملائكة


دى بقا قصة حب هى غير واقعية تماما
بمنظُرنا البشرى و الدينى
دة على أساس القصة الأولانية منطقية يا عم رامى
معلش عدوها بقا (:
بس هدف القصة جميل جدا
أزاى أن أحساس الحب مش بس كلام
مش مشاعر تتحس بس
لا دى أفعال حقيقية بتحصل
بتِظهْر الحب للى أنت بتحبه
بأفعالك حتى لو كان اللى بتحبه أظهر عدم قبوله لهذا الحب
كمان فى حاجة طرحها الفيلم جميلة جداً
أزاى تحس الأشياء و توصفها
بكلمات
حتى لو كنت بتوصف مشاعر
أو طعم حاجة
رغم صعوبة المهمة دى
التساؤل الجميل اللى بحبه قوى فى الفيلم
ليه الناس بتبكى ؟؟؟!!
بعد مناقشة صغيرة معها
يقولها
..... ربما تصبح المشاعر أقوى
..... من أن يحتويها الجسد
أفكارك و مشاعرك تصبح قوية للغاية
فيبكى الجسد

دة فى المشاعر الأيجابية و السلبية
تنهيدة طوييييييلة و أكمل
برغم عدم منطقية الفيلم
بس بيقدم المشاعر بطريقة جميلة انا حبتها جدا
الفيلم التالت (:
هو عاطفى و كوميدى فى نفس ذات الوقت
(:
50 first date


قبل ما أحكى و أقول
عارفين بطلة الفيلم
هى البنت الصغيرة فى فيلم
E.T
فاكرينه (:
Drew Barrymore
دروو باريمور
فاكرينها (:
المهم
الفيلم دة أكثر التلاتة واقعيه
يعنى ممكن يحصل (:
الفيلم دة بقا بيعالج حالة مرضية موجودة
و هى الذاكرة قصيرة المدى
أنا مش هأعرف أشرحها طبعا لأنى مش دكتور
بس بيورريك الفيلم الأصرار ع الحب
حتى بعد معرفة البطل بمرض البطلة
محاولات مستميته حتى بعد فقد الأمل رجعلها
مع كل لقاء بينهم مع الأبتسامة بدموع المشاعر المحبوسة
الجزء اللى بحبه قوى فى أخر الفيلم
بس الجزء اللى بيأثر فيا
الحتة اللى جاية دى لما خدته من ايده فى المستشفى
على الغرفة بتاعتها
و شاف صور كتير جدا ليه ع الحيطة و صور مرسومة و متعلقة
و دار هذا الحديث
وااااااااااو (هو من المفاجأة)
هى : لا اعرف من أنت. هنرى....
......و لكن أحلم بكَ كل ليلة
لماذا؟؟؟؟؟
هو: ماذا تقولين لو أخبرتك أن حاسوبك الخاص
اللذى تقرأين منه كل ليلة.....
.....كان يتضمن الكثير عنى
هى: سأقول أن الأمر يصبح مفهوماً الأن
هو: لقد محوتنى من ذاكرتك ....
لأنكِ ظننتى أنكِ تمنحينى أن يكون لدى
حياة سعيدة
و لكنك أرتكبتِ خطأ
لأن البقاء معكِ هو الطريقة الوحيدة
كى أشعر بالسعادة
أنتِ فتاة أحلامى
تنهيدة تانى طويييييييييييلة (: ( دى أنا)
طب هو فى ربط بين التلاتة يعنى يا عم رامى
من وجهة نظرى اه
يعنى فى الفيلم الأولانى انت بتلاقى حبك
فى التانى أنت بتظهره و تبينه و تقول أنا بحب
فى التالت بتصر على أن الحب دة يعيش أن يكون ليه فرصة
أنه يعيش
مش عارف أنا حاولت هنا أبين حاجات بحبها و أبين وجهة نظرى للحب
يارب متكنوش تهتوا منى (:
هنا بقى
هل دى رومانسية و لا عبط و لا عدم أدراك



دى بقى مفاجأة البوست صورتى مع أخواتى من سنييييين كتييييييير قوى (:
طبعا التصوير دة تعبيرى زى ما احنا عارفين
أصل دة كانت فى الأقصر (:
طبعاً أنا سرحان مش عارف ليه و ليه الراجل اللى بيصور متكلمش
تعبيرى بقا (:
و أختى مامت بيير فى النص
و ميشيل أخويا مبسوط مش عارف ليه !!!!









اللى جى دة رباعية بحبها قوى لصلاح جاهين
هدية ليها
ليه يا حبيبتى ما بينا دايماً سفر
ده البعد ذنب كبير لا يغتفر
ليه يا حبيبتى ما بينا دايما بحور
أعدى بحر ألاقى غيره أتحفر
عجبى !!!

46 التعليقات:

  Ramy

الأحد، 26 سبتمبر، 2010 7:45:00 م جرينتش+3

يا جماعة

أنا ممكن مش هأقدر اتابع الناس الفترة اللى جاية

و ممكن مقدرش أرد ع الناس كلها

علشان هكون مشغول شوية علشان يمكن ربنا يكرم كدة

و أقدر أروح يوم أسكندرية

ياااااااااارب

(:

  ستيتة حسب الله الحمش

الأحد، 26 سبتمبر، 2010 7:52:00 م جرينتش+3

3 افلام بحبهم جدا
مش كل شيء بنشوفه لازم يتبع السنيما الواقعية بتاعة عشش الصفيح
ساعات حاجات كده نشوفها تخلي نفوخنا يفصل ويروح للأحلام الوردية علشان نعرف نرجع نعيش وسط الدنيا واهلها تاني
جميلة اختياراتك
وجميلة الصورة جدا
لو وريتك صورة خالي صغير وكبير حتة منك بس هو كبير عنك
ربنا معاك يعينك في شغلك

  Ramy

الأحد، 26 سبتمبر، 2010 8:00:00 م جرينتش+3

د/ستيته

ما انا بقول كدة من زمان يا دكتورة

نفوخنا أتهرى من العشوائيات

نحلم شوية مش ممكن

أكيد قرايب يا دكتورة (:

بس ملحظتيش اننا لابسين برضه سلوبتات
زى بيير (:
ههههههههههه

زى ما يكون اللبس الرسمى بتاعنا

(:

الله يخليكى يادكتورة ع الدعاوة الجميلة دى

منورانى يا دكتورة (:

  Mona

الأحد، 26 سبتمبر، 2010 8:17:00 م جرينتش+3

أنا بحب
City of Angles أكثر حاجة وبعد ما تعرض فى السينما هنا بكام أسبوع حد فاق كده من الرقابة وقال يااالهوى إيه الكفر ده وأتشااااااااال من السينما وقعد كم سنة ممنوع ينزل فى التلفزيون وبعدين شفته تانى من سنة كده فى التليفزيون قلت 100 100 الى حاطه مش فاهم أصل مش ممكن يكون التنوير وصل فجأة - المهم
Lake House
شوية مملل وماكنتش عاجبنى الفترة الزمنية القصيرة التى لا مبرر لها ليه مش عشرة أو زمن غير الزمن بس أنا بحب ساندرا وأى حاجة بتمثلها بأمشيها لها حتى لو أيه
الفيلم الثالث ده للأسف أنا أكره أدم ساندلر جدا ولا أرى له أى افلام بس أنا عارفة القصة وكمان بيتهيألى أنه الفيلم المصرى ميكانو مأخوذ منه
تحياتى على الأختيارات

  Ramy

الأحد، 26 سبتمبر، 2010 8:37:00 م جرينتش+3

Mona

أستاذة منى

هو ممكن يكون مفهمش (:

دة صحيح

ليه يا دكتورة بتكرهى بس الفيلم جميل بجد

شكرا لحضرتك

كويس ان الختيارات عجبتك (:

منورانى دايما (:

  طالبة مقهورة ..درجة أولى

الأحد، 26 سبتمبر، 2010 8:46:00 م جرينتش+3

انا مش قريت البوست عشان مفيش وقت

بس قولت اسلم واشقر عليك بسرعة قبل ما امشي :)

ازيك يا رامي؟؟

  Ramy

الأحد، 26 سبتمبر، 2010 8:57:00 م جرينتش+3

طالبة مش مقهورة

أنا تمام الحمد لله شكرا ع السؤال

على فكرة انا مرضتش أعلق ع البوست انهاردة علشان خوفت تزعلى

لأن انتى كنتى قافلة الكومنت و شيلتى الشات بوكس كمان

بس كدة احنا اطمنا عليكى (:

منورانى دايما (:

  Tears

الأحد، 26 سبتمبر، 2010 9:03:00 م جرينتش+3

تصور بقى يا رامى ان فعلا بيير فيه شبه منك اكتر من اى حد

سلم عليه :)

  الحب الجميل

الأحد، 26 سبتمبر، 2010 9:40:00 م جرينتش+3

الصراحه ماليش فى الافلام او بمعنى اصح بتفرج ومش بحفظ اسماء الافلام
بس من عنونها وصورها شكلها جميله
هحاول اشوفهم
حلوة الصورة يا رامى
سررررحااااااااان من صغرك يا رامى
هههههههه
ربنا يسعدك ويقويك
مستنينك
هاااا
أوعى مش تيجى
التجمع هيكون بوجودك أجمل

  amiralcafe

الأحد، 26 سبتمبر، 2010 11:16:00 م جرينتش+3

الحلم اجمل حاجة في الدنيا*لا تقلقى كيت
سنكون معا فى وقتاً ما
حتى و أن بعدت بيننا المسافات
سأجد طريقة لأكون قريباً منك
و لأعتنى بكِ*هذه الجملة هي الامل الذي يعيش به الناس غلى مر العصور حسب المكان والزمان والظروف لكن يبقى الحب وبالحب نعيش.
عطلة سعيدة اخ رامي
رؤوف

  Ramy

الأحد، 26 سبتمبر، 2010 11:23:00 م جرينتش+3

tears

متقوليش كدة أبوه بيزعل

(:

حاضر صدقينى لما بتصل بوصل السلام كله (:


منورانى دايما يا تيرز (:

  Ramy

الأحد، 26 سبتمبر، 2010 11:26:00 م جرينتش+3

الحب الجميل

(:

لا لو قدرتى تشوفيهم هيعجبوكى جدا على فكرة


شوفتينى و انا سرحان (:

حاضر بس أدعى بقلب بس (:

الله يخليكى اليوم جميل بصحابه

منورانى دايما (:

  Ramy

الأحد، 26 سبتمبر، 2010 11:30:00 م جرينتش+3

amiralcafe
رؤوف

عندك حق صديقى

أمل ان ممكن فى يوم من الأيام تتحقق أمانينا

بس انا مش فى عطلة

دا انا هكون مزنوق فى الشغل

بس يا مسهل يمكن اخد يوم عطلة كدة نوصل أسكندرية

و نيجى أن شاء الله

منورنى دايما يا رؤوف (:

  mrmr

الاثنين، 27 سبتمبر، 2010 12:19:00 ص جرينتش+3

تصدق بايه
ماليش نفس اعلق ولا اتكلم
مش عارفه حاله غريبه كتمت على نفسى من شويه يمكن الواحد اتعشى جااااامد خلى كل المخاخيخ وقفت عن التفكير
بس مسامحينك انك مش ح تتابع
ومنتظرينك يوم اللقاء
القاء ح يكمل بوجودك
تصبح على خير

  Haytham Alsayes

الاثنين، 27 سبتمبر، 2010 1:02:00 ص جرينتش+3

رامي باشا

رومانسى رومانسي مفيش كلام
ايه ياعم الحج الرومانسية دى كلها
دعواتي لك يارامي انك تجتمع بنصك التاني قريب جدا

اما عن الافلام اخوك ميح في الافلام الاجنبي

اما الصورة جميلة تعبيرية فعلا
بس مش بتاعت الاهرام
دي تعبيرية وجميلة بجد
وانا نفسي اشوفك حقيقي يوم السبت
ان شاء الله
حاول

تحياتي

  mena

الاثنين، 27 سبتمبر، 2010 1:42:00 ص جرينتش+3

رامى انا مش اول مرة أقرألك بس اول مرة ارد ع موضوع ليك

رامى بجد انت حد جميل اوى كلامك بسيط

بص انا معنديش كلام تانى ممكن اقولو

ممكن تشوف تعليق غريب بس ده اللى حسيت انى عاوزة اقولو بعد لما قرأت البوست

لان بجد عجبنى وجهة نظرك ف الافلام واللى يمكن يكون محدش شيفها كده غيرك هكون كدابه لو قولت انى شفتهم بس بعد البوست ده وكلامك اكيد هتفرج علشان اشوف ايه الافلام اللى ممكن تخرج من حد كل المشاعر المرهفه دى

ربنا يوفقك......منه

  mena

الاثنين، 27 سبتمبر، 2010 1:42:00 ص جرينتش+3

اه نسيت اللى انا قرأتو ده اكيد ملوش اسم غير رومانسيه ومينفعش يتقال عليه عبط او عدم أدراك ابدا

  لـــولا وزهـــراء

الاثنين، 27 سبتمبر، 2010 2:09:00 ص جرينتش+3

رامـــى

ان شاء الله فى انتظارك تنور وتشرف اليكس


هاقولك على حاجه لما ردسة نقد فنى اكتشفت ان كل الافلام مش خياليه بالعكس فى حاجات بتكون خيال اكتر منها على ارض الواقع
فى حكايات لو قولتها تقول بجد حصل كده ازاى وامتى وفين ؟؟؟؟
اختيارك للافلام بيدل على انك شخص حساس اوى ورومانسى جدا وكمان عندك امل انك تحقق كل حاجه فى نفسك حتى لو اللى فى نفسك يقال انه درب من دروب الخيال
الصروه تحفه بجد اللى فى الاخر ويارب عقبال صور فرحك عن قريب

مش كل اللى بنشوفه فى حياتنا صدق ومش كل اللى بنشوفه فى السنيما خيال

زهراء

  لـــولا وزهـــراء

الاثنين، 27 سبتمبر، 2010 2:09:00 ص جرينتش+3

انا كتبت تعليق والنت علق مش عارفه وصل او لا
اذا مش وصل اكتبه تانى

زهراء

  adel

الاثنين، 27 سبتمبر، 2010 6:30:00 ص جرينتش+3

احمدهم عندي رغم اني تاثرت بالاتنين التانين ايام المراهقة
هو اخر فيلم
50 first date
لسببين
القصة ااقرب للنتطقية
وتانيهم اني بموت في درو باريمور اصلا

بس في افلام تانية رومانسية حبيتها لما كبرت حتي لو مش منطقية
اهمهم فيلم
Eternal Sunshine of the Spotless Mind

وده اول فيلم جد لجيم كاري ومعاه كيت وينسلت و جيم اصلا مخدتش فلوس عشان يعمله لانه اتحايل اصلا عليهم
وفكرة الفيلم خيال علمي
ان واحدة بتسمح حبيبها من ذاكرتها و هو بيروح يعمل كده بس في الاخر مبيرضاش و بيحاول ينقذها من المسح ده

الجميل اصلا ان فكرة الفليم جت ان مايكل جوندري المخرج كان مع واحدة صاحبة في بار وصاحبة بيقوله انه زهقان قوي من حبيبته و نفسه يمسحها من دماغة
راح مكلم تشارلي كوفمان المؤلف و عملوا الفيلم و خد اوسكار
هههههههههههههه
بس بجد قمة الرومانسية

  sony2000

الاثنين، 27 سبتمبر، 2010 7:08:00 ص جرينتش+3

بجد بجد
بدعيلك
ربنا معاك ويحققلك كل اللي بتتمناه

  غير معرف

الاثنين، 27 سبتمبر، 2010 1:16:00 م جرينتش+3

ثقافة الهزيمة.. أسكندرية ...ليه؟

متحف الأسكندرية القومى والمتحف اليونانى الرومانى و متحف المجوهرات الملكية و متحف الفنون الجميلة و متحف الأحياء المائية و متحف محمود سعيد ، و قلعة قيتباى و قصر المنتزة و مكتبة الأسكندرية الجديدة و الميناء الشرقى و حديقة أنطونيادس و نصب الجندى المجهول.

ومن الآثار الرومانية الموجودة بالإسكندرية المسرح الرومانى و عمود السوارى و معبد الرأس السوداء وحمام كوم الدكة الرومانى والذى أقيم على طراز الحمامات الرومانية القديمة ، و مسجد سيدى بشر ومسجد سيدى جابر ومسجد القائد إبراهيم ومسجد المرسى أبو العباس، وكاتدرائية الكرازة المرقسية وكاتدرائية اليونانيين الأرثوذكس و كنيسة سان مارك.

محطة الرمل وكامب شيزار وسان ستيفانو وسيدى بشر ، و طريق الجيش الممتد بمحاذاة الكورنيش ، و سى جل للأسماك فى أبوقير و بحرى، و جيلاتى عزة و جيلاتى النظامى و قدورة للأسماك فى بحرى ، و شارع سعد زغلول و شارع صفية زغلول وفول محمد أحمد و حلوانى طلعت وهريسة الحلبي و البن البرازيلى فى محطة الرمل، و حلواني صابر بالأبراهيمية، و مشويات أبن البلد بمصطفى كامل، و سان جيوفانى فى ستانلى ، و مول سان ستيفانو ، و مشويات حسنى بالمندرة ،و مشويات بلبع فى سيدى بشر قبلى، و حلواني شهد الملكة فى ميامى و فيكتوريا، وركوب الترام من غير محطة محددة فقط كى تتفرج على الأسكندرية من شباك الترام و أهل الأسكندرية الطيبين.

هذة بعض ما تحتويه مدينة الأسكندرية من معالم سياحية و مع ذلك لا تجد مدينة الأسكندرية على خريطة المدن السياحية الجديرة بالزيارة فى مصر فى مكاتب السياحة بالخارج و التى تنظم لها رحلات سياحية..

باقى المقال ضمن مقالات ثقافة الهزيمة بالرابط التالى www.ouregypt.us

  فاتيما

الاثنين، 27 سبتمبر، 2010 1:17:00 م جرينتش+3

مشوفتش الفيلم الأول
مع انى بحبح ساندرا بولوك
و الواد كيانو ريفز دا جداااا


و بعشق الفيلم التانى
لأنى من محبى نيكولاس كايج

و مركزتش مع الفيلم التالت
لما اتعرض اخر مرة ف الدش


بس التلات افلام
بيتكلموا عن حب صعب
انتا ربطت ما بينهم بشكل جميل

احييك عليه
و لو انه منطقى لحد رومانسى زيك

خليك على راحتك
و ان شاء الله
اشوفك يوم السبت
اذا ربنا وقفنا كلنا


الصورة اللى ف أسف المدونة
تحفة
تسلم اختياراتك


هقول زى كل حد قال
و بيقول
و هيفضل يوق

ربنا يحققللك كل ما تتمنى يا رامى
و احسن الف مرة

خالص ودى
يا ر ر

  م. حجاز

الاثنين، 27 سبتمبر، 2010 2:06:00 م جرينتش+3

ياسيدى عليك ياعم رامى

the lack house
City of angels

بجد فيلمين من أجمل ما يمكن واختيارك فيهم موفق بس بصراحة الفيلم التالت ما شوفتوش بس خلاص ينزل حالا ونشوفه بعد المقدمة دى

والحاجه الجميلة بأى الصورة دى فكرتنى باستوديوهات ايام زمان والراجل الاشتغالات اللى كانت فيها
بس هناك سؤال يطرح نفسه انته فين فى الصورة؟؟
:D:D

نوت جميل وتسلم ايدك يابرنس

  موجة

الاثنين، 27 سبتمبر، 2010 3:19:00 م جرينتش+3

انا حاسة انى دخلت سينما ريفولى ولا كايروو
فى ايه يا عم رامى
بص
انا سمعت عن فيلم سيتى اوف انجل ده
لكن ما شفتوش بس اللى انا عرفته يعنى
انه فيلم رومنسى جدا
المهم
انا مش من هواه متابعة الافلام الاجنبيه
ولا العربية
بس ممكن اتفرج على فيلم بوحة
كتكوت
بوشكاش
اى حاجة هبله تضحكنا على خيبتنا القوية اللى احنا فيها
هى كده يا عم رامى
بتطلب تهييس معايا
ماشى ماشى
كله منك عثل

  richardCatheart

الاثنين، 27 سبتمبر، 2010 6:18:00 م جرينتش+3

الللللللللللللللللللله عليك يا عاشق

التلات افلام احلى من بعض شوفتهم اكتر من مرات مش فكره بس كتير

اقرب واحد ليا مدينه الملائكه لانى بموت فى نيكولاس

اختياراتك واحساسك رائعين والتلاته فى بينهم لينك مشترك انا شايفه
الاستحاله صح

صورتك كميل يانس انن انن بس انت الكبير شبه بيير على فكره ومامته كمان شبهه بس هى احلى منك طبعا من بنوته لازم تبقى احلى من الولد

الرباعيه اخدتنى بعشق جاهين لو قال ايه بالذى

تسلم يارمى ربنا معاك ويطمنا عليك

  نهر الحب

الاثنين، 27 سبتمبر، 2010 6:47:00 م جرينتش+3

انا بحب التلات افلام دول
جدا على فكرة لان فيهم رومانسية جميلة
حب للحب مش بحسابات

رامى الحب هو ما يعطى للحياة طعم ومذاق حلو نستكيع معه نسيان مرارتها

فلا تفقد ايمانك به
الحب هو سر الحياة
كل ما فى الحياة هو بسر الحب

  I will be Myself

الاثنين، 27 سبتمبر، 2010 9:05:00 م جرينتش+3

الفيلم الاخير
اكتر فيلم اثر فيا
كيف يمكن للمرء ان يضحي بالكثير فقط من اجل البقاء مع من يحب
فيلم قريب جدا من القلب
من الواقع ومن الحب الحقيقي

تحليل بديع للافلام

  داليـ ـ ـ ـ ـ ـ ــــا

الثلاثاء، 28 سبتمبر، 2010 12:31:00 ص جرينتش+3

الفيلم الاخير فكرنى بفيلم اتفرجت عليه
هقولك عليه بما انك بتحب الافلام الا من النوع ده
Walk To Remember

جميل إحساسك ياعم رامى
وانتا مكنتش مبسوط فى الصوره ليه زى اخوك
هو انتا الكبير ولا ايه

  ghada mOhsen

الثلاثاء، 28 سبتمبر، 2010 4:44:00 ص جرينتش+3

اللــــه بجد التلات أفلام حلوين كتييير

أنا إللي بيأتر فيا أوي
the lake hOuse ...

حبيت أوي تحليلك لإختيارك لتلات أفلام ...
...............
وربنا يكرمك ويوفقك ويسعد قلبك ويطمن بالك

تحياتي الملونه لك
^_^

  Kontiki

الثلاثاء، 28 سبتمبر، 2010 10:55:00 ص جرينتش+3

:) love is great
على فكرة اول مرة اشوف مدون شاب بيعيش فى الاقلام الاجنبى و الحب فى الافلام الاجنبى وبالنسبة له مثل اعلى و تفضل مأثرة علية زى مانا بعمل :D
i love 50 first date :) 

  طوبه فضه وطوبه دهب

الثلاثاء، 28 سبتمبر، 2010 10:55:00 م جرينتش+3

على فكره الافلام شفت منهم الاخير بحبه اوى والموسيقى اللى فى المدونه اكثر من رائعه بس الصوره بقى يعنى مش قد كدا هى تحفه بس يادوب ههههههههههههه ربنا يخليكم لبعض وسلمت يداك ويارب ديما فى احسن حال وكلك حب ورومانسيه

  Noha Saleh

الأربعاء، 29 سبتمبر، 2010 4:29:00 ص جرينتش+3

الفيلم الاولانى هحاول اشوفه
الفيلم التالت فى فيلم مصرى شبهه كدا بس ساذج شوية اسمه ميكانو
الشىء المشترك بين التلات افلام هو الرومانسية المفرطة
اتمنى الرسالة توصل للانسانة المقصودة وتستوعبها كويس

  ويكا

الأربعاء، 29 سبتمبر، 2010 12:21:00 م جرينتش+3

اجدع حاجه فيك ياعم رامى معايا

انك مش بتدينى اى فرصه اعلق.

كل ما يجى على بالى سؤال او تعقيب على كلامك ، الاقيك كاتبه وبتجاوب عليه.

طب اعمل ايه انا بقى ، عايز اعلق يبنى ارحمنى بقى.

ههههههههههه

على فكره انت حفزتنى جدا للفيلمين الاولانيين.

  hana

الخميس، 30 سبتمبر، 2010 12:59:00 ص جرينتش+3

هي الناس الحساسة أوي بتبئا إحساسها عالي بكل حاجة ولو قصة فيلم بتشوفها

عارف الفيلم الاخير أنا وانا باشوفه وباشوف اصراره على وجوده وياهاوحبه ليها رغم ذاكرتها اللي كل يوم تروح
الحب إحساس جميل
على فكرة أنا كمان باحس وبتأثر أوي بالقصص الرومانسية اللي فيها مشاعر القلوب جوا العيون والتصرفات والاحساس

جميل البوست

  Ms Venus

الخميس، 30 سبتمبر، 2010 5:45:00 م جرينتش+3

افلام جميلة اوى فعلا يا رامى


وبحب معاهم كمان اوى فيلم

walk to remember

  re7ab.sale7

الخميس، 30 سبتمبر، 2010 11:27:00 م جرينتش+3

آآآآآآآآآآآه يا راااامي
معلش بجد انا اسفة الاول عشان والله الفترة اللي فاتت مش كنت متتابعاك بس غصب عني والله الكهربة اللي يخرب بيتهم بيقطعوها دايما لغاية ما زهقت وحسيت اني مش عايشةفي الدنيا ...
الافلام الثلاثة احلي من بعض بس الفليم الاخير ده شبه فيلم ميكانو لتيم حسن ونور وخالد الصاوي بتاع الذاكرة المؤقتة ...انا مشوفتش الاجنبي ده بس اكيد هشوفوه هدور علية والفيلمين التانين انا مش هتكلم عنهم كفاية .....اهههه...تنهيدة كدة ...
اية معني كدة انك هتروح لقاء اسكندرية يعني مش هنشوفك في لقاء القاهرة ....؟ خسارة كان نفسي اشوفك واتكلم معاك لاني مش هروح اسكندرية لكن هحضر لقاء القاهرة .....كنا علي فكرة انا وغادة محسن في سيرتك من يومين ....بالخير والله ...بتمنالك كل خير ....

  re7ab.sale7

الخميس، 30 سبتمبر، 2010 11:30:00 م جرينتش+3

امممم
نسيت اقولك الصورة روووووعة بجد
بس سؤال رخم حبتين ...مش ليك انت لوحدك علي فكرة ....احنا لية دايما بنختار افلام واغاني اجنبي في التعبير عن حالتنا او عن شيء ما ...مش بنختار عربي ...لية ...؟ هل ده معناه فقر عندنا ؟ او مثلا عدم اقتناع ...؟ ولا شتايفين ان الاجنبي معبر اكتر ...؟ والا هي عقدة الخواجة ...؟ والا اصلا مفيش افلام عربي قدرت تخلينا فعلا ننشد ليها ونعجب بيها لدرجة اننا نفكر بيها بالشكل اللي انت كتبت به ده ...؟

  The Queen

الخميس، 30 سبتمبر، 2010 11:42:00 م جرينتش+2

الثلاث افلام احلى من بعض
انا شخصيا بحب City of Angles
و Lake House
اكتر
فكرتهم رااااائعة
تحياتي لذوقك الراقي

  قهوة بالفانيليا - شيماء علي

الجمعة، 1 أكتوبر، 2010 7:06:00 م جرينتش+2

ثلاثيتك ناقصها فيلم :)
Serendipity
.....
بوست حلو ..
بحب الافلام دي جدا جدا جدا و خصوصا The lake house
بحس انه غريب و صعب و مستحيل بس بيثير مشاعري .. و بكيت في آخره لما قعدت ساندرا بولوك تبكي قدام صندوق البريد
ياااااااه يا رامي .. بجد اختياراتك حلوة

  ali younes

السبت، 2 أكتوبر، 2010 1:10:00 م جرينتش+2

الاخ رامي
نداء سريع من اخوك المخلص
ارجع بسرعة لزمنك واركب كبسولة الزمن وسرع الزمن عشان توصلنا بسرعة
وبعدين مش معقول يعنى أحنا في زمنا دة وانت في زمن تاني وعمالين نكلم بعض
أرجو منك التعقل وان ترجع لصوابك وترجع لزمنك وبلاش تهور

وانت كمان قلبتلنا المدونة ناس من ازمنة مختلفه كلهم رجعوا لورا وهربوا من الواقع
هههههههه
بمزح طبعا وشيئ من الفكاهه علشان الدنيا تحلو
تحياتي لك

  Lady E

الاثنين، 4 أكتوبر، 2010 3:18:00 ص جرينتش+2

الفيلمين التاني والتالت بحبهم جدا

اما the lake house سمعت عنه وكنت لسه بفكر أشوفه وأكيد بعد كلامك عنه هشوفه

طريقة الربط بين ال3 أفلام جميل جدا

والخيال في الأفلام بيخلي الحياة أحلى مش لازم كل حاجة في دنيتنا تبقى واقعية ساعات كتير الخيال بيبقى احلى

  نهر الحب

الاثنين، 4 أكتوبر، 2010 3:26:00 ص جرينتش+2

رامى
نسيت اقولك اننا اتقابلنا فى ابو الريش

  Timo..

الاثنين، 4 أكتوبر، 2010 3:11:00 م جرينتش+2

روميوووو..
حلوة قووووي الافلام دي..
وانا عند وعدي برضة من قبل البوست ده وانا باجهز فيلم Lake house
بس انت كتبت عنه حلو قوي :)

انا مبسوط جدااااا اني شوفتك في اسكندرية..
كنت منور بجد :)

  فاتيما

الثلاثاء، 5 أكتوبر، 2010 10:24:00 م جرينتش+2

يا راااااااامى

انتا فين يا بنى طمننا عليك

انا عمالة اضرب اخماس ف اسداس

اللاب توب اتسرق منك
منتا راميه ف اى حتة و على ييييييدى


طب خلاص
يرد ع الناس ف الموبايل

الموبايل مقفول و مش عارفين يوصلولك
يكونش الموبايل وقع اتكسر

طب ما هجيب واحد تانى عادى

تكونش فلوسك اتلطشت

يووووووووه

كل افكارى افلام اكشن
يخربيت كدا

طب يبقى انتا ماشى زعلان من حاجة و حد ضايقك ولا حاجة ؟

قولى لو كدا
اهدرلك دمه على صفحة مدونتى و اوريله شغله ....

طب دنتا طيب ومحدش يستجرى يزعلك
فيه ايه بس ؟

ممكن تطمن اخواتك عليك الله يخليك
انا ساكتة بقالى يومين و قولت هتظهر و تطمنا و كدا مش نافع


يا رب تكون بخير
ان شاء الله


هستنى تعليقك


كان نفسى ارغى معاك يا ر ر
معلش تتعوض
المهم نطمن عليك

يلا همشى بقى
متخلنيش اجى تانى اقول فينك
لحسن المرة الجاية هيبقى معايا العصاياااااا

اهوش بس مش هضرب
عييييب
دنتا ر ر الغالى

يلا خلينى امشى بقى


سلاااام

  Ramy

الأربعاء، 6 أكتوبر، 2010 1:29:00 ص جرينتش+2

شكرا جدا جدا جدا ليكوا كلكم

و اسف جدا جدا جدا

على عدم متبعتى أو ردى ع الناس

بجد مزنوق جدا فى الشغل

شكرا ليكوا جدا