عارفه .....

أولا أسف جدا لكم جميعا
لعدم المتابعة
أو الرد مؤخرا على التعليقات
أرجو تقبل أعتذارى
^^^^^^^^^


عارفة....
عارفة أنا مش عارف
يمكن علشان أنتى أول حد فى حياتى
اول حب فتحت له قلبى
يمكن علشان أنت عارفة عنى حاجات ميعرفهاش حد
غير ربنا
يمكن تقولى ما أنت عارف برضة
عارف
بس مش شايف
عارف
بس مش عاوز أكون زى أى حد
^^^^^^^^
عارفه هقولك حاجة أنا ممكن أكون متعاطف مع ناس كتير
أحب الشخص ممكن
بس الحب دة مش ممكن
أنى أكون فاهم حاجات كتير كدة مش ممكن
^^^^^^^^^^^^^^^^^
عارفة هفضل أحلم باللقا التانى
بس مش عارف هتمنى بيه عليا
ولا هتقولى لا دة باينه مجنون (:
أهاااا
عندك حق... بس صدقينى حالتى مش خطر
أنا حالة مستأنسة (:
صدقينى أنا غير العالم اللى ورايا دول خالص
(:
هههههه
مع الأعتذار للورايا
(:
^^^^^^^^^^^^
بس فى حاجة
أنا مش عاوز الحب دة يجرحك
ولا أنتى تتجرحى علشان مش بتحبينى
علشان شايفة حبى
متتجرحشى ليا أرجوكى
و لا تتجرحى منى
و فى الحالتين أنا هقف مش هتكلم تانى
دى رسالة ترجى
^^^^^^^^^^^^^^^^
عارفة لم أعرف نساء قبلكِ
وانتِ تعرفِ ذلك
و أدركت الأن لماذا هذا
لأكون كلى لكِ
^^^^^^^^^^^^^^^^^^
عارفة أنا هكون
مثل النذور
لكى
أو لا
أكون
^^^^^^^^^^^^^^^^
عارفة
و لا لسة مش عارفة
طب .. أنا هقولك على سر
بس مش عارف
هتتفجئى و لا لأ
السر
أنى
.
.
.
ب
ح
ب
ك
أيوة هفضل اقولها كدة
^^^^^^^^^^^^^^^^
عارفة أنا عمال أخد خطوات فى حياتى
بس
مش عارف بعملها و خايف
بعملها و خايف متعجبكيش
دة على أمل
^^^^^^^^^^^^^^^^^^^
لو في أمل واحد فى المليون قوليلى
و لا علشان مفيش
مش عايزة تجرحينى
مش عاوزة تقولى
مش عاوزة
تهزى كتفى و تقوليلى
كفاية
كفاية تعبتنى يا رامى
كفاية بتجرحنى بحبك
طيب حتى لما الكلام بقى هنا .... بس
برضة بيجرحك
أنا أسف أن حبى بيجرحك
أن حبى بيتعبك
أنا أسف
^^^^^^^^^^^^^^^^^^^^
عارفة
أنا بقول كدة لأن حسيت من كلامى معاكى
لما أتقبلنا ان ممكن يكون فى أمل
فى كلمة قلتيها أخر الكلام
أنت عمرى
مش عارف يمكن غلطت انى مسألتكيش
بس كل كلام انتِ حطاه عندك
بحسه موجهه ليا
ممكن يكون مش لأى حد
ممكن يكون عجبك
بس انا حاسه
^^^^^^^^^^^^^^^^^^^^^^^^^^^
عارفة
يا أجمل حلم حلمته
بالرغم أنى أنسان بدون أحلام
مفتكرش أنى فى يوم حلمت بشىء
يمكن كنت مستنى ألاقى الحلم اللى على قدى
و لقتنى حلمت حلم كبير
مش قادر أوصله
^^^^^^^^^^^^^^^^^^^
عارفة ...
يمكن أنا مش عارف أحب
سامحنى
لو كان حبى مش هو دة اللى أتمنتيه
و لا اللى حلمتى بيه
^^^^^^^^^^^^^^^^
عارفة ....
بفكر.. كدة
طب لو مكنتش حبيتك كان حصلى أية
يمكن حبك جه فى فترة أنتقالية
فترة شديدة الخصوصية
أنت فهمانى
أكيد
^^^^^^^^^^^^^^^^^^^^^^
عارفة....
أنا مشيت على قد ما مشيت
فى حياتى و فى طرقها
عارفة
زى المدينة اللى مفهاش حد
و الريح بتصفر فى ودانى
و اللون الأصفر قدامى
و الرملة فى عيونى تعبانى
دلوقت
أبتدت المدينة تتلون
الأبيض أكتر
الأخضر قدامى فى الخطاوى
الورد الأحمر طاير حواليا
الريح هديت بقت نَسيم
نَسيم شايل جواه ريحة ياسمين
بس فى حاجة ناقصة
لا مش الناس
مش الدنيا
ناقص
أن أنت تكونى جواها
جوا المدينة
اللى هى مدينتك
^^^^^^^^^^^^^^^^
عارفة....
يمكن أنا أول مرة أسرح كتير
أه صدقينى
بأسرح
ما ده طبيعى للى فى حالتك يا عم رامى
أيوة بس بأسرح فى أيه
أقدر أتكلم وأقول
أقدر أقول باللى بحلم بيه و أنا صاحى
لالالا مش هأقول
ده سرى
دة سر غير السر الأولانى
اللى قلته
دة سر بتشاركينى فيه
فمقدرش أقوله
^^^^^^^^^^^^^^
عارفة....
أخر حاجة
أنا بحبك يا ......
يا حبى
يا ترى الكلمة بقت بايخة
فقدت معناها
من كتر ما قلتها
من كتر ما كتبتها
من كتر ما قرتيها
شكرا لكل مشاعرى دى اللى كانت جوايا محبوسة
شكرا ليكى لأنك أدتيها حريتها
شكرا لأنك أدتينى
على الأقل
فرصة
أكتبها
شكرا
^^^^^^^^^^^^^^^^^

29 التعليقات:

  mrmr

السبت، 14 أغسطس، 2010 6:56:00 م جرينتش+2

الاغنيه كلماتها واحساسها عالى قوى
حسيت ان رامى هو اللى بيتغنى بها لمحبوبته

وكلماتك تهز الجبل يارب تهز مشاعر ملاكك
علشان نفرح بيك

نداااااااااء الى ملاك رامى
بيحبك صدقيه بيموووووووت فيكى
اللى خلانا احنا حسين بمدى صدق مشاعره تجاهك انت لم تحسى بها.. فكيف ؟
ارئفى بحال الوالد وارحميه من نار الحب اللى ولع الدره

رامى ربنا يفرح قلبك ويلم شملك انت وملاكك ويارب يسعد اوقاتك

  محمود(باحث عن حب)

السبت، 14 أغسطس، 2010 7:29:00 م جرينتش+2

السلام عليكم
كل سنه وانت طيب
يا رامى
وحمدا لله على سلامتك يا رامى
ايه الجمال ده
اولا اخترت كلمات الاغنيه الرائعه اللى بيغنيها على الحجار
وكتبت على نسقها
فكره رائعه
جميله
كلماتك

  كلام من قلبي

السبت، 14 أغسطس، 2010 7:51:00 م جرينتش+2

كلامك جميل اوي

واحساسك عالي

تسلم ايدك

تحياتي

  أع ـقل مـ ج ـنـونــة

السبت، 14 أغسطس، 2010 8:58:00 م جرينتش+2

الاغنية جميلة جدا جدا جدا

واحساس البوست كله روعة

حمدالله علي سلامتك ^_^

  Mona

السبت، 14 أغسطس، 2010 10:47:00 م جرينتش+2

معنديش تعليق ويارب يمنحك كل الحب دائما وأبدا - رمضان كريم وتحياتى

  أحمد شريف

السبت، 14 أغسطس، 2010 10:54:00 م جرينتش+2

عارف يا رامي بتذكرني بأغنية قارئة الفنجان .. مش عارف ليه ؟!

ربنا يرسي قلبك يا صديقي

أسعدتني مكالمتك للغاية وربنا يزيد المعروف دائماً بيننا يا رب

  الحب الجميل

السبت، 14 أغسطس، 2010 11:31:00 م جرينتش+2

رامى
كلماتك حقا مؤثره وتمس القلب
ربنا يحقق لك أملك فى القاء الثانى ويفضل حبها فى القلب ويدوم فى الخير و يجمعكوامع بعض ان شاء الله
ويسعدك يارب

لعل المانع خير ان شاء الله
دمت بخير

  داليـ ـ ـ ـ ـ ـ ــــا

الأحد، 15 أغسطس، 2010 2:24:00 ص جرينتش+2

لا بجد وجعت قلبى
بص هات من الأخر كده
وروح قلها الكلام ده فستو فيس
وشوف بقه هترد عليك تقلك إيه
وهتبقا حطيت النقط على الحروف
أو بص عندى فكره تانيه
أعمل زى الواد تامر حسنى خد بوكيه ورد وروح اتقدم ليها فى البيت
أه والله بكلم جد اوعا تفتكرنى بهزر انا متفاعله جدا لحل الموضوع ده

والله صدقنى لما تشوف ردها النهائى وتعرفه هترتاح كتير
حتى لو كان ضدك

واتمنا انكم تبقوا مع بعض يارب

  فتافيت

الأحد، 15 أغسطس، 2010 6:11:00 ص جرينتش+2

ايه ده كله بجد
أنا انبهرت باللي قريته
كل ده حب يا رامي.. بجد يا بختها بيه
ويارب تكون حساه وفهماه.. وتحافظ عليه
ماعنديش تعليق بجد يليق
كلامك احلى كتييييييييير من اغنية الحجار
عارف انا لو اعرفها.. هاروح اقولها انتي لازم تبقي عارفة انه بيحبك بجد

  ميرا ( وومن )

الأحد، 15 أغسطس، 2010 1:12:00 م جرينتش+2

أزيك يا رامي


ديماً بتنجح أنك تخرجني عن صمتي بصدق مشاعرك

ومبقدرش أجي هنا وأقرا وأمشي

دمت بخير
دمت بصدق مشاعرك ورقتك

  لـــولا وزهـــراء

الأحد، 15 أغسطس، 2010 4:13:00 م جرينتش+2

ساااااااااااااامي ..ذو الاحساس المرهف والمشاعر الصادقة النبيلة كلامك لازم يوصل لقلبها على طووول بدون اي حواجز ولا عقبات ولا استأذان لانه طالع من جوا جوا جوااااااااا قلبك الرقيق


"ولا هتقولى لا دة باينه مجنون (:
أهاااا
عندك حق... بس صدقينى حالتى مش خطر
أنا حالة مستأنسة (:"

ضحكتني قوي ربنا يسعد قلبك ويعزك يارب يعزك يارب يعزك وكل الخير يكون عندك انا بدعيلك اهو وانا صايمة (:

لـــولا

  لـــولا وزهـــراء

الأحد، 15 أغسطس، 2010 4:14:00 م جرينتش+2

سامي اسفة اني مش بتابع زي الاول ان شاء الله هنظم وقتي وانتظم في المتابعة ادعيلي عشان انا عندي مذاكرة وامتحانات مهمة ادعيلي متنساش
لولا

  ELMOSTAFZ

الأحد، 15 أغسطس، 2010 5:33:00 م جرينتش+2

بص انا رأيي من رأي داليا ، انتا تروح و تقولها الكلام ده فيس تو فيس :) بدل ما تقوله للي يسوي و اللي ميسواش :) :)
تعرف انا فضولي ناحية ردها علي كلامك أكبر من مفعول الكلام نفسه ، لإن مش أي واحدة هاتتأثر بالكلام ده إلا لو كانت بتحبك و مصدقاك ، ربنا ينولك اللي ف بالك يا رااااامي...
نورت البلوجر يا باشا و حمدلله ع السلامة :) :)

  موجة

الأحد، 15 أغسطس، 2010 5:56:00 م جرينتش+2

مش عارفه ليه
مش متطمنة
حاسة ان الدنيا سارقاك اوووى فى حبك
بس اقولك
يارب يريح قلبك وينولك الخير
بس اغنيه جامده كلمات واحساس عالى
دمت بخير وود

  فاتيما

الأحد، 15 أغسطس، 2010 7:59:00 م جرينتش+2

الاول ازيك يا رفيق
و كل سنة و انتا طيب يا رامى
و كل رمضان و انتا معانا
ان شاء الله

هل يمكن ينفع انك تيجى يوم ابو الريش
28 الجارى و معرفش بيجرى يروح فين
بس حاول يا فندم


ثانيا بقى

انتا حالة مستأنسة ؟!!
يا بنى دا الجب الغجرى المجنون بعينه
لدرجة بتخوف اللى قصادك

بس عذرك معاك
الحب اللى بجد كدا
ملوش حدود و لا مشروط
و لا له اول من آخر

و يؤسفنى اقولك كمان
ملوش نهاية محددة
و لا باينة و واضحة
بس صدقه هوه اللى بيخليه عايش
و بيكبر
لأنه صح
و حقيقة
مش مشاعر مزيفة و بتروح لحالها
لما اللى متقدمله بيرفضها

هيا شايفة و حاسة
بس مش قادرة ترد
لأن النوع دا م المشاعر
صعب يترد عليه

و لو انك مش منتظر غير انها تسيبك تحبها اكتر من كدا مليون مرة و بس
لكن الرعب يا عزيزى

تخيل حد واقف و طوفان جااااى عليه
تفتكر مش يجيله هلع ؟؟
دا عاوز عمر عشان ربنا يثبت قلبه بقى و يقدر يستوعب

الحل ؟؟
اللى انا شخصياص عملته
حب من قلبك و بس
مفيش حل تانى

و سيبها على ربنا
اللى من نصيبك هيكون


نجيب محفوظ له جملة حلوة قوى بتقول
كما تحب تكون
و انتا ف حبك بتكون نفسك
بتتصرف زى ما طول عمرك انتا كدا
مفيش فيها اختيار دى

هقول زى ما الكل بيقولك
ربنا يفرح قلبك يا ر ر

و الغنوة رائعة
تسلم اختياراتك

رمان كريم عليك
يا رقيق القلب

  wasf_elahsas

الأحد، 15 أغسطس، 2010 8:38:00 م جرينتش+2

عارف بتفكرني بايه

بال لسه قاعد في السينما مع ان الفيلم خلص

انت حاولت مرة واتنين وما نفعش
ليه معلق نفسك في الامل وانت عارف انه مش معاك

ربنا يهديك يابني ويسهلك الحال

  Beram ElMasry

الأحد، 15 أغسطس، 2010 9:16:00 م جرينتش+2

أجمل التهانى بحلول شهر رمضان المبارك أعاده الله عليكم باليمن والخير والبركة وكل عام وأنتم بخير

  ستيتة حسب الله الحمش

الاثنين، 16 أغسطس، 2010 2:08:00 ص جرينتش+2

عارف

الكلمة الوحيدة اللي
لا تبوخ مع الزمن
ولا تفقد رونقها
ولا تمل منها الحبيبة
ولا تحتاج سواها
هي كلمة بحبك

شوف
بعد كل اللي انت قلته ده
هي مؤكد عارفة
ماهو من القلب للقلب رسول
بس برضه خليك قول

ربنا يسعدك

  مدونة ترجمات

الاثنين، 16 أغسطس، 2010 5:53:00 م جرينتش+2

اخي اسعدني مرورك بمدونتي و اتمنى دوام التواصل بينيا.
تعليقاتك و انتقادتك و نصائحك حافز لي على المواصلة و التجديد.
تقبل تحياتي

  توفيق التلمساني

الاثنين، 16 أغسطس، 2010 10:56:00 م جرينتش+2

على الحجار يا رامي ؟!

عارف ؟ هذا المطرب يعد من أقرب خمس مطربين عرب إلى قلبي.

أرجو أن تكون بخير.

  انسان ممتنع عن الزواج

الاثنين، 16 أغسطس، 2010 11:08:00 م جرينتش+2

الحب جميل لو وجد وكان صادق رغم صعب نعثر علية هذة الايام اصبح مثل الابرة فى كوم القش بل اصعب

كل عام وانت بخير

والف شكر على الزيارة

تحياتى

  hana

الثلاثاء، 17 أغسطس، 2010 1:42:00 ص جرينتش+2

إذا ما ضاع عنواني
في عينيكـ ألقاني
بين يديكـ أشعرني
أذكرني وأنساني
دعني أقول أهواك
دعهاتذيب كياني

عذرا على خربشات قلمي ولكنها وليدة اللحظة فسحر كلماتك آخاذ
هذا ما نشعره ونحن بينها

رامي
صدقا أحرف تخترق الروح بشدة
فلتقل لها أحبــك بكل أبجدية على الأرض
وتكرر
إحساسكـ الرقيييييييييييييق

  ساسو

الثلاثاء، 17 أغسطس، 2010 11:16:00 ص جرينتش+2

بجد احساسك عالي جدا
الاغنيه جميله
والكلمات اجمل
ومشاعرك صادقه
وكلماتك كبركان يهز العالم
دام قلمك يرش فنا

  طالبة مقهورة ..درجة أولى

الثلاثاء، 17 أغسطس، 2010 2:27:00 م جرينتش+2

ياااااااااه يا رامي

حقيقي انا حسيت ان كلامك مؤثر اوووووووي

تعرف لو مكنتش مرتبطة كنت خطلفتك منها ههههههههههههههههههههههههههههه

بهزر بهزر متبصليش كده

تسلم ايدك ويارب يتمملك على خير ويسعدك يارب عشان انت حد طيب وتستاهل

  شمس النهار

الثلاثاء، 17 أغسطس، 2010 3:06:00 م جرينتش+2

جميلة جميلة

مشاعر رقيقه متدفقه

وثمينه كالماس

اكيد كتبت لماسه نادره

سلامي

  rony

الثلاثاء، 17 أغسطس، 2010 8:51:00 م جرينتش+2

انا اول مره اكون هنا بس باذن الله مش الاخيره
المشكله انى مش لاقيه تعليق على الكلام
الجميل بتاع ابو قلب حساس ده
كلام من اعماق اعماق قلبك
ربنا يفرح قلبك ويعطيك حسب سئلك
باى

  re7ab.sale7

الثلاثاء، 17 أغسطس، 2010 9:36:00 م جرينتش+2

الاغنية دي رووووعة
واما الكلام بجد ف مش عارفة اقول حاجة اصل لو قولت حاجة مش هينفع اني اكتب كلمتين تلاتة لاء بوست كااامل
يارب يوفقك ...انت وملاكك
يارب
احيانا الحب بيجرح من غير ما ناخدب النا
واحيانا الحب بيخنق
ف خد بالك يا راااامي
ربنا بفرح قلبك ونفرح بيك وليك
ورمضان كريم

  Ms Venus

الأربعاء، 18 أغسطس، 2010 9:39:00 م جرينتش+2

جميل ورقيق احساسك يا رامى

ربنا يسعد قلبك دايما

  Ramy

الخميس، 19 أغسطس، 2010 5:47:00 م جرينتش+2

شكرا جدا ليكوا كلكوا

مشاعركم الجميلة جدا

أنا أسف لعدم الرد على واحد واحد

و شكرا للى اول يجى و اتمنى متكنش الأخيرة

شكرا

و عاوز بس أوضح حاجة أنا مش منهار أو انا صدقونى أحسن بيها

أنا ابتديت أهتم بحياتى يعنى انا ايجابى دلوقت صدقونى


شكرا لكل اهتمامكم و كل مشاعركم الجميلة