أنت ليه مش بتمسك أيدى وأحنا ماشيين فى الشارع

أنا كنت هنزل بوست تانى خالص غير دة بس القصة دى قرتها

فى كتاب أرز باللبن لشخصين

لرحاب بسام مدونة ممكن فى ناس تعرفها و ممكن ناس قرأت القصة

بس هى عجبتنى و انا قلت رأيى فى الأخر
**************************************************

أنت ليه مش بتمسك أيدى و أحنا ماشيين فى الشارع
لأ بلاش أفرضى حد من قرايبك شفنا؟ والا حد من أصحاب أخوكى فى الكلية ؟ إن شاء الله يا حبيبتى بكره نتخطب وأمسك أيدك قدام الدنيا كلها

أنت ليه مش بتمسك أيدى وأحنا ماشيين فى الشارع
علشان مش عاوز حد يفتكر إن علشان أتخطبنا هنصيع بقى ونعيش حياتنا
و بعدين بصراحة كدة أنا مستحرم ..أن شاء الله بكرة نتجوز و أمسك أيدك و أنتى مراتى حبيبتى فى الحلال



أنت ليه مش بتمسك أيدى و أحنا ماشيين فى الشارع
يا حبيبتى أحنا مش مراهقين بقى هنمسك أيد بعض فى الشارع و كده إحنا اتنين متجوزين و محترامين وعندنا بيت نعمل فيه اللى أحنا عاوزين نعمله

أنت ليه مش عاوز تمسك ايدى و أحنا ماشيين فى الشارع
يعنى أمسك أيدك ولا أيد البنت ولا اشيل الأكياس دى كلها

أنت ليه مش بتمسك أيدى و أحنا ماشيين فى الشارع
إيدك أيه بس اللى همسكها دلوقت !
أنتٍ عاوزة جوز بنتك يقول علينا كبرنا و خرفنا؟!

أنا بس كان نفسى تمسك أيدى و أحنا ماشيين ..عادى يعنى..من غير مناسبة أو هدف محدد بس تمسك أيدى ماكنتش عاوزاك تمسكها علشان تسندنى أو علشان أنا مش قادرة أمشى لوحدى مثلا
أو علشان دة الصح اللى مفروض تعمله مع مراتك و هى عيانة
و لا علشان... زى دلوقت.. أنت خايف لو سبتها و قمت هأموت
لأ.....
تمسك أيدى علشان أنت عاوزها تفضل فى أيدك.. بس
**********************************************************
طبعا القصة جميلة زى الكوميديا السوداء
بس فى حاجة هل فى شاب فى مصر كدة قبل الجواز دة بيمسك أيدها على الفاضى و المليان
ممكن دة يحصل بعد الجواز على ما بسمع (:(:(:
بس برضه هنخدها من الجانب الأخر الجانب الأنسانى
أن أنت تكون بخيل فى مشاعرك مع الأنسان اللى هتعيش معاه حياتك
ده أشد أنواع البخل فتكا بالحب
طب يا معلم مش طايق مشيت معاها ليه من الأول مكسوف طب أقعد فى البيت بقى
أنا هنا مش بقول بقى لازم ننحل و نعمل اللى أحنا عوزينه بس المشاعر الطيبة أكيد ليها عامل اكيد مش كل ما هتمسك ايد اللى بتحبه هيكون قصدك مش حلو يبقى أحنا مش بنى أدمين بقى و لا أيه ......
*******************************************************************

ملحوظة برة الموضوع خالص انا مش عارف اقرا اى كتاب من اللى بنزله من على النت مفتقد أنى امسك الكتاب و افضل اقلب الصفحات بجد شعور بيفرق فى القراءة معرفش بس فكرة الالكتب ألكترنيا دى مش دخلة دماغى خالص

64 التعليقات:

  Tamer Nabil

الخميس، 1 يوليو، 2010 5:20:00 م جرينتش+3

اظهار المشاعر شىء جميل

بس ياترى لو مفيش مسك ايد هيكون مفيش حب واهتمام بس على العموم النية اهم حاجة

انا بتابع كتب الكترونية وقريت كتير منها

بس متعة كتاب الورقى احلبى وافضل كتير

مع خالص تحياتى

  mrmr

الخميس، 1 يوليو، 2010 5:32:00 م جرينتش+3

هههههههههه
قمه الرومانسيه ان الولد يمسك ايد البنت مش بخل
بس فيه رجاله كتير بعد الجواز بيبقوا بخله فى عواطفهم
يبقوا خلاص زهقوا من اكل البطيخ بيبقى نفسهم فى المانجه وده راجل عنيه فارغه
بقوله بص للبطيخ اللى فى ايدك ماله يرطب عليك فى الصيف ويسلام عليه مع حته جبنه قديمه واااو هههههههههههههههه

انا بشوف ان الزوج لازم يكون رومانسى زياده مع زوجته لان ده بنعكس عل حالتها النفسيه وخصوصا عند بلو غ المراه سن الاربعين بيبقى شعور صعب جدا
بتحتاج اليد الناعمه اللى تطبطب عليها وتحنو عليها وكلمه حلوه تبل بيها ريقها
ياريت الازواج مش يبخلوا على زوجاتهم بالكلمه الطيبه
وياريت يحسسها قد ايه هى غاليه عليه ح تفرق معاها اكيد وبكده تاخد عنيها لو طلبتها
شكرا يا رامى
ربنا معاك ويحافظ عليك

ياريت اكون اول تعليق

  Ramy

الخميس، 1 يوليو، 2010 5:54:00 م جرينتش+3

tamer nabil

لالا دة باين التعليق اتنشر اهو ((:

لا لا مسك الأيد دة شيىء رمزى ممكن ميحصلش بس هنا المشاعر ممكن تبينها بأى شيىء تانى يحسه اللى بتحبه

أه صدقنى الكتاب له رونقه برضه

على الأقل بتقراه وانت قاعد براحتك

التحية لك

شكرا للمتابعة و التعليق ((:

  Silver Eyes

الخميس، 1 يوليو، 2010 6:00:00 م جرينتش+3

مساء الخير يا رامى
يارب تكون بخير :)

ما كان يمسك ايدها من الاول ويخلصنا
هههههههه
.....

هو بس بيبقى مجرد احساس جميل بالامان الواحد بيحتاجه
بيحتاج يحس انو مطمن او مالك الدنيا كلها
حتى لو بلمسة ايد صغيرة .. بس بتفرق اووى
فى ناس فعلا بتبقى بخيلة فى حبها وفى مشاعرها .. وساعتها حاجات كتير بتتكسر .

موضوع الكتب الالكترونية مش وحش اوى وخصوصا لما يكون كتاب نادر وصعب تلاقيه
بس طبعا
كتاب ف ايدك ليه متعة كبيرة اووى وانت بتقراه وعايش فيه .. بيبقى مزاج عالى اوى :)

ان شاء الله اقرأ الكتاب دا قريب
تحياتى يا رامى :)

  mrmr

الخميس، 1 يوليو، 2010 6:02:00 م جرينتش+3

وحياه ننتى ما اعرف اقولهم تانى
هههههههههههه
تصدق بايه ح تصدق ان شاء الله
دا انا يا ابنى كنت برغى كتير كتير
على العموم ولا يهمك احاول افتكر كتبت ايه كنت
بقول ان قمه الرومانسيه لما الولد بيمسك ايد البنت بيبقى طاير من السعاده
لكن بعض من الرجال بعد الزواج بيبقوا بخله فى عواطفهم
وبيحبوا يغيروا بيزهقوا من اكل البطيخ على طوول
عايزين تفاح .. مانجو .. اناناس
مش عارفين ان البطيخ جميل فى الصيف ويسلام عليه بالجبنه القديمه واااااو
عايزه اقول للازواج مش تبقى بخيل على مراتك
الزوجه بتيجى عليها اوقات تبقى نفسها فى كلمه حلوه وخصوصا بعد سن الاربعين بتواجه المراه مشاكل نفسيه شديده
بس كده عصرت دماغى بما فيه الكفايه
وابقى ابعت العنوان علشان ابعتلك عليه الاكياس
مقلتش عايز كام كيس
ودول للاستعمال الشخصى ولا ح توزع منهم للحبايب

  mrmr

الخميس، 1 يوليو، 2010 6:04:00 م جرينتش+3

يارب يكون التعليق وصل

  محمود(باحث عن حب)

الخميس، 1 يوليو، 2010 6:24:00 م جرينتش+3

وفيها ايه لوسك ايديها ده محبكها قوى
بس
شهم
وخايف على سمعتها
ده لو هو مش خايف على سمعته هو

  Ramy

الخميس، 1 يوليو، 2010 6:29:00 م جرينتش+3

mrmr

دة باين كل التعليقات وصلت اهة حاجة غريبة ((:

كلامك صح يا مرمر ان الأنسان عموما بيحب ان يسمع كلام كويس من اللى بيحبه

بس يارب تكون القصة عجبتك

دة انتى عندك ذاكرة حديدية انا مش بأحسد ((:

دة انا لو فى موقفك مكنتش افتكرت حاجة بعيد عنك ذاكرتى عاوزة عمرة ((:

بالنسبة لكياس الزغازيغ لا انا عاوز كسين بس (:(: انا مش طماع دة رزق اصلى انا هيكون لى تخفيض (:

شرفتى يا مرمر (:

ربنا معاكى فى ضغط الشغل و ايما معاكى طبعا

  Ramy

الخميس، 1 يوليو، 2010 6:47:00 م جرينتش+3

silver eyes

على رأى فؤاد المهندس مش كونتى تسبيه يمسكها يا فوزية (((:

فى حاجات ممكن تبان صغيرة و تفهة جدا بس مع اللى بيحبونا و نحبهم وبيقدرونا

انا ممكن اديكى لينك ممكن تنزاى منه كتب كويسة لو تحبى

شكرا لزيارتك و متابعتك

ربنا معاكى (:

  الحب الجميل

الخميس، 1 يوليو، 2010 6:53:00 م جرينتش+3

رامى

الموضوع كبير....راجعه تانى

  Silver Eyes

الخميس، 1 يوليو، 2010 6:54:00 م جرينتش+3

http://spreadsheets.google.com/pub?key=0AjjFS4zYhCjlcjZ3aGFyT3hQZXNwTXlmejVLa1BsbGc&gid=0

رامى ممكن يكون دا اللينك اللى تقصده ..
لو كان فى لينك غيره ياريت تكتبهولى بليز

وميرسى جدا ليك :)

  Ramy

الخميس، 1 يوليو، 2010 6:56:00 م جرينتش+3

محمود

الباحث عن الحب

والله عندك حق يا أخى (:(: خايف على سمعته

منورنى دايما يا محمود (:

  Ramy

الخميس، 1 يوليو، 2010 7:15:00 م جرينتش+3

silver eyes

لا مش هوا بس كويس اهو تبادل لينكات (:(:

انا اللى بشكرك

سيلفر مش عارف اقولك ايه بصراحة بس عمال ادور على اللينك عندى فى الفيفورت مش لاقية

بس الموضوع فى دماغى متقلقيش و انا بشكرك على اللينك دة

  Ramy

الخميس، 1 يوليو، 2010 7:15:00 م جرينتش+3

الحب الجميل

(: و نحن فى انتظارك (:

  Silver Eyes

الخميس، 1 يوليو، 2010 7:29:00 م جرينتش+3

العفو يا رامى ..
اللينك دا نزلت منه كتير بس لسه مقرتهمش
ربنا يسهل بقى وابطل كسل :)

يارب يفيدك وتلاقى اى كتاب بتدور عليه فيه..

  الحب الجميل

الخميس، 1 يوليو، 2010 7:44:00 م جرينتش+3

مساء الخيرات

راجعنا بعد الفاصل اصلى كنت بحلل الموضوع من وجهة نظرى بوجهه عام واللى سايد فى مجتمعنا

اللى بشوفه وبسمعه ويمكن اكون عيشته ان الشاب والبنوته فى فترة الخطوبه بتتولد بينهم مشاعر جميله اقلها مسكت الايد وهما ماشين لكن بعد الزواج المنظر دا بيتكرر كل فين وفين يمكن فى تعديه شارع من كتر الزحمه مش اكتر ولا تعبانه مثلا فيمسك بأيدها وطبعا دا لو حصل لان بعد الجواز اكتر الزيجات مش بيخرجوا يتمشوا زى اى اتنين مخطوبين الا القليل منهم



اصله خلاص يارامى بيكون تملك منها وبقت ملكه وفى بيته ومراته

زهقت ولا لسا
أكمل ؟

شكرا ليك

بص ياسيدى فيه العكس فى الموضوع دا
أزاى؟
يعنى الراجل هو اللى يقول لمراته او خطبته او ....الخ(أنتى ليه مش بتمسكى ايدى واحنا ماشين ؟)

مش ممكن تحصل ؟
اه ممكن تحصل

ممكن الست او البنوته هى اللى متحبش تمشى كدا وممكن تكون بتكسف مثلا وفيه ستات جد اوووووووى وتطفش وتزهق
على العكس ان الراجل مليان احاسيس جميله مثلا ونفسه يمسك ايد اللى بيحبها وهى اللى رافضه
ولا بعد الجواز يبقى ماشى معاها وعيل على الايد دى وكياس وشنط فى الايد دى

ويفتكر ويحلم بأيام زمااااااان لما كانوا بيمشوا بكل رقه مع بعض ويتحسر على نفسه
المشاعر الجميله مش فى مسكة ايد بس انما ممكن تكون فى نظرة عين او كلمه حلوه او اشياء معنويه تنحس

بلاش نخرج عن الموضوع
اللى اعرفه ان الراجل اللى كان بيمسك ايد خطبته وبعد الجواز مش يمسكها يبقه كان بيخدعها لان لازم المشاعر دى متتغيرش دى وجهة نظرى

وخلاص يعنى هنقف على مسكة الايد دا يابنى مش مسكة الايد بس اللى بتختفلى حاجااات كتير اوى بتختفى غير الموضوع دا
مثلا فى بعض الكلمات بتضيع وبيحصلها تجمد

مش هسميها بخل انما هسميها احترام قبل الزواج انما بعد الزواج ممكن نسميها بخل فى المشاعر

طولت عليك كتير اصل الموضوع دا فيه كلام من مختلف الاتجاهات

اه نسيت أقولك
أزيك يارامى ؟

دمت بخير

  ساسو

الخميس، 1 يوليو، 2010 7:55:00 م جرينتش+3

هههههههههه
بجد حكايه ممتعه جدا
بس هو عمل الصح
لأن علي رأي محمود (باحث عن حب )هو شهم وخايف علي سمعتها
والاحترام اهم شئ لان ممكن ميكملوش مع بعض
ف علشان ميبقاش في ندم بعد كده
انما بعد الجواز كل واحد حر
مفيش حد هيلومه

تحياتي

  Ramy

الخميس، 1 يوليو، 2010 9:13:00 م جرينتش+3

silver eyes

ممكن تبعتى اللينك ده تانى معلش اصلى صورتك مغطية عليه (:

و بطلى كسل متكونيش زيى (((:

و ان شاء الله هيفيد

  Ramy

الخميس، 1 يوليو، 2010 9:28:00 م جرينتش+3

الحب الجميل

مساء النور (:

انا الحمد لله (:(:

أيه دة كله أيه دا كله

انا متفق معاكى جدا فى كلامك فى حكاية البنت اللى بتكسف

بس هنا برضة هى ما أجرمتش لما حبت تحس ان حبيبها قبل جوزها حاسس بيها و بمشاعرها

هو محولش حتى علشان يعرف رد فعلها

و بعدين مسك الأيد صح هو مش كل حاجة بس فى القصة هنا حاجة رمزية

انتى شوفتى ردها فى أخر القصة بيلخص مغزى القصة كلها

و بعد كدة ممكن اكون محترم جدا و ابين للى بحبه حبى بطرق كتير هعرفها من معشرتى له

و على رايك الموضوع ليه وجهات نظر مختلفة كتير

انا رديت فوق اهو بس سلميلنا على لولو كتير (:(:

الله يخليكى

ربنا معاكى ويوفقك (:

  Ramy

الخميس، 1 يوليو، 2010 9:55:00 م جرينتش+3

ساسو

ازيك يارب تكونى احسن دلوقت (:

هو صحيح ممكن ميكملوش مع بعض بس مسكت الأيد مش مشكلة خالص بس المسكة البريئة اللى هتحددها البنت

هى اللى هتحط حدود فى كل شيىء مع الولد اللى بتحبه علشان نفسها قدام نفسها

و القصة هنا وضحت انه حتى بعد الجواز مش عاوز كدة يبقى ايه بقى

على فكرة القصة رمزية مش مسكت اليد اللى هتبين الحب ولا لأ فى مشاعر كتير تتحس بس القصة دى رمزية

نورتينى يا ساسو

  أحمد مجدي

الخميس، 1 يوليو، 2010 10:59:00 م جرينتش+3

ربما قبل الزواج يسعى الشاب لكي ينا أكثر مما له أما بعد الزواج فربما يمل تلك الأشياء لأسباب كثيرة أظن أن العام منها هو الملل والاعتياد من الطرفين

  Silver Eyes

الخميس، 1 يوليو، 2010 11:08:00 م جرينتش+3

ههههههه حاضر
داايما كدا صورتى مغطية على كل حاجة D:
ان شاء الله هبطل الكسل دا

وهروح اقرأ حالا
واللينك اهو يارب يظهر :
http://spreadsheets.google.com/pub?key=0AjjFS4zYhCjlcjZ3aGFyT3hQZXNwTXlmejVLa1BsbGc&gid=0

  Ramy

الخميس، 1 يوليو، 2010 11:12:00 م جرينتش+3

أحمد مجدى

اهلا بيك

وجهت نظر تحترم

و لكن الشاب الذى يفكر بهذه الطريقة لا يستحق من احبه

شكرا لمرورك الأول و أحب ان لايكون الأخير (:

  ali younes

الخميس، 1 يوليو، 2010 11:40:00 م جرينتش+3

الموضوع جميل جدا ومعبر فعلا عن واقع ولكن...
انا شخصيا علي الصعيد الشخصي بالرغم انة يوجد كمية كبيرة من العواطف داخلي لكني لا أستطيع اظهارها الا عن طريق الفعل .....
يعني الحب عندي تحول لبذل مزيد من المجهود في الحياة حتي اسعد من احب وأهيأ لهم الحياة الكريمة ... يمكن المشاكل الاقتصادية هي السبب ...
المهم انا معك في متعة القرأة في الكتاب الهارد وافضل من السوفت . حتي انني لا أستطيع مراجعة المخططات والرسومات الهندسية علي السوفت جديا بل الهارد افضل
تحياتي لك
وبجد انت تخمينك كان في محلة ان صاحبة الصورة هي فعلا السيدة جيهان السادات سيدةمصر الاولي

  Ramy

الخميس، 1 يوليو، 2010 11:54:00 م جرينتش+3

استاذى
م/على يونس

الحمد لله الموضوع عجب حضرتك

دة شيىء اكثر من رائع ان يكون داخل الفرد مشاعر حب و يحاول يظهرها

دة حقيقى استاذى لان الحب بذل و عطاء ممكن ناس بتقول الحب شعور متبادل بس عن نفسى اعرف بس ان بتحب و مش عاوزها تعمل حاجة(:(:
بتلكك بقى (:
ههههه

القراءة بجد ان انت تقرا وانت قاعد فى اى حتة و بأى طريقة شعور الورق نفسة ليه عبق كبير فى نفسى
اصلى انا قديم قوى (:(:
تقليدى (:

انا قريت تعليق حضرتك على الموضوع و عرفت ان انا و استاذة ستيتة بس اللى عرفوا

بس احرجت ارد (:(: شفت حد يتكسف يرد يادى الخيبة (:(:
امال هتمسك اديها ازاى يا عم رامى (: ههههههه

شرفتينى استاذى (:

  صمت المشاعر

الخميس، 1 يوليو، 2010 11:57:00 م جرينتش+3

فعلا عندك حق اصعب انواع البخل هو ان الانسان يكون بخيل في مشاعره

بس اللي عجبتني اوي جملتها وهي بتقول انا كنت عاوزاك تمسك ايدي علشان عاوزها تفضل في ايدي الجمله دي فيها معاني كتير حلوه


انا معاك ان فكره الكتب الالكترونيه رخمه وانا مبحبهاش الصراحه لاني بزهق من قراءه الكتب ع النت القراءه متبقاش شيقه الا والواحد في ايده الكتابه ومنمدج معاه كدا

زيارتي الاولي للمدونه وان شاء الله مش تكون الاخيره

دمت بخير

  Ramy

الجمعة، 2 يوليو، 2010 12:11:00 ص جرينتش+3

صمت المشاعر

ده حقيقى البخل فى المشاعر حتى مع اصدقائك بيموت اى علاقة حلوة مع حد

و الجملة دى لخصت القصة كلها هى لية كانت عوزاه يمسك ايديها عوزه تحس بحبه هى المسكة مش هتبين بس هى هنا فى القصة شيىء رمزى

انا عن نفسى بأعشق القراية الحية مش الألكترونية
بالرغم ان سيلفر ايز قالت حاجة كويسة ان ممكن يكون الكتاب من الكتب النادرة لو كدة ممكن الواحد يتنازل مفيش مشكلة (:

انتى شرفتينى و نورتينى

و يارب متكنش اخر مرة (:

  لـــولا وزهـــراء

الجمعة، 2 يوليو، 2010 12:13:00 ص جرينتش+3

رامــــى


عارف المشاعر والاحاسيس مش محتاجه اكتر من نظره او كلمه حلوه او حتى لمسة ايد بس للاسف فى نوع من الرجال فاكر ان ده ضعف او رومانسيه هبله لكن بجد الحركات دى تفرق مع الانثى اوى اوى

بوست حلو اوى اوى ورقيق جد ا

  لـــولا وزهـــراء

الجمعة، 2 يوليو، 2010 12:13:00 ص جرينتش+3

رامى على فكره تقريبا نسيت امضى زهراء

  Ramy

الجمعة، 2 يوليو، 2010 12:20:00 ص جرينتش+3

زهراء

بجد لحقتينى بالأجابة (: هههههه

لسة كنت بسأل نفسى طب مين فيهم هيلخبطونى (:

و هب لقيت الأجابة (:(:

المشاعر كل ما تكون حقيقية كل ما كان اقل حاجة بتظهرها

و صدقينى بتفرق مع التنين بس يمكن بتفرق اكتر مع الأنثى لأنها الأرق (:

الله يخليكى دة من ذوقك

شرفتينى و نورتينى و سلميلى على لولا (:

  لـــولا وزهـــراء

الجمعة، 2 يوليو، 2010 12:46:00 ص جرينتش+3

سامي كالعادة بوست رااااائع سواء انت اللي مدونه او ناقله فالاحساس فيه جمييييييل ...بابا ممكن تمسك ايدي عشان احس بالضهر والسند...ماما هاتي ايدك مش عشان انتي كبرتي في السن وتعبانة لأ عشان انا بحبك وقلبي اللي بين ضلوعي هو اللي شايلك...وكل ذرة في خلايايا تتمنى قربك...ماما من فضلك خليني جنبك .

سامح اخويا ممكن تمسك ايدي عشان بحس بالامان وانا جمبك.

محمود اخويا ممكن تمسك ايدي عشان احس انك بجد صديقي.

حبيبي لاما تكون في حياتي ياريتك متبخلش عليا بمسكة ايد عشان بحبك قوووووي وانت عني بعيد...امال لما تقرب اكيد هتكون كل ايامي عيد...حبيبي متبخلش عليا بمسكة ايد.
ابني ضمة ايدك لصابعي بالدنيا ومافيها ...
لـــولا

  norahaty

الجمعة، 2 يوليو، 2010 3:07:00 ص جرينتش+3

فعلاً إظهار مشاعرك الحلوة
لشريكك الأخر حاجة كتير بينساها
الناس وخاصة الرجال وحتى النساء كمان
كلنا كبشر محتاجين(خبزاً وحناناً) مش خبزاً بس:)
ولا حناناً بس برضه!!

  Ramy

الجمعة، 2 يوليو، 2010 11:45:00 ص جرينتش+3

لولا الرقيقة (:

شكرا ليكى دة من ذوقك

أنتى بكلامك دة لخصتى قصد القصة ان الحب و المشاعر بين كل الناس

و اظهار المشاعر دى بيدى دفعة للأنسان فى حياته بيحس ان اللى حواليه حاسين بيه و بيحبوه

حقيقى كومنت فوق الممتاز (:

نورتينى و تسافرى و تيجى بالسلامة ان شاء الله

(:

  Ramy

الجمعة، 2 يوليو، 2010 11:52:00 ص جرينتش+3

norahaty

كلامك صح ان احنا كبشر محتاجين الشعور ده

محتاجين شعور التقدير الحب المشاعر الطيبة

بجوار الخبز (: على رأيك

ماهو من غير الخبز مش هنعرف نقدر و لا نحب و ندى حنان (:(:

شرفتينى و شكرا لتعليقك الجميل الحقيقى

  أتنين حبيبين

الجمعة، 2 يوليو، 2010 2:08:00 م جرينتش+3

مساء الخير ازيك يارامى يارب تكون بخير ويطمنى عليك يارب الموضوع جميل واتعمل بطريقه كوميديه رائعه اضحكتنى
بالنسبه ياريت فى حد كده الايام دى بالعكس ده احنا فى زمن الانحلال الخلقى وبنشوف بلاوى كتير بالطريق العام ودون خجل
ماعلينا ربنا يهدى الجميع يارب
بالنسبه للكتب انا من عشاق القرأة وخاصة الكتب الورقيه لانها لها طعم تانى ومذاق خاص
بتمنالك حياة جميله سعيده هادئة اخى الفاضل
واسف لتاخرى عنك لظروف خارجة عن اراداتى

التمس ليا العذر

مودتى

  Ramy

الجمعة، 2 يوليو، 2010 2:35:00 م جرينتش+3

أتنين حبيبين

مساء الخير

انا الحمد لله شكرا (: طب كويس ان الموضوع عجبك بس خلى بالك دة مش انا اللى كاتبه انا نقله لانه عجبنى و حبيت ان انتوا كمان تشاركونى (:(:

اة صحيح ان الدنيا بقت كدة دلوقت علشان كدة انا اعلنت استغرابى فى التعليق بتاعى تحت القصة

على رايك ربنا يهدى الجميع

كل الناس اجمعت على كدة ان الكتاب الطبيعى قريته احسن من الكتاب الألكترونى (:

الله يخليكى شكرا للدعوة الجميلة دى جدا (:

لالا متتأسفيش انا بقدر الظروف بس اهم حاجة تكون ظروف كويسة (: يعنى ميكونش فى مشكلة بعد الشر

شرفتينى و نورتينى امال الأستاذ حسام مش باين لعل المانع يكون خير (:

ربنا معاكى و يوفقك (:

  hana

الجمعة، 2 يوليو، 2010 3:07:00 م جرينتش+3

مشكلة البخل في المشاعر بجد
أنه نبخل بالإحساس طب ندي إيه !!

دة أكثر حاجة ممكن يعيش بيها الإنسان هي الإحساس يعني ممكن يتنازل عن حاجات كثير أودام الحب والدفا إنما يتجوز حد بخيل في مشاعره طب هيديها إيه
وللأسف بئا الرجل المصري لما بيتجوز بينسى الإحساس
تلاقيه ماسك إديها سواء مشاعر أو أي سبب بئا وقت

الخطوبة بعد الجواز أنسى !!! كأنه بيعاقبها على إختيارها وحبها ليه
كأنه بيقولها خلاص إنتهى الحب مبقاش فيه إحساس
مبقاش فيه دفا متقوليش يا حبيبي تاني متقوليش بحبك
تاني متقوليش وحشتني وأنا بعيد تاني
متحبينيش تاني

إحساس بالتملك غريب وفاشل عشان بيموت الحب بين الزوجين وبيحولها لحياة بلا حياة
أنا بحس الغرب هو اللي بيعرف يعني إيه مشاعر ويعني ايه حب بيعرف يعيش بجد

 إنما سوري يعني الرجل المصري او العربي ههههههههههه
ميعرفش لا معنى الإحساس ولا الحب ولا قيمة الحياة بالمشاعر
ميعرفش غير يضيع الحب وبس مش عاوز يمسك إيدهاياربي والله قمة الجمود بجد القلب محتاج حنان ودفاولا بلاش مالجواز أصلاً
ههههههههههههههههههه

  hana

الجمعة، 2 يوليو، 2010 3:10:00 م جرينتش+3

نسيت أقول إني باحب أمسك الكتاب كدة وأقراه أكثر
من الكتاب الإلكتروني
الاحساس فيه مختلف وتحس كدة بتجري جواة وبتخلصه أسرع

ارق تحياتي

  Hager ZaǮbal

الجمعة، 2 يوليو، 2010 6:25:00 م جرينتش+3

هي تفاصيل بسيطه اوي بس بتفقرق مع اي انثي ..
حاجات ممكن تبان في عين اي ذكر تفاهات او مراهقه .. او .. او ..
بس هي التفاصيل دي بتمثل لها حاجات كبيره .. كبيره اوي .. احساس بالحب .. الدفء .. والأمان ..
احساس بتكون نفسها تحسه معاه .. معاه هو وبس ..

علي فكره انا مقرتش الكتاب .. بس انت حمستني اقراه اوي ..


بالنسبه لفكرة الكتب الالكترونيه عندك حق ومتفقه معاك جدا ..
كون ان انت ماسك كتاب بتقراه .. بتمسك صفحاته .. تحس بيه وتحس انه بين ايديك ليها مذاق خاص .. مش مجرد صفحات مطبوعه عمالين نقراها وخلاص ..
انا كمان مش بحبها بس ساعات بضطر ليها لو مش هقدر اجيب الكتب اللي عايزه اقراها ..

اول مره اجي هنا بس شكلها مش هتكون الاخيره :)

تحياتي

  BNT ELISLAM

الجمعة، 2 يوليو، 2010 6:33:00 م جرينتش+3

طيب هو ليه اصلا يمسك ايدها قبل الجواز
انا اسمع الحب افعال مش مسك ايد
والله لو من حقه وكاتب كتابه عليها مايمسكها وايه ياعنى اما غير كده يفكره ليه اصلا

وبعدان بعد الجواز يبقى يمسكها براحته مع انه فعلا فى رجاله بتستغبى ومش بيسيب مراته بس لاء
بتلقيها ماشيه قدام وجارار مراته وراه
وكانها شىء

موضوع لذيذ
وفى الاخر متوقف على نيه وعمر الحب ماكان ولا كلام ولا مسك ايد وقاعده على كورنيش والحياه تبقى حلوه وعلى فكره هو ده الحب المؤ قت الى بعد الجواز بيضيع


مدونه جميله
واجمل مافيها بساطتها
تقبل مرورى

  wasf_elahsas

الجمعة، 2 يوليو، 2010 7:29:00 م جرينتش+3

مشاعر جميله جايز
احاسيس لذيذة
دنيا مختلفه
كل ده حلو بس
مفيش حب من غير هدف
الحب حاليا وسيله لاي هدف
فصعب تامنله من غير سبب
******
بالنسبه للكتب الالكترونية ممكن تحطها علي الموبايل و تقراها ف اي وضع

  Ramy

الجمعة، 2 يوليو، 2010 8:22:00 م جرينتش+3

hana

hager za3bal

bent elislam

wasf elehsas

انا متشكر ليكو جدا جدا

انا اسف بس انا هرد عليكوا مش دلوقت انا دخلت
اشوف الدنيا بسرعة لأنى بحضر شنطة السفر أخيرا أجازة
(:

انا مرضتش اكروت الردود

اعذرونى

هرد خلال يوم او يومين

شكرا ليكوا وتقبلو اعتذارى

  Tears

الجمعة، 2 يوليو، 2010 8:34:00 م جرينتش+3

لما يمسك ايدها ح يحسسها بالامان و انه موجود و محافظ عليها و ده ح يشبع حاجة نفسيه داخل المرأه التى ترى فى الرجل السند و الملجأ

عندما تشعر المرأه بالأمان ستستطيع ان تشعر الرجل بالدفء و بالتالى الاتنين ح يكونوا سعداء و راضيين

البداية او المبادرة دائما يجب ان تأتى من الرجل اولا و بالتالى بيده ان يسعد نفسه

لو زرع حنان و حب اكيد ح يحصد نفس الشىء

  الشـــــوكه النــاعمه

الجمعة، 2 يوليو، 2010 9:42:00 م جرينتش+3

تعرف بقالى فتره ما قريتش حاجه احسها اضافه
البوست ده بجد مش عادى
عارف لمسه الايد دى ليها ابعاد رهيبه
قمه الامان وانت ماسك ايد حبيبك كأنك ملكت الدنيا ومافيها انتا وماسك ايد حبيبك انت عاوز ايه تانى
قمه التحطيم والجرح انك ترتبط با نسان يبخل عليك بده
او يبقى عنده غباء عاطفى
هو عمره ما ها يقدر يعنى ايه واحد غم كل شئ بتقوله امسك ايدى الست دايما قويه ضعف الست ده استثناء
اى ست بتحب ضعفها ادام الرجل اللى بتحبه
هل هى عبيطه مش هاتعرف مثلا تعمل حاجه من غير مسكه ايده بس هى عواطفواحتياج
وركض ورا الامان
بوستك ده لمسنى او
وجرحنى جدا
بس بجد عجبنى تسلم ايدك
تحياتى

  م. حجاز

الجمعة، 2 يوليو، 2010 11:47:00 م جرينتش+3

ازيك يارامى

انا رأى فى الحاله دى انى فى ناس كتير بيتكسف يمسك ايديها مش مسألة بخل فى عواطف او مش بيحبها او حاجه من دى خالص
هى مسألة هو خايف بس من كلام الناس
والناس ما بترحمش

بوست جميل يامعلم تسلم

  moon light

السبت، 3 يوليو، 2010 2:39:00 ص جرينتش+3

اولا ارد على الملحوظه
فعلا عرفت الفرق امبارح بس شىء ممتع جدا وانت ماسك كتاب فى ايدك وبتقرأ وتقلب فيه حاجه جميله بجد
--------------------------
ثانيا بقى وهو الاهم
اولا هى لما بتحتاج انه يمسك ايديها مش لاى غرض تانى لسمح الله بس هى تحب انها تحس مشاعرة اتجاهه ده قبل الزواج وانه يرفض عادى جدا ممكن يكون بيخاف عليها من اى اتهامات من عيون الناس

اما بقى بعد الخطوبه انه بردو يرفض فى الف سبب

الموصيبه بقى بعد اما تكون مراته انه يرفض يمسك ايديها ويقدم حجج فاضيه انا منصحهاش بالاستمراريه معها
عشان عمر الجواز اللى اتبنى عن حب حقيقى ما بيموت ابدا بل بالعكس بيذيد اكتر واكتر
ومش معنى انه رفض يبقى هو زهق او ارفان منها لالالالا الجواز شىء جميل والحب اجمل طبعا

سورى انا طولت جدا لان موضوعك يحتاج لمناقشات يطول شرحها اكتر بس كفايه كده

خالص تحياتى

  ELMOSTAFZ

السبت، 3 يوليو، 2010 3:19:00 م جرينتش+3

تعرف أنا ممكن أرفض مسكة الإيد دي بس عشان عندي اضطراب ف الغدة الدرقية و ايدي بتعرق كتير ، مش ناقصة لحوسة بقا :)
بس طبعا زي مانتا فاهم المشكلة أكبر من مجرد مسكة إيد...
تحياتي ليك يا رامي ، و الله انتا بتفهم انك كتبت البوست ده ، أحييك عليه بشدة...

  كلام من قلبي

السبت، 3 يوليو، 2010 3:28:00 م جرينتش+3

القصة حلوة اوي بجد

تحياتي

  richardCatheart

الأحد، 4 يوليو، 2010 1:19:00 ص جرينتش+3

لا لالالالالالالالالالالالالا دا بيستعبط تلاقيه خايف من مرض جلدى
طبعا

الحقيقه مش كده ممكن فى ناس بعدالجواز اه بس بردو مش الكل

انا بقى مابطقش امسك كتاب فى ايدى اقرائه وجاتلى القراءه على النت دى نجداااااااااااااااااااااا

تحياتى على البوست

  Ramy

الأحد، 4 يوليو، 2010 5:03:00 ص جرينتش+3

hana

أسف على التأخير

انتى جيه علينا قوى هههههه

بس بجد ان البخل فى المشاعر يتعب الحبيب نفسيا

بس بجد الغرب برضة بارديييين لأبعد ما تتخيلى بجد مش دفاع عن الشرقيين

ملكيش دعوة بأفلامهم انا بقول من معشرتى ليهم فى مجال شغلى

الكتاب بقى مش علشان بخلصه بسرعة لا
انا بعيش جواه بكون انا جواه
بكون انا كتابى
بكون حالته

شكرا هناء للمتابعة والتعليق الجميل مرتين (:

  Ramy

الأحد، 4 يوليو، 2010 5:12:00 ص جرينتش+3

hager za3bal

ما أكثر التفاصيل الصغيرة فى نظرنا و لكنها كبيرة فى نظر الأخرين

الكتاب فى مجمله جميل

دة حقيقى الكتاب و قراءته و انت ماسكة اكثر تفاعلا ومعايشة لشعور و معانى ما تقرأه

شرفتينى بأول زيارة وتشرفينى فى اى وقت صدقينى

  Ramy

الأحد، 4 يوليو، 2010 5:20:00 ص جرينتش+3

بنت الأسلام

شوفى انا متفق معاكى ان مسك الأيدين قبل الجواز يحمل الكثير من القيل و القال

بتحليل شخصياتنا التى ترى كل فعل بين اثنين انه ورائه شيىء سيىء ما

و لكن القصة هنا تشرح مسك الأيد على طول حياة الأبطال تشرح حالة من الجفاء فى المشاعر الغير مبررة

القصة صورة رمزية لعدم اهمال التفاصيل البسيطة فى حياة من نحب

و زى ما انتى قولتى النية هنا تلعب دور البطولة (:

دة من ذوقك

و شكرا لمرورك و تعليقك (:

  Ramy

الأحد، 4 يوليو، 2010 5:23:00 ص جرينتش+3

وصف الأحساس

ليه بقى الحب بقى وراها اهداف

ليه ميكونش بس نحب لان حسينه ده مع الشخص ده

و هجرب فكرة الموبايل دى (: يمكن !!

شكرا ليكى شرفتينى (:

  Ramy

الأحد، 4 يوليو، 2010 5:28:00 ص جرينتش+3

tears

كلام حضرتك صح و دة المفروض اللى يكون و يتحس من الطرفين

و عندك حق ان البداية لازم من عند الراجل دة المفروض و هى هتعرف من مسكت ايده اهدافه و هل حبه حقيقى و لا لأ بأحساسها

و ما تزرعه تجنيه (:

شرفتينى وتشرفينى دائما (:

  Ramy

الأحد، 4 يوليو، 2010 5:42:00 ص جرينتش+3

moon light

مسكت الكتاب تحسسك انه صديقك و حبيبك

انتى قدرتى تفسرى البوست و القصة بطريقة بسيطة بعقل مستنير

دة حقيقى الزواج المبنى على حب حقيقى لابد له من الأستمرار

متتأسفيش لالا عادى خدى رحتك فى الكلام و بعدين صح الموضوع ليه وجهات نظر كتيرة قوى

نورتينى مرورك و تعليقك يا رب دايما (:

  Ramy

الأحد، 4 يوليو، 2010 5:49:00 ص جرينتش+3

الشوكة الناعمة

ان انت تحس بحبيبك ده مش ضعف منك ولا منه

دى احاسيس مفروض انها موجودة بين اى حبيبين

انا مبسوط ان البوست عجبك بس طبعا زعلان انه ممكن يكون جرحك انا اسف جدا ):

الله يسلمك و انا اسف انى ممكن اكون ضايقتك

شرفتينى و نورتينى بتعليقك

  Ramy

الأحد، 4 يوليو، 2010 5:54:00 ص جرينتش+3

محمد حجازى

انا كويس الحمد لله شكرا يا صحبى

ماشى يا محمد انا معاك غى دة فبل الخطوبة و الجواز

بس ابه العذر بقى بعد كدة !!!

و مسكت الأيد يا محمد هنا شيىء رمزى لعدم قدرة الواحد بالشعور بأحتياج الطرف الأخر

الله يسلمك دة من ذوقك يا صديقى

نورتنى (:

  Ramy

الأحد، 4 يوليو، 2010 5:59:00 ص جرينتش+3

المستفز

(:
على رايك مش ناقصة لحوسة (: طب يا عم انت عندك اسبابك المقنعة طب و الباقى (:

طبعا ماسكت الأيد هنا ما إلا شيىء رمزى بقدرتك بأحساسك بحبيبك وأحتياجاته عموما

التحية ليك انت يا صديقى

الله يخليك

نورتنى يا حسنى (:

  Ramy

الأحد، 4 يوليو، 2010 6:02:00 ص جرينتش+3

كلام من القلب

سعيد لأعجابك بالقصة

و سعيد بمرورك وتعليقك

شرفتينى و نورتينى (:

  Ramy

الأحد، 4 يوليو، 2010 6:05:00 ص جرينتش+3

ريتشاردية

أزيك (:

هههههههه تصدقى عندك حق ممكن يكون كدة مع الحر ده سهل قوى انتقال الأمراض

مش كل الناس طبعا زى القصة اكيد فى ناس عنده دم

بالنسبة للكتب كويس ان الكتب الألكترونية جت فى صالحك و خلتك تقرى (:

شرفتينى ونورتينى (:(:

  أحمد شريف

الأحد، 4 يوليو، 2010 11:14:00 م جرينتش+3

أضحك الله أيامك يا رامي
التدوينة لطيفة ودفها طيب كذلك

  hana

الاثنين، 5 يوليو، 2010 2:20:00 ص جرينتش+3

انت اللي واقف معاكواوي ههههههههه
ما اللي بيخلينا نخلص بسرعه الكتاب هواننا بنعيش جواه
بنتخيل كل شيء بنقراه لدرجةاننامنقدرش نفصلنا عنه للنهاية ذي منت وصفت

  Ramy

الاثنين، 5 يوليو، 2010 3:41:00 ص جرينتش+3

صديقى أحمد

(: الله يخليك (:

والله انت اللى لطيف

أهم حاجة انها عجبتك

(:

نورتنى و شرفتنى (: اسعد الله ايامك يا احمد

  Ramy

الاثنين، 5 يوليو، 2010 3:45:00 ص جرينتش+3

hana

لا صدقينى انا مش واقف مع حد اناواقف مع الحق (:(:

بجد يعنى انا كنت فى قمة الغيظ من الراجل الرخم بتاع القصة

و صح بس عارفة من كتر ما ممكن احب قصة او كتاب بكون نفسى متخلص

شكرا هناء للمتابعة الجيدة دى (:

نورتينى (: