لا تبتعدى

تنويه
لا تبتعدى كاتبها من بدرى
خاطرة حيرة كتبتها انهاردة
*********************************************************************


أرجوكى لا تبتعدى عنى
أنا تائه بدونك فى طريقى
لا أستطيع أستكمال ثورتى
أن كنت أخطأت فسامحنى
لا تبعدى بوجهك عنى
كل ما فى قلبى هذا لا يغفر لى
قلبى يتمزق بدونكى
لا تكونى قاسية
فهذا ليس من طباعكى
كونى لى سندى و ملجأى
كونى لى صديقتى
فأبكى لكى
أتدرى برغم كل أبتساماتى
فقلبى حزين لبعدكى
برغم كل كلماتى
فقلبى صامت فأنه يعانى
أنا أتكلم.... أضحك وأبكى
لكن هذا ليس أنا
فهذا شبحى......
فلا تبتعدى
************************************************************************

حيرة
خايف حيران مش عارف افكر مش عارف أكتب
كل حاجة بقراها لِك بتقربنى منك
تعبان قوى فوق ما تتخيلى
تعبان علشانك أكتر منى
عارفة أنا مكنتش بخاف من الموت مش علشان أنا أنسان كويس
و لكن أنا مبخفش من موت
لكن من وقت ما حبيتك
و أنا خفت على نفسى
خفت أموت
و مسمعهاش منك
خفت أموت
ومن الجايز أنك تزعلى
خفت أموت
و أسيبك
عارف أنى بعيد
بس أنتِ معايا كل يوم
معايا و أنا ماشى أنا مع الناس
و أنا لوحدى
خايف أموت و محققش وعدى ليكى
أنى أكون
أمانك .... و وطنك
عارف أنا خايف أكتب
خايف أخسر حتى فرصة قرايتك للى بأكتبه
صدقينى أنا حياتى كلها بقت بتدور حوالكى
بأسرح بخيالى
و أشوفك
و أسمعك
و أبتسم و أشوف ضحكتك
عارفة بقيت بكون لوحدى و مبتسم و بضحك
و دة وأنا بأكلمك و أنتِ معايا
أنا مش عارف أخبى مشاعرى ليكى
تعبت من الأستنتاجات
تعبت من التفكير
خايف أكلمك
دة أنا خايف دلوقت و أنا بأكتب
على فكرة أنا مش جبان
عمرى ما كنت جبان
بس الحب خلانى مش عارف



صدقينى .... بحبك
أنا.... بحبك
بحبك
هتدينى الفرصة دى أثبت لك
حبى
أثبت لك أنه مش كلام
أنه مش بس كتابه
الناس مش قادرة تفهم
أنتِ بس اللى هتقدرى تفهمى كل ال بين السطور
أنا مش عاوزهم يفهموا أن أنتِ
ممكن تكونى مش مقدرة ده
لالالالالا أنتِ أرق حد عرفته
هفضل مستنيكى
مهما طال الوقت
لو فضلتى سنين تفكرى
أنا موجود
أنتِ عارفة الناس بعد ما تقرا دة كله
هيقولوا أيه
أنسان ضعيف
ناس كتير هيشفونى
أنسان مهزوم
بس أنا لضعيف و لا مهزوم
أنا بحبك بصدق
عارفة حاولت أن ممكن يكون دة وقت و هيعدى
معرفتش
حاولت تانى
و مقدرتش
يمكن أكون أنا نقطة الضوء
مش ممكن
علشان كده مش هطفى
حتى لو أنتِ حاولتى تطفيها
مش هطفى
هفضل شايفك جنبى
هفضل أضحك و أنتِ معايا
هفضل
أحبك
يا حب عمرى

51 التعليقات:

  ميرا ( وومن )

الخميس، 29 يوليو، 2010 10:08:00 ص جرينتش+3

عارف يا رامي أكتر شئ بيعجبني في كتباتك ايه
صوت الصدق اللي فيها

بتجبرني كل مرة اخرج عن صمتي واعلق

دمت محباً صادقاً

تحياتي

  ساسو

الخميس، 29 يوليو، 2010 10:49:00 ص جرينتش+3

خلص الكلام كله
ايه الفن والابداع والجمال الموجودين بين سطورك دول
بجد انت اكتر من هايل
وفنان حقيقي جدا
دام قلمك يرش ابداعا

  MR.PRESIDENT

الخميس، 29 يوليو، 2010 12:37:00 م جرينتش+3

صباح الخير يا سيد رامي
اتمني انك تكون بخير .
في اعتقادي الشخص الحب
لا يكون حب إلا اذا تحول لفعل
وفعل الحب الجواز
فجمع الله بينك وبين من
تحب بالزواج قادر ياكريم
وإن كنت متزوج وانا تقريبا عارف انك مش
متجوز
يبقي بارك الله لكما وبارك عليكما وجمع بينكما في كل خير .. قادر ياكريم ..

  الحب الجميل

الخميس، 29 يوليو، 2010 12:40:00 م جرينتش+3

صباح الخير يا رامى
حمد لله على سلامتك
أزيك واخبار بيير الجميل ايه والكل؟
بالنسبه ل لا تبعدى ما شاء الله كلماتها رائعه فعلا ومعبره برغم ما فيها من حزن
اما لحيره فهى رساله حب تحوى مشاعر فياضه وجميله لحب اجمل
رساله لصاحبة الكلمات دي اجمل ملاك لرامى وربنا يشهد على حبه ليكى واحنا كمان شايفين حبه ليكى ومن نظرة عنيه عليكى ... كل كلمه بيكتبها اى راجل بالعواطف الجياشه دى والحب اللى مالى قلبه وبفكره الدائم فيكى بقولك ان دا حب حقيقى ومش هتلاقيه تانى لانه بيتوجد فى عمر الانسان مره واحده متضيعهاش من ايدك ..فرحى قلبه زى ما اكيد بيغمرك الفرحه لما تقرى كلماته وربنا يسعدك يا ملاك.

رامى ربنا يسعدك من كل قلبى ويكرمك يارب العالمين
وتكون ملاكك من حظك ونصيبك فى دنيتك ونفرح بيكم قريب يارب

انت ولا ضعيف ولا مهزوم .. انت الحب ماليك فى قلبك وعقلك وبيناديها فى كل لحظه

معليش طولت عليك بس مينفعش اقرى كلامك ومكتبش.
دمت فى حفظ الرحمن

  فاتيما

الخميس، 29 يوليو، 2010 1:10:00 م جرينتش+3

ايه يا رامى دا ؟!!


الكلام الكبير اللى انتا كاتبه
يبقى كلام
مش عادى
و لا سهل يتفوت من غير ما اعلق
بكلام كبيييير انا روخرا


اولا
---
واضح انها مدونة
او حتى قارئة للمدونات
يعنى مشاعرك مكشوفة قصادها
حتى لو متعرفش انها موجهة ليها
و معرفش دا كويس و لا وحش الصراحة


ثانيا
------

واضح انك لحد دلوقتى
لم تصارحها بحبك العظيم دا
يعنى الحكاية من طرف واحد
و دا اشد انواع الحب يا بنى
قلبى معااااااك جدا
ف هذا العذاب


ثالثاً
------
باين كدا و الله اعلم
انك لو نطقت يا عزيزى
هتكون دى
نهاية معرفتك بيها
لأنك متوقع رفضها لمشاعرك حتى لو احترمتها
ودا لوحده عذاب تانى



رابعا
-----
اتمنى ميكونش اللى وصلنى صح
و انها متنفعش تكون شريكة لحياتك
و الموقع الوحيد المناسب لها
و لن تتخطاه
هو ان تكون حبيبتك
و فقط
و دا عذاب فوق العذابين الماضيين


خامساً
-----
مش مهم كلامك مكتوب ازاى
و لا لغويا عامل ايه
المهم يتقرى ازاى
و يتحس كمان ازاى

و كفاية انك خرجت الشحنة دى
من جواك

افضل اكتب يا رامى لحد ما ترتاح من ثقل الهم
لأن الكتابة بتطلق سراح مشاعرنا الحبيسة
و تخرجها لسما واسعة ترفرف فيها
حتى لو مش هتحط اخيرا ف مكان


ربنا يعين قلبك الرقيق دا
و شفت بقى
انى كنت محقة ف اختيارى للقبك ؟!!


خالص ودى ليك


يا ر ر

  الشـــــوكه النــاعمه

الخميس، 29 يوليو، 2010 1:48:00 م جرينتش+3

رامى بجد انا فاهمه
وحاسه بيك اوى صدقنى انت لاضعيف ولا مهزوم
الناس بتعيش طول عمرها تدور على الحب الحقيقى ومش بتلاقيه وانت لاقيته من حقك تتمنى وتحلم وتحب وتخلص
وتضعف كمان ليه لا ادامك اللى بنحبه يستاها مننا كل المعاناه دى
بجد ربنا هايكرمك صدقنى بس بجد تماسك
وثق فى الله والله انا مستبشره خير انشالله
ربنا يريح قلبك ويحقق امانيك يارب
كون بخير

  ELMOSTAFZ

الخميس، 29 يوليو، 2010 3:26:00 م جرينتش+3

طب و النبي ده كلام ، مطلعها بره الأرض و في الآخر تقولها لا تبتعدي :) :) ما تطلعها بره المجره احسن :)
لسة بردوا ببص لكلامك من نفس زاوية الصدق اكتر م الرومانسية ، ماهي الرومانسية متبقاش رومانسية لو مكانتش بصدق...
اللي يقرا كلامك يعرف انك فعلا كاتب الكلام ده من قلبك و لحد بتحبه بغباوة :)
انا شكلي بعيد الكلام تاني :)
مانتا عارفني لو هاتكلم عن البوست هتكلم من زاوية تانية تخليك تكره الحب و اللي بتحبها و تقعد تدعي عليا :) :)
انما اللي بحسه دايما في كلامك هو الصدق و الإخلاص المطلق ، مفيش حد يرفض الإخلاص أبدا ، ربنا يرزقك باللي تقدر إخلاصك...
تحياتي و ما يلزم...

  اميرات الاسرار

الخميس، 29 يوليو، 2010 5:38:00 م جرينتش+3

الله الله ياستاذ رامى بصراحه التلاته اروع من بعض

بجد احساسك جميل جدا ووفائك للى بتحبها دى اجمل حاجه
ومااعتقدش ان فى حد هيقول على حضرتك ضعيف او مهزوم لان الحب فى ضعفه بيبقى قوة

بجد احييك على كلماتك الرائعه

تسلم ايديك

  ali younes

الخميس، 29 يوليو، 2010 7:07:00 م جرينتش+3

الاخ رامي

انا طبعا كتير بحترم مشاعرك واحسيسك...
لكن أحب اقول لك أن هذا الكلام وهذة المشاعر والحب المخنوق دة ليس له وجود هذة الايام انت لسة عايش عصر عبدالحليم حافظ
لذا بما انك عزيز علي أقول لك كن واقعي وكن عملي وخلص عليك ان تواجها وتضع حد لهذا الامر حتي لا يضيع عمرك هدر علي سراب

بجدا بنصحك بأخلاص
وتقبل مني تحياتي

م / علي يونس

  mrmr

الخميس، 29 يوليو، 2010 7:23:00 م جرينتش+3

جميل احساسك بمن تحبك يارامى
انا حاسه بالصدق والامانه فى كلماتك
ياريت يا خويا نخلص نفسك من العذاب وتقولها انك بتحبها
ولا خايف تتصدم
بص يا رامى ام اجلا او عاجلا حيجى يوم وبتبوح بحبك ده فياريت تاخذ خطوه وتصرح بحبك
علشان تعرف راسك من رجليك يا ابن الناس
ومش تعيش فى العذاب ده كتير
حتى لو كان الامل ضعيف لازم تبوح بحبك
اكيد هى لما تقرأ كلماتك دى ح تحس قد ايه صدق المشاعر والاخلاص والتفانى ومفتكرش حد يرفض الاخلاص والحب ده كله

ربنا يفرح قلبك بملاكك ويقرب البعيد

  sony2000

الخميس، 29 يوليو، 2010 7:35:00 م جرينتش+3

بجد حلوه جدا
وكلماتها محسوسه:)

  ستيتة حسب الله الحمش

الخميس، 29 يوليو، 2010 9:47:00 م جرينتش+3

لو كل انسان
عبر لحبيبه
عن مشاعيره
بالصراحة المطلقة دي
حديثا لا كتابة
وقدر يعملها ببساطة
بدون اي عقد انسانية
بدون اي محاذير من بكره
تفتكر
حد يسمع كل ده ويقدر يمنع نفسه من أنه يربط حياته وروحه ومشاعره بهذا الشخص حتى اخر العمر؟
يبقى مش انسان

جميـــــــــــــــــلة

تحياتي ويارب تنعم بالحب مع اللي بتحبها

  ريحانة الاسلام

الخميس، 29 يوليو، 2010 10:07:00 م جرينتش+3

كلمات صعبة اوى ومؤثرة جدا
لقد ادمعت عيونى حقا
.....
أتدرى برغم كل أبتساماتى
فقلبى حزين لبعدكى
برغم كل كلماتى
فقلبى صامت فأنه يعانى
أنا أتكلم.... أضحك وأبكى
لكن هذا ليس أنا
فهذا شبحى......
...
مش عارفة اقول ايه
بس ربنا يجعل لحضرتك اللى فيه الخير

  لـــولا وزهـــراء

الخميس، 29 يوليو، 2010 11:28:00 م جرينتش+3

أتدرى برغم كل أبتساماتى
فقلبى حزين لبعدكى
برغم كل كلماتى
فقلبى صامت فأنه يعانى
أنا أتكلم.... أضحك وأبكى
لكن هذا ليس أنا
فهذا شبحى......
فلا تبتعدى

" قد ايه كلماتك مؤثرة وبتبين حالتك النفسية ومدى احتياجك لقربها وحبها ...كلمة هذا شبحي كلمة لخصت كل اللي فات من عمرك وهي بعيدة عنك ..مجرد شبح لانسان "
لـــولا

  لـــولا وزهـــراء

الخميس، 29 يوليو، 2010 11:30:00 م جرينتش+3

الصورة ياسامي تحفة ورقيقة جداَ بنوتة مديانا ظهرها بفستانها الملاكي القمر قدامها .. اطلال المساء المجهول.. تطلع امامها ..الطريق غير واضح ..مبهم ..معاني كتير قوووي

لـــولا

  لـــولا وزهـــراء

الخميس، 29 يوليو، 2010 11:32:00 م جرينتش+3

كلمات حيرة بتلخصك وبتلخص شعورك بنفسك ..انت حيران ..خايف...ربنا يسعد قلبك بكل خير ويكتبلك السعادة والهنا والسرور ..ربنا يعزك
لـــولا

  Noha Saleh

الجمعة، 30 يوليو، 2010 12:13:00 ص جرينتش+3

فيها بساطة وتلقائية مخليينها صادقة جدا
احسن حاجة ان الواحد يكتب اللى حاسس بيه زى ماهو علشان يوصل اسرع خصوصا للشخص المكتوب علشانه الكلام ده

  re7ab.sale7

الجمعة، 30 يوليو، 2010 1:06:00 ص جرينتش+3

مساء الورد والا صباحه
اول مرة ادخل المدونة
بس بجد اسرتني
كلماتك حلوة كتير ومعبرة
بس المصيبة انها ممكن تكون كشفت مشاعر والناساخدت بالها وكدة يمكن يكون مش حلو بس انا بقي من رأي ان الحب حلو وجميل جدا ومفيهاش حاجة لو صرخت من اعلي مكان وقلتهلها انا بحبك ...انا معاك قلبا وقالبا
تحياتي وتقبل مروري

  Ramy

الجمعة، 30 يوليو، 2010 8:57:00 ص جرينتش+3

انا اسف يا جماعة

انا هرد بس مش قادر دلوقت

أعذرونى

  Ramy

الجمعة، 30 يوليو، 2010 5:17:00 م جرينتش+3

ميرا وومن

أزيك

الله يخليكى يا ميرا

دة حقيقى انا كاتب كل ده بصدق تام ليها

شكرا يا ميرا

يارب اشوفك تعليقاتك دايما

ربنا معاكى ويوفقك

  Ramy

الجمعة، 30 يوليو، 2010 5:19:00 م جرينتش+3

ساسو

شكرا ليكى

شكرا لكلامك الجميل دة

اللى بجد مستحقهوش

بتنورينى دايما

  Ramy

الجمعة، 30 يوليو، 2010 5:22:00 م جرينتش+3

الريس

ازيك

على فكرة انت عارف انا شرطى على نفسى من زمان لو حبيت هيكون حب علشان الجواز لو محصلش نصيب
خلاص دى بتاعت ربنا

بس التفكير الأساسى انامش بتاع لعب بمشاعر حد صدقنى

شكرا لزيارتك دايما

نورتنى

  Ramy

الجمعة، 30 يوليو، 2010 5:31:00 م جرينتش+3

الحب الجميل

مساء النور (:

الله يسلمك

بيير بخير الحمد لله و بيسلم عليكوا (:

شكرا يا حب على الرسالة دى يا رب توصلها

شكرا لأنكم حاسيين بيا

شكرا على دعوتك الجميلة

طولتى أيه بس دة مكانك

قولى اللى عايزة تقوليه براحتك

سلملنا على لولو (:

ربنا معاكى و يوفقك

  Ramy

الجمعة، 30 يوليو، 2010 5:40:00 م جرينتش+3

فاتيما

أزيك

(: كلامك دايما كبير يا مامت يوسف

شوفى انا هقولك

يمكن يكون أغلب اللى انتِ قولتيه صح

انا هفضل أكتب مش هستسلم

و كمان لأنى مش هعرف أتكلم غير هنا

شكرا يا فاتيما

شكرا ليكى جدا

ربنا معاكى دايما و يطبطب على قلبك

  Ramy

الجمعة، 30 يوليو، 2010 6:10:00 م جرينتش+3

الشوكة الناعمة

عارفة يا شوكة كلامك صحيح بس المشكلة العالم حوالينا

مش بيقدر دة و تفضلى تبررى و تفهمى و محش فاهم اساسا

علشان كدة قررت مأحكيش غير هنا

متكلمش غير هنا

شكرا يا شوكة

ربنا معاكى دايما

  Ramy

الجمعة، 30 يوليو، 2010 6:21:00 م جرينتش+3

حسنى

اولا ازيك و أزى صوباعك يا عم (:

شوف يا حسنى

انا اتغيرت فى حياتى كتير

انا مكنتش عربيد و لا يعنى فاسق (:

بس اتغيرت كنت مهمل لكل شيىء فى حياتى
حتى نفسى

و كانت هى وقود التغير ده بحبى ليها

حسنى أتكلم براحتك

خلاص احنا عدينا مرحلت تبرير انت بتكتب اية و تفهمنى قصدك اية

الحمد لله أن انتوا شاعرين بصدق كلامى

ربنا معاك يا حسنى و يوفقك

  Ramy

الجمعة، 30 يوليو، 2010 6:23:00 م جرينتش+3

أميرات الأسرار
(:

شكرا ليكوا دة بس من ذوقكم

الله يسلمكم

بتنورونى دايما

  Ramy

الجمعة، 30 يوليو، 2010 6:34:00 م جرينتش+3

أستاذى

م/على يونس

أنا عارف صدقنى من غير ما تقول انا حضرتك بتحترمنى و بتعزنى و دة يشرفنى جدا

صدقنى يا أستاذى أنا عارف أن حبى مينفعش فى الزمن دة
بس مش عارف أتغير صدقنى

و متخفش انا مش مهمل نفسى و لا مستقبلى دة يمكن قبل ما أعرفها

كنت مهمل فى كل شيىء

انا عارف استاذى ان حضرتك بتقول كدة من قلقك عليا

و معزتك ليا

و دة بيخلينى طبعا سعيد جدا

شكرا لحضرتك جدا

ربنا معاك و يوفقك

بتنورنى دايما بأرائك

  Ramy

الجمعة، 30 يوليو، 2010 6:44:00 م جرينتش+3

mrmr

ازيك

الحمد لله ان واصل ليكوا كلكم صدق مشاعرى

يا مرمر انا قلت لها

و كتاباتى دى مجرد

تعبير ليها

يمكن توافق

شكرا ليكى يا مرم دعواتك الجميلة دى

ربنا يسمع منك

ربنا معاكى دايما

  Ramy

الجمعة، 30 يوليو، 2010 6:54:00 م جرينتش+3

sony2000

شكرا ليكى دة من ذوقك

نورتينى

  BNT ELISLAM

الجمعة، 30 يوليو، 2010 6:55:00 م جرينتش+3

ايه الحب الجامد ده



ربنا ينولك اللى فى بالك ويكتبلك ويرضيك باللى بتحبه


ويفرح قلبك يارب

تقبل مرورى

  Ramy

الجمعة، 30 يوليو، 2010 7:06:00 م جرينتش+3

د/ستيتة

ازى حضرتك

صدقينى أنا مبسوط جدا ان كلكوا شاعرين

و خاصة حاضرتك

لأن أنا بحس أن حضرتك شايفة المواضيع بوجهة نظر منطقية

هى أنسانة و قالت رأيها

بس بحاول انى ابين ليها حبى

يمكن يمكن يوم تقبلنى

شكرا لحضرتك جدا

شكرا

ربنا يوفقك و يكون معاكى دايما

نورتينى (:

  Ramy

الجمعة، 30 يوليو، 2010 7:11:00 م جرينتش+3

ريحانة الأسلام

شكرا ليكى

انا اسف جدا لو كنت ضايقتك

شكرا لدعوتك الرقيقة

ربنا يحفظك

شكرا

  Ramy

الجمعة، 30 يوليو، 2010 7:19:00 م جرينتش+3

لولا و زهراء

لولا الرقيقة هقول لولا ثلاثية التعليق (:

على قد ما كنت خايف من البوست دة من رد فعلكم

بس صدقينى انا فرحان ان كلكم حاسين بالصدق اللى انا حاسس بيه اتجهه

عارفة هى كده زى الصورة زى وصفك ليها

لولا بجد ترسمين ابتسامة على وجهى فى كل تعليق
(:

شكرا ليكى

ربنا معاكى

  Ramy

الجمعة، 30 يوليو، 2010 7:24:00 م جرينتش+3

noha saleh

شكرا ليكى دة من ذوقك

دة صحيح ان الواحد يقول مشاعرة للى بيحبة

بصراحة أظن دة بيقصر حاجات كتير

شكرا ليكى

نورتينى (:

  Ramy

الجمعة، 30 يوليو، 2010 7:40:00 م جرينتش+3

re7ab sale7

مساء الفل

دة من زوقك (:

حتى لو الناس عرفه أيه المشكله دة مش غلط

المفروض الحب لما يكون صادق يكون متشاف

شكرا لوقفتك معايا قلبا وقالبا(:

شكرا لمرورك الأول و يا رب ميكونش الأخير

نورتينى (:

  Ramy

الجمعة، 30 يوليو، 2010 7:43:00 م جرينتش+3

بنت الأسلام

دة من ذوقك (:

الله يخليكى

و شكرا على الدعوة الجميلة دى (:

و شكرا لمرورك الجميل

ربنا يوفقك

  كلام عيال ساكتين

السبت، 31 يوليو، 2010 3:40:00 ص جرينتش+3

كلام جميل وده بيأكد زى ما قريت من تعليقاتك انك كنت مهمل فى حياتك قبل ما تعرفهايعنى كنت مانع عن نفسك الحب او بمعنى اصح انك ما كنش فى بالك انك تحب بما انك مهمل يعنى.
بس نصيحة لوجه الله انا ما اعرفكش الا عن طريق الصدفة لما كنت على مدونة تانية لفت نظرى اسم مدونتك فدخلت. اسمح لى بأن اتطفل واقولك نصيحة من قلبى .
اوعى تحبها اوىىىى
ولو حاليآ
علشان لو حصل حاجة لا قدر الله
ما تتألمش اوىىىى
ده من واحد خبره
يعنى انا مريت بنفس ظروفك ديه علشان كده حبيت اعلق
ويارب ما يكتب عليك اللى كتبه على

  hana

السبت، 31 يوليو، 2010 5:24:00 ص جرينتش+3

و مين يقدر يقول على رقة المشاعر والإحساس
الصادق بالحب ضعف
دة منتهى القوة أنه نعبر عن الإحساس ونخرج لو جزء من جوانا
همسك لمحبوبتــك مفعم بالدفء بالإحساس
له طعم وحس وصوت وأنفاس بين سطورها عاشقة
إعجابي وتقديري لحرفك لشجي

  Silver Eyes

السبت، 31 يوليو، 2010 6:03:00 ص جرينتش+3

Sba7 el_5ir ya Ramy
yarab tkon b 5ir :)

simply .. gamila :)
bgd tlka2y f klamk w wsf msha3rk dymn
7assa b el_7ala dy 2wy

* 2wet el_7ob f d3fo ..
enta la mhzoum wla d3ef 3shan bt7eb blshkl da

motfka m3 comment Fatima
:)
rabna m3ak w ywf2k
......
sorry 4 writing in Franko
all my best wishes 4 U :)

  Ramy

السبت، 31 يوليو، 2010 9:34:00 ص جرينتش+3

كلام عيال ساكتين

مش عارف ليه حاسس انى أعرفك يا مايكل (:

عملت مدونة برضة

طيب بس براحة ع البنى ادمين الله يخليك (:

شكرا يا عم مايكل على فكرة انت متعرفش اى حاجة

بالتوفيق يا باشا

  Ramy

السبت، 31 يوليو، 2010 9:45:00 ص جرينتش+3

hana

ناس كتير بتقول كده يا هناء صدقينى مش بيكونوا عارفين
ايه يعنى ان الواحد يحب

الحمد لله أن انتم حاسين بالكلام اللى انا بقوله و بأكتبه

شكرا ليكى يا هناء

ربنا معاكى

  Ramy

السبت، 31 يوليو، 2010 9:50:00 ص جرينتش+3

سيلفر

ازيك

شكرا ليكى انا بحاول اوصلها انا عاوز اقولها ايه

شكرا ع الدعوة الجميلة دى

ربنا معاكى و يوفقك

  Ms Venus

السبت، 31 يوليو، 2010 2:19:00 م جرينتش+3

لانها حروف خرجت من القلب اكيد بتوصل للقلب


جميل احساسك يا رامى

ربنا يوفقك ويسعدك

  Tarkieb

السبت، 31 يوليو، 2010 5:23:00 م جرينتش+3

في الحروب استخدام القوة المفرطة ضد خصم ضعيف هبل وضد قوي انتحار وزي قلته....رأى انك ادليت بكل ما في جعبتك وفي كلتا الحالتين اذا كانت هى عنيدة او غير فا دا برضة مش صح وافرات في الكلام ذيادة عن اللزوم وفى تلك الحالة قليل منه يصلح وكتير منه يفضح

  Ramy

السبت، 31 يوليو، 2010 5:44:00 م جرينتش+3

Ms Veeans

شكرا ليكى

الحمد لله أن أحساسى وصل للناس

يا رب يوصلها

شكرا

نورتينى (:

  Ramy

السبت، 31 يوليو، 2010 5:48:00 م جرينتش+3

trakib

عارف حضرتك كلامك منطقى جدا فى الحالات العادية

بس يمكن لأن دى اول مرة أحب

فيمكن انا مش عارف أسيطر على مشاعرى

طبعا انا بأشكرك للنصيحة

شكرا

و بتنونى دايما

  Tears

الأحد، 1 أغسطس، 2010 12:03:00 ص جرينتش+3

انت انسان حساس و رومانسى اوى يا رامى و ده ح يجذب لك الفتيات لكن قد يتسبب لك فى جرح عميق و حزن كبير لو اساءت الاختيار او ان لم يقدر الطرف الاخر احاسيس المرهفة تلك فكن حذر و اختار بعقلك اولا ثم افسح لقلبك المجال و ليس العكس


ربنا يوفقك

  ALHBALABADY

الأحد، 1 أغسطس، 2010 1:47:00 ص جرينتش+3

ربنا يسعدك
ويجمع بينك وبين ملاكك

تحياتى

  Ramy

الأحد، 1 أغسطس، 2010 2:45:00 ص جرينتش+3

tears

اولا حمدا لله على السلامة

ثانيا شكرا جدا دة من ذوقك

ثالثا عارفة يمكن أكون قليل الخبرة لأن دى أول تجربة فى حياتى بجد صدقينى

أنا متكلمتش غير لما حسيت أن فى قلبى حب حقيقى

شكرا

ربنا معاكى دايما

  Ramy

الأحد، 1 أغسطس، 2010 2:46:00 ص جرينتش+3

الحب الأبدى

شكرا ليكى للدعوة الجميلة دى

و شكرا لأول زيارة يا رب تتكرر (:

ربنا معاكى