هرغى معاكم شوية ... و معايا شويه (: و معها كمان....

البوست طويل شويه معلش
طيب يا عم رامى صدعنا
حاضر (:
هأحكى حاجات يمكن فى ناس متبعانى من الأول عرفاها
و هوضحها للى مش عارفها
فى الأول أنا عملت المدونة دى علشان أكلمها هى بس
أقولها انى بحبك أنت بس
و دة و ضحته كتير
يمكن الموضوع مش عاوز يوضح
أو بالأصح أنا مش عاوز أستسلم
طب ياعم رامى و مادام عارف ان الموضوع خلاص
هقولكم أيه و هأحكى أيه
أنى أنا حبتها
طب ماشى أيه الأختلاف ما الناس كلها بتحب و ممكن متتوفقش
يمكن أنتوا حاسيته من اللى بأكتبه أن لسه الموضوع موجود
أه هو موجود جوايا
الحب بالنسبة ليا شيىء مختلف
يعنى كان و أصبح
يعنى أيه يا عم رامى فاهمنا
يعنى كان الحب مفهوم عندى مش صح
هى فهمانى برضه
و بعد كده بقى زى ما أنا شيفه و حاسس بيه دلوقت
أنا كنت شايل الحب من قاموسى عارفه بس مش حاسه
بحب أه
بس بحب الحب بتاع كل الناس
مش الحب الخاص بتاعى
حد فاهم حاجة ؟؟
المهم
الحب عندى مش مجرد كلمة
بحبك
الكلمة دى هتحسها هتشفها قبل م هتسمعها
كان نفسى هى تشفها كان نفسى تحسها
قبل ما أقولها
الحب أنى أزول لأجل من أحب
مش كلام رومانسى
يا جماعة أنا قبلها كنت ضايع
بمعنى الكلمة
أه الناس شايفه رامى
ملتزم
حبوب
بيشتغل
بس أيه جوه رامى
ايه اللى عاوزة رامى
ظروف حياتى كانت كلها بتلعب أن الأنسان دة يطلع
من أحسن ما يكون
طب أيه المشكله بقا يا عم رامى
مش عارف
بس اللى كنت محتاجه أنى أحب و أتحب من حد
طب م يا رامى اللى حواليك كلهم بيحبوك و بتحبهم
بس مش عارف
كنت حاسس ان المفروض بيكون فى حب تانى مختلف
حب بس مش عارف هو أيه
طب ليه يا عم رامى محولتش تحب قبل كدة
أقولكم أنا محولتش أحب
لأنى عارف انا مش هرتبط
الحب عندى مش مُزة و تليفونات و مواعيد
هو هيكون أرتباط
هيكون حياة هتتبنى
يعنى هدخل العلاقةو دة اللى ف بالى
طب و أيه اللى منعك يا عم رامى
يعنى واحد فى ثانوى و لا كليه
و لسه معملش أى حاجة فى حياته
هيتنيل على عينه ليه
دة يمكن دة سبب من ضمن أسباب
الباقى هى عارفه
طب و أحنا ياعم
معلش انا هأحتفظ بالباقى لنفسى معلش
سامحونى
طب ما علشان نعرف نقيم الموضوع يا عم رامى
أنا بأحكى معاكم علشان أوضح الصورة
بس كدة يا عم رامى انت وضحت الصورة اللى انت عاوزها بس بدون
ما يكون لينا اى فرصة نكون الصورة بتاعتنا
معلش أسف مش هاقدر أرجوكم
عارف ممكن أكون سمج شويه بس أستحملونى
يمكن انا حاسس أن سبب ان ممكن اكون فشلت فى انى اوضح حبى
هو التسرع
يعنى المفروض كنت بينت بأفعال و بعد كدة قلت
مش عارف بس...
عارفين
الحب دة جالى زى صاعقة
كان كالموج الهادر

مكنتش منتظرهُ خالص
مكنتش مرتب له
جالى يمكن فى فترة كنت عاوز أحب
طب يمكن علشان كلامها كان كويس كان معايا
طب ما كل الناس بتكلم كويس معاك هتحب الناس كلها
طب يمكن علشان أتعطفت معاها
لأ لأن أنا دى فى شخصيتى أنى بتعاطف حتى مع ألد أعدائى
طب أيه التفسير المنطقى
طبعا أنتِ لو بتقرى دلوقت هتكونى منتظرة كلام يوضح
بس صدقينى معنديش أكتر م اللى قلته
كلها مشاعر كان نفسى أوضحها بأفعال
طبعا هى رفضت من أول مرة و من تانى مرة
وبأسباب عارفها و أقدر أفهمها بس بقول يمكن لما تلاقى حبى ده
يمكن تغير رأيها
طب يا عم رامى و هتفضل رابط نفسك جنبها
ايوة ما هو انتوا مش فاهمين
أنا مش هأقدر أحب غيرها
مش هأعرف أحب غيرها
يعنى يا رامى دة السبب الوحيد
أزاى يعنى
أن انت مش هتعرف أو مش هتقدر تحب تانى
طب و دة مش سبب كافى
مش كافى
أنها تكون هى كل الحب اللى جوايا
مش عارف اوصلها ليكم أزاى
طب و حياتك و مستقبلك و..و..و..و
مفيش أى مشكلة و هو لازم أنى بحب حد لازم أضيع مستقبلى
لأ طبعا
و هوضح حاجة كمان هى بسببها انا عملت حاجات كتيرة أيجابيه فى حياتى
يمكن علشانها بس أهه حاجات أيجابيه برضه
يعنى بأمانه يا جماعه صدقونى
الحاجات اللى باكتبها دى لأنى بس مش معها
يعنى انا لو هفضل كده طول عمرى هفضل مش هضايق
يمكن أنا عاوز أعمل حاجات يمكن تقربها منى
متقلقيش
مش هعمل أى شيىء ممكن بس يحسسك بضيق

الحب مش عذاب صدقونى بس يمكن هى جت معايا كده
يمكن أكون زى برعى يا تيرز (:
يمكن يكون الفيلم خلص يا وصف الأحساس
يمكن أكون زى أغنية قارئة الفنجان يا أحمد
يمكن و يمكن ويمكن
بس مش قادر صدقونى
مش عارف
و حاولت علشان يمكن يكون أنتوا بتتكلموا بمنطق
لقتنى بأهرب من نفسى
عارف يا حسنى الرد بتاعك ممكن يكون وصف حالتى
أنا عايش أتنين
عايش ليها
و عايش بمنطق للناس
بس مقدرش حتى هنا أكون بمنطق
هنا المكان الوحيد اللى بعرف أكلمها فيه
هنا المكان الوحيد اللى بقول اللى مش عارف أقوله
مش عارف انا نيلت الدنيا ولا لأ
يا عم رامى أحنا مفهمناش برضه
الحاجة الوحيدة اللى عاوزكوا تفهموها
هى ملهاش ذنب فى اى حاجة
بعد كده انا حاله مستعصيه
تعرفوا دكتور كويس

يارب مكنش ضايقت حد و حتى اللى ذكرتهم
أنا قلت أسماء علشان أطمنهم
علشان انا عارف انهم قلقانين عليا
طبعا انا بطمنكم كلكم
يارب أكون عرفت أكلم أو أشرح اللى جوايا
أرجو محدش يكون زعل انا مش مضايق
أنا بس حبيت أتكلم معاكم
بس
تنهيدة عميقه و طويله
و الأغنية دى بأهديها لها


46 التعليقات:

  richardCatheart

الخميس، 16 سبتمبر، 2010 11:35:00 م جرينتش+3

حرام عللللللللللللللللللللللللليك وكمان بعد الكلام دا نزلى بأحبينى بلا عقدى يا خرااااااااااااااابى

انت قول كلمه مشفهمين على لسانا كاقراء كتير

بس بقولك لاء انا فاهمه ياسيدى كل اللى انت فيه دا

اصل مانفعش
اصل حصل ظروف
اصلها الدنيا جت معايا كده
اصلهل واصل واصل
وبالرغم من كده بتحبها ومش لاقى مبرر
لاى حاجه
هو دا الحب ببساطه مافهوش مبررات قضى
وزى مابيجى لوحده يمكن يروح لوحده

بس ارجع واقولك ماتستبعدش حاجه
وارد اوى تحب تانى واكتر من الاولانى

ربنا يسعدك ويريح قلبك

  mrmr

الجمعة، 17 سبتمبر، 2010 12:00:00 ص جرينتش+3

ارغى وفضفض براحتك
ولو عايز تبكى ابكى
بس اهم حاجه تختار الشخص اللى تبكى على صدره
ابكى واتنهد وخرجت اهاااااتك
لحسن يجى اليوم اللى تتخنق بجد ويحصل عندك حاله كبت
وتدور على طبيب نفسى يكون هو اصلا بيتعالج من مرض نفسى

ربنا يقرب لك البعيد يا رامى

  мαησηα

الجمعة، 17 سبتمبر، 2010 12:07:00 ص جرينتش+3

نفسى اقرا البوست ده والبوست اللى قبله بس مش لاحقة مشغولة جدا للاسف يا رامى وانا فاكرة التاج والله مش ناسياه

المهم يا سيدى بص ع انبوكس الياهو بتاعك بعتلك ايميل مش اوف لاين ضرورى تقرا اوك ورد عليا قولى رايك ايه ؟

  محمود(باحث عن حب)

الجمعة، 17 سبتمبر، 2010 12:22:00 ص جرينتش+3

معلش
انا مش عارف اقرا
علشان
من موبيل
بس
بقولك
وحشتنى

  Tears

الجمعة، 17 سبتمبر، 2010 12:28:00 ص جرينتش+3

رامى انا ح قولك رايى ولو انى مش عارفه ان كنت فهمت صح و لا غلط

بس انا اللى فهماه انك حبيت و هى مش رحبت بده و بالتالى انت قاعد مستنى و بالتالى ح ابنى رايى على ده على افتراض ان ده صح

اكيد لو واحدة لم ترحب بحب قوى كده فعندها اسباب...طبعا موضوع الكيميا ده مهم لكن فيه اكيد اسباب منطقية و بالتالى ليه ما تحاولش تقرب و تتناقش بوضوح و شفافية جايز هى فاهمه حاجة غلط او فيه حاجة مش وصلاها

جايز يكون فيه حاجة تقدر تعملها تريحها و بالتالى تريح نفسك و تتجمعوا بدل العذاب

قصدى واجهة المشكلة بدل ما تجمدها

و لو لقيت ان مستحيل...مرتبطة مثلا...يبقى ما ينفعش و مش ح تقدر تكمل عشان مش تخلص على نفسك و عشان ح يكون بلا أمل و اكيد الحياة مش ح تقف و اللى خلقها قادر يخليك ترتاح مع حد تانى و تبنى اسره


دمت محب

  Haytham Alsayes

الجمعة، 17 سبتمبر، 2010 12:32:00 ص جرينتش+3

والله يارامي
مش عارف اقولك ايه
بس انت في البوست دة فكرتني
باسماعيل يس لما قال الحب بهدلة
ههههههههههه
متزعلش مني بس مش اعرف افيدك لانني مجربتش
الحكاية دى قبل كدة

تحياتي ياعاشق ياجميل

  لـــولا وزهـــراء

الجمعة، 17 سبتمبر، 2010 12:49:00 ص جرينتش+3

سااااااامي ربنا يسعد قلبك معاها او مع غيرها هو ادرى بيك منك على فكرة لو ليك نصيب معاها محدش هيقدر ينتزع نصيبك منك هو النصيب محفوظلك
على فكرة فيه شئ بيجري ورا الانسان مش الانسان اللي بيجري وراه وهو الرزق
..حلو قوي اغنية كاظم الساهر تحفة ويارب تكون الاغنية وصلتها ووصلتلها المعاني اللي انت مقدرتش تقولها
لولا

  أع ـقل مـ ج ـنـونــة

الجمعة، 17 سبتمبر، 2010 1:07:00 ص جرينتش+3

هو الحب كدا
نتمناه
ونقع فيه
ونتعب
ونغرق في بحره
ومنعرفش نوصل لشط الامان
فـ بنقضيها أحلام .. وتمني
واعتذارات للحبيب البعيد
اللي معاه قلبنا وروحنا وعقلنا ..
حتي جناننا !

يــاه .. انا اصلا كنت نسيت يعني ايه حب ؟
حاطة القفل بقالي زمن وماسكة فيه بايديا واسناني عشان مش هاعرف تاني أحب !

بجد .. حقيقي ..

ربنا معاك ويريح قلبك :))

  أتنين حبيبين

الجمعة، 17 سبتمبر، 2010 1:23:00 ص جرينتش+3

أولآ

الاغنيه جميله اووى لمست قلبى من جوا

تاانى حاجه حسيتك اوى

بتمنا انك بعد ما فضفضت تكون ارتحت انت كمان

يمكن نفس الحاله اللى انت بتمر بيها هى حالتى الوقتى

مش عارفه خايفه اووى من شىء ما؟

ايه هو ؟ الله اعلم

ربنا هيكرمك واكيد هيعوضك كل الخير
واكيد قريب اوووووووووووووووووووووووووى

خلى بالك من نفسك يا رامى

تحياتى
الحزينه توتا

  mora

الجمعة، 17 سبتمبر، 2010 2:13:00 ص جرينتش+3

هاي
اتمني انها تكون شايفه الكلام
اللي انت كتبتوا ده
وان شاء الله تحس بمشعرك ناحيتها
ومتضيقش الكل بيتجرح من حبايبهم
مش انت بس
ربنا يكون معاك
وان شاء الله يعمل كل اللي شايفه صالح ويوفقك

  momken

الجمعة، 17 سبتمبر، 2010 5:27:00 ص جرينتش+3

ماشى يارامى

كل ده بوست بتاددبنى علشان جا ازورك

مش كفايه الباب مش عاوز يتفتح وبقالى ساعه على مدخلت المدونه كمان بوست بالمتر

بس معلش انت غالى اساسا

بص ياسيدى كل مشاعرك الى محكيتهاش ولا جيت نحيتها اساسا وبتوهمنا انك شرحتها
محترمه وجميله جدا
واحترامك للانسانه الى اخترتها شىء عظيم

ولكن اعلم يا اخى ان الحب قرار
نعم الحب قرار من يحب ولا يعنيه اراده الاخر الا اذا كان الاخر يحب غيره
اما اذا لم يكن مرتبطا
فلا يعنيك ارداتها فى شىء
ما عليك الا ان تعلن عليها الحب
وتجهز جيش تحشد اسلاحه احساسك وتعلن قيام الحب
ولن يضع الحب اوزاره الا وهى مستعمره لك وانا مستعمرها قلبا وقالباً شكلاً وموضوعاً

غير ذلك مضيعه للوقت والمجود والمشاعر

حضرتك قلت انك مرتاح بانك بتحبها وراضى بالوضع ده و راضى بيه

بس اوعدك احتك ورضاك مش دايمين
افرض غيرك خطف قلبها
ستاكلك الغيره والالم ويعتصرك الحزن
اتخطبت او اتجوزت ربما تموت كمدا لاقدر الله

الحاله الى انت فيها يارامى تسمى حاله الحب والا حب على غرار حاله الحرب والاحرب
ودى حاله مؤقته واهيه وهايتها محتومه بارده جدا

فى الهايه عجبنى جدا حوارك مع نفسك او معانا واتخليت اسئلتا ورديت عليها منولوج هايل
واسلوبك فى الكتابه محرم بحق

وانت حد من اطيب ما قلبلت

دمتى بمنتهى السعاده


تحياتى

  Noha Saleh

الجمعة، 17 سبتمبر، 2010 5:48:00 ص جرينتش+3

بجد مش عارفة ارد اقول ايه
فعلا ماعنديش تعليق اقوله
عموما الكلام ده بما انه طالع من القلب وصادق جدا يبقى اكيد هيوصل للانسانة المقصودة وهى اكتر واحدة هتفهمه

  Baskouta

الجمعة، 17 سبتمبر، 2010 9:04:00 ص جرينتش+3

Just Nothing can be said
Wish you peace of heart and mind
Baskouta

  الحب الجميل

الجمعة، 17 سبتمبر، 2010 10:46:00 ص جرينتش+3

صباح الرغى يا عمونا
خد راحتك يعنى لو مرغتش معاك ومعانا ومع احلى ملاك هترغى مع مين
هههههههههه
والله يا رامى انا نفسى ارغى كدا زيك بس لو ابتديت ارغى هخلص ورق مدونتى وادخل على ورق المدونات التانيه

ربنا يسعدك يارب ويناولك اللى فى بالك ويريح قلبك ويكرمك خير فى حياتك
يلا يا عم رامى دعوة أم أهى فى يوم الجمعه كمان على الصبح كدا بس يارب الدعوة ترشق
ههههههههه
اضحك محدش واخد منها حاجه مع انك بتضحك حتى وانت مضايق ودى حاجه جميله فيك
يارب اشوفك دايما مبسوط
دمت فى حفظ الرحمن يا أخى العزيز

  adel

الجمعة، 17 سبتمبر، 2010 10:51:00 ص جرينتش+3

يابن الايه يالذينا :))

ياعم حب وسيب نفسك خالص
وانا عشقنا فان في وجهنا نظر

  Ramy

الجمعة، 17 سبتمبر، 2010 3:09:00 م جرينتش+3

ريتشارديه

مش قصدى صدقينى

أن انتم مش فاهمين

لا أنا قصدى أنا مش قادر أوصلكم الكلام

و لازم تكونى فاهمه مش سواحليه على رأيى دكتورة ستيته (:(:

الله يخليكى يا ريتشارديه ع الدعاوى الجميله دى

(:

منورانى جدا (:

  Ramy

الجمعة، 17 سبتمبر، 2010 3:20:00 م جرينتش+3

MRMR

أهوا ما انا عمال اصدعكم

(:

بس اللى يستحمل بقى (:

ما انا قلت تكونوا انتوا سمعتوا عن دكتور كويس

(:

يارب

بتنورينى دايما يا مرمر (:

  Ramy

الجمعة، 17 سبتمبر، 2010 3:40:00 م جرينتش+3

أختى العزيزة
منى

ولا يهمك كفاية تجى تنورى المدونة (:

و يارب تتوفقى فى مشغولياتك

و تتمميها زى ما أنتى عاوزة

اه شفتها لسه دلوقت

(:(:

مش عارف أعمل حاجة

دا انا خيبة تقيلة بجد ههههههههه

شكرا جدا جدا جدا

بجد فرحت جدا

هحاول بدون خساير للبوستات (:(:(:

  Ramy

الجمعة، 17 سبتمبر، 2010 3:51:00 م جرينتش+3

محمود

و لا يهمك يا جميل

ترجع بالسلامة أن شاء الله

منورنى (:

  Ramy

الجمعة، 17 سبتمبر، 2010 4:03:00 م جرينتش+3

تيرز

كلامك صح فى كل اللى قلتيه

هى مش مرتبطة لو كانت مرتبطة كان لا يمكن أفكر فيها

علشان كنش سبب فى تعاست حد و كمان مش هيكون صح من وجهة نظرى و كمان لو حبتها مكنتش هجاهر بالحب ده

المشكله أن أحنا أتكلمنا بس مش عارف أقتنع

فبحاول يمكن مع مرور الوقت تتغير وجهة نظرها

متخافيش يا تيرز صدقينى أنا مش مجنون قوى (:(:

منورانى دايما (:

  Ramy

الجمعة، 17 سبتمبر، 2010 4:07:00 م جرينتش+3

هيثم

على فكرة دا كان مجرد تساؤل

انا فتحت اللينك و هقراه

و على فكره انا مش بزعل من اى حد حبيته و أحترامته بأمانه

و هتجرب و نتفرج عليك بقا
(:(:

التحية ليك يا صديقى

و مهما كانت القصة بها من معانى ثق
لن اتغير
(:

منورنى يا باشا (:

  Ramy

الجمعة، 17 سبتمبر، 2010 4:19:00 م جرينتش+3

لولا و زهراء

لولا أزيك

كنت هعرفك من ساااامى (:

كلامك صح جدا

بس عارفه الأنسان أعمى أن يشوف حكمة ربنا فين

ربنا يفتح عينى

كويس أن الأغنية وصلت حاجات مكنتش قادر أقولها

منورانى دايما (: لولا الرقيقه

  Ramy

الجمعة، 17 سبتمبر، 2010 4:24:00 م جرينتش+3

أعقل مجنونة

(:

أنتى وصفتى اللى حاصل

و اللى هيحصل مع اى حد بيحب بجد

الله يخليكى ع الدعوة الجميلة دى (:


و انت بأذن الله قريب تلاقى اللى يستحق حبك (:


منورانى دايما (:

  Ramy

الجمعة، 17 سبتمبر، 2010 4:32:00 م جرينتش+3

أتنين حبيبين

توتا

كويس ان الأغنية عجبتك

صدقينى انا مش حزين و لا مضايق و لا حاجة

أنا حبيت اتكلم معاكم بس

انا مش خايف الحمد لله

يارب يا توتا يبعد عنك الحزن

و الخوف

ربنا معاكى دايما

منورانى (:

  Ramy

الجمعة، 17 سبتمبر، 2010 4:37:00 م جرينتش+3

mora

طبعا باتمنى تكون شايفه الكلام

و انا مش مجروح خاااالص

و لايمكن هتجرح منها ابدا ابدا

بجد بأمانة

ربنا يعمل اللى فيه الصالح

منورانى (: يا مورا

  Ramy

الجمعة، 17 سبتمبر، 2010 4:49:00 م جرينتش+3

momken
(:

أنت انتقمت بكومنت قارب ان يكون بوست (:

شوف كلامك منطقى جدا على فكرة بس مش عارف

يمكن لن دى اول تجربه ليا فمش قادر أخد خطوات صحيحة

لكن أطمئن لو تحرك قلبها ساكون موجود

سأكون فى مقدمة ما تراهم

ساكون من تحرك لأجله قلبها

أتمنى ذلك

لا تخف مهما كانت النتائج لن ألقى عليها بلعنات قلبى

سأظل أذكرها كما هى

كما فى قلبى

على فكره انا مش بتفلسف او بحاول اكون رومانسى فى نظر اى حد

انا باكتب اللى حاسس بيه و بأتمناه

شكرا ليك جدا جدا

الله يخليك انا مش طيب انا بحاول اكون انسان بس

دمت بخير و سعادة

و اتمنى تنورنى دايما يارب

(:

  Ramy

الجمعة، 17 سبتمبر، 2010 5:00:00 م جرينتش+3

noha saleh

كفايه ان انتِ نورتى البوست بس (:

زى ما انتِ قلت هى اكتر واحدة هتفم الكلام ده

منورانى دايما (:

  Ramy

الجمعة، 17 سبتمبر، 2010 5:05:00 م جرينتش+3

بسكوته

(:

بجد شكرا ليكى

للدعوة الجميله دى

الحمد لله عندى السلام فى عقلى و فى قلبى

منورانى ببسكوتاتك (:

  Ramy

الجمعة، 17 سبتمبر، 2010 5:11:00 م جرينتش+3

الحب الجميل

(:

على رأيك هو هصدع مين غيركم

طب استنوا عليا بس (:

أرغى شوية شوية

(:

أرغى و أحنا سامعيين

الله يخليكى ع الدعوة الجميله دى

منك لباب السما طوالى

(:

صدقينى انا مكنتش مضايق انا و بأكتب لالا خالص

و كمان و برد عليكم انا مبتسم جدا

انا بس رغيت معاكم بس (:

فى حفظ الرحمن اختى العزيزة

منورانى علطول (:

  Ramy

الجمعة، 17 سبتمبر، 2010 5:13:00 م جرينتش+3

عاااادل

أزيك يا عم

كتر خيرك بجد أستحملت أزاى يابنى تقرا دة كله من رخامه

بس شفت لذيذ لذيذ يعنى

مش اى حاجة

(:

ادينا بنعمل اللى عالينا يا عادل و الباقى على ربنا

منورنى دايما يا دُولة (:

  مفيـــــــــــــــــــــــــد

الجمعة، 17 سبتمبر، 2010 6:15:00 م جرينتش+3

السلام يا رامي
أنا بألف خير و أنت كيفك؟
إن شاء الله تكون بصحة و عافية
يا رامي العيب الوحيد في الحب هو أنه لا يستأذن يدخل للقلب مباشرة

  Baskouta

الجمعة، 17 سبتمبر، 2010 6:31:00 م جرينتش+3

مبرووووووك
مبروووووووك
النيووولووك
Very nice, calm color
that prevails tranquility.

تحيات بسكوتية بالالوان السماوية

  Ramy

الجمعة، 17 سبتمبر، 2010 7:21:00 م جرينتش+3

مفيد

الحمد لله ان بخير يا رب دايما

أنا تمام الحمد لله (:

دى المشكلة يا صديقى بيجى منغير ما تكون عامل حسابك (:

نورتنى يا باشا (:

  Ramy

الجمعة، 17 سبتمبر، 2010 7:23:00 م جرينتش+3

بسكوتة

كلاكيت تانى مرة

الحقيقة القالب جالى هدية

بس هتعرفوا المرة اللى جاية بقى

البوست اللى جى (:

بأذن الله

جميلة التحية دى باللون ده (:

منورانى دايما (:

  mrmr

الجمعة، 17 سبتمبر، 2010 9:32:00 م جرينتش+3

مبروووووووووووك النيولوك
معلش جايه متاخره
سماح النوبه

  Ramy

الجمعة، 17 سبتمبر، 2010 9:54:00 م جرينتش+3

mrmr

الله يبارك فيكى

ده هديه بس البوست اللى جى هقول ميين (:

منورانى علطووووووول(:

  ويكا

الجمعة، 17 سبتمبر، 2010 11:14:00 م جرينتش+3

يخرب عقلك يا عم رامى

ايه يبنى ، انت مشختف نفسك كده ليه؟

الموضوع مش للدرجه دى صدقنى ، انا كنت زيك كده برده فى الاول ، بس صدقنى ، بالايام هتلاقى الحياه مش كده خالص


بوست جميل ، واتمنى انك تكون ارتاحت شويه لما اتفكيت.

  NaDa

الجمعة، 17 سبتمبر، 2010 11:18:00 م جرينتش+3

مش شرط الصورة كلها توصلنا
ولا شرط نفهم كل حاجة
المهم إنك تتطلع ولو جزء من أحساسك
عشان ترتاح

ربنا يسعدم وتحقق كل اللى نفسك فيه

والأغنية دي روعة بجد ، أنا بعشقها
أختيارك عالي :)

  فشكووول

السبت، 18 سبتمبر، 2010 1:04:00 ص جرينتش+3

ازيك يا رامى
يا عينى عليك
هو طبيعى ان يزوب الحبيب فى حبيبته والعكس
بس مش قادر افهم ايه المشكله
وعشان يا سيدى اريحك .. لسه الزمن بدرى
يعنى ممكن تعملها تانى
ويكون فيه الشفاء
ومش انت لوحدك
فيه كتييييير زيك
بس

  amiral cafe

السبت، 18 سبتمبر، 2010 2:54:00 ص جرينتش+3

روحي من الجرح طاحت



مااطيح لو روحي من الجرح طاحت
ياليت لي نفس اذا ضاقت تبوح من هم الليالي و استراحت مجروح من وين مااروح ماراحت جروحي ولا الايام راحت ولا استراحت

  ابراهيم رزق

السبت، 18 سبتمبر، 2010 12:31:00 م جرينتش+3

ياللى عرفت يوم وانطوى
حسك تقول مشتاق لنبع الهوى
حسك تقول مشتاق لنبع الغرام
ده الحب مين داق منه قطره ارتوى
عجبى
مش عارف اول بوست اقراه يكون بالشكل ده بس الحب نفسه شعور جميل جدا ويقال ان اجمل قصص الحب هى التى لم تكتمل
تحياتى وتقبل مرورى لاول مرة
ابراهيم رزق

  Ramy

السبت، 18 سبتمبر، 2010 1:12:00 م جرينتش+3

ويكا

(:

يا ابنى انا مكنتش تعبان بس حبيت أحكى بس

(:

انا مش متشحتف

انا بحب بس (:

نورتنى يا عسل (:

  Ramy

السبت، 18 سبتمبر، 2010 1:14:00 م جرينتش+3

NaDa

طب كويس الحمد لله ان قدرت أوصل اللى عاوزة

منغير ما أضايق حد

شكرا جدا دة من ذووقك (:

منورانى (:

  Ramy

السبت، 18 سبتمبر، 2010 1:26:00 م جرينتش+3

فشكووول

أستاذى العزيز شكرا(:

أكيد ف غيرى كتيييييير

ما انا من هذا العالم (:


نورتنى استاذى (:

  Ramy

السبت، 18 سبتمبر، 2010 1:31:00 م جرينتش+3

amiral cafe

عزيزى رؤوف

ما أجمل ما كتبت

بس صدقنى انا مش مجروح

أنا بحب

حتى لو محصلش نصيب مش هتجرح

لأن بجد أنا عشت أجمل لحظات عمرى (:

منورنى دايما يا رؤوف (:

  Ramy

السبت، 18 سبتمبر، 2010 1:41:00 م جرينتش+3

أبراهيم رزق

(:

جميلة الرباعية دى (:

ممكن يكون ده حقيقى ان اجمل قصص الحب التى لم تكتمل

علشان بتكون لسه شايله جواها حالة النقاء الصافى

شرفتنى و نورتنى بمرورك (: